اعمال 8 - کِتاب مُقدّس سرائیکی ترجمہ

¹ تے ساؤل اُوندے قتل اُتے راضی ہا۔ اُونہی ڈینہہ اُوں کلیسیا اُتے جیہڑی یروشلیم ءچ ہئی، وڈے ظلم دا سلسلہ شروع تھیّا تے رسُولاں دے علاوہ سارے لوک یہُودیہ تے سامریہ دے چودھارُوں تِتربِتر تھی گئے۔

ساؤل کلیسیا کُوں سَتیندے

² کُجھ اِیماندار لوکاں ستِفُنس کُوں دفنایا تے اُوندے اُتے وڈا ماتم کیتا۔

³ پر ساؤل کلیسیا کُوں تباہ کریندا ریہا۔ او گھر گھر وَنج تے مرداں تے عورتاں کُوں گِھیل تے قید کرویندا ہا۔

سامریہ ءچ اِنجیل دی تبلیغ

⁴ بس جیہڑے تِتربِتر تھئے ہَن او جاہ جاہ کلام دی خوشخبری سُنڑیندے ریہے۔

⁵ تے فِلپُس سامریہ شہر ءچ وَنج تے لوکاں ءچ المسیح دی تبلیغ کرݨ لگا۔

⁶ لوکاں فِلپُس دے معجزے ڈیکھ تے، تے اُوندے گالھیں سُنڑ تے، ہِک دل تھی تے اُوندے دو توجہ کیتی،

⁷ کیوں جو بہُوں سارے لوکاں ءچوں بدرُوحاں وڈی اواز نال چیخاں مار تے نِکل گئیاں تے بہُوں سارے مفلُوج تے منڈے چنگے کیتے گئے۔

⁸ تے اُوں شہر ءچ وڈی خوشی تھئی۔

⁹ اِیں کنُوں پہلے شمعون ناں دا ہِک بندہ اُوں شہر ءچ جادُوگری کریندا ہا تے سامریہ دے لوکاں کُوں حیران کیتی رکھیندا تے ایہ آدھا ہا جو مَیں وی کوئی وڈا بندہ ہاں۔

¹⁰ تے چھوٹے تُوں وڈے تئیں سارے اُوندے دو توجہ کریندے تے آدھے ہَن جو ”ایہ بندہ خُدا دی او قُدرت ہے جِینکُوں وڈی اکھیندے ہِن۔“

¹¹ او اِیں واسطے اُوندے دو توجہ کریندے ہَن جو اُوں وڈی مُدت کنُوں آپنڑے جادُو دے سببّوں ساریاں کُوں حیران کیتا ہویا ہا۔

¹² پر جِیں ویلے اُنہاں فِلپُس دا یقین کیتا جیہڑا خُدا دی بادشاہی تے یسُوع مسیح دے ناں دی خوشخبری ڈیندا ہا تاں سبھ لوک بھانویں مرد بھانویں عورت بپتسمہ گِھننڑ لگے۔

¹³ تے شمعون خود وی یقین کیتا تے بپتسمہ گِھن تے فِلپُس نال تھی پِیا تے نشان تے وڈے وڈے معجزے تھیندے ڈیکھ تے حیران تھیّا۔

¹⁴ جِیں ویلے یروشلیم ءچ رسُولاں سُنڑیا جو سامریہ دے لوکاں خُدا دا کلام قبول کر گِھدے تاں پطرس تے یُوحنّا کُوں اُنہاں کولھ بھیجیا۔

¹⁵ اُتھاں پُج تے اُنہاں نویں اِیمانداراں کیتے دُعا کیتی جو اُنہاں کُوں رُوح القُدس مِلے۔

¹⁶ کیوں جو او اُوں ویلے تئیں اُنہاں ءچوں کہیں اُتے نازل نہ تھیّا ہا۔ اُنہاں صرف خُداوند یسُوع دے ناں اُتے بپتسمہ گِھدا ہا۔

¹⁷ وَل پطرس تے یُوحنّا اُنہاں اُتے ہتھ رکھے تے اُنہاں رُوح القُدس پایا۔

¹⁸ جِیں ویلے شمعون ڈِٹھا جو رسُولاں دے ہتھ رکھنڑ نال رُوح القُدس ڈِتا ویندے تاں اُنہاں کولھ پیسے گِھن تے

¹⁹ آکھیا جو ”میکُوں وی ایہ اِختیار ڈیؤ جو جئیں اُتے مَیں ہتھ رکھاں او رُوح القُدس پاوے۔“

²⁰ پطرس اُونکُوں آکھیا ”تیڈے پیسے تیڈے نال برباد تھیوݨ، کیوں جو تُوں خُدا دی نعمت کُوں پیسیاں نال گِھننڑ دا خیال کیتا۔

²¹ اِیں کم ءچ تیڈا کوئی حصہ یا سانجھ نئیں کیوں جو تیڈا دل خُدا دے نزدیک ٹھیک نئیں۔

²² بس آپنڑی اِیں بدی کنُوں توبہ کر، تے خُداوند کنُوں دُعا کر جو شاید تیڈے دل دے اِیں خیال کُوں معاف کر ڈیوے۔

²³ کیوں جو مَیں ڈیدھا ہاں جو تُوں شدید تلخی تے بُرائی ءچ گرفتار ہیں۔“

²⁴ شمعون جواب ءچ آکھیا، ”تُساں میڈے کیتے خُداوند کنُوں دُعا کرو جو جیہڑے گالھیں تُساں آکھیاں، اُنہاں ءچوں کوئی میڈے اُتے نہ آوے۔“

²⁵ پطرس تے یُوحنّا گواہی ڈیوݨ تے خُداوند دا کلام سُنڑاوݨ دے بعد یروشلیم کُوں وَل گئے تے سامریہ دے بہُوں ساریاں وستیاں ءچ خوشخبری سُنڑیندے گئے۔

فِلپُس تے حبشی خوجہ

²⁶ وَل خُداوند دے فرشتہ فِلپُس کُوں آکھیا جو ”اُٹھی تے جنُوب دو اُوں راہ تئیں وَنج جیہڑی بیابان ءچوں تھی تے یروشلیم تُوں غزہ کُوں ویندی ہے۔“

²⁷ او اُٹھی تے روانہ تھیّا تاں ڈیکھو ایتھوپِیا دا ہِک خوجہ آندا پِیا ہا۔ او ایتھوپِیا دی ملکہ کنداکے دا ہِک وزیر تے اُوندے سارے خزانے دا مُختار ہا تے یروشلیم ءچ عبادت کیتے آیا ہا۔

²⁸ او آپنڑی بگھی اُتے سوار ہا تے یسعیاہ نبی دا صحیفہ پڑھدا ہویا واپس ویندا پِیا ہا۔

²⁹ رُوح القُدس فِلپُس کُوں آکھیا جو ”نزدیک وَنج تے اُوں بگھی دے نال تھی پو۔“

³⁰ بس فِلپُس اُوندے دو دِرک تے اُونکُوں یسعیاہ نبی دا صحیفہ پڑھدے سُنڑیا تے آکھیا جو ”جیہڑا کُجھ تُساں پڑھدے ہیوے، کیا اُونکُوں سمجھدے وی ہیوے؟“

³¹ اُوں آکھیا جو ”ایہ مَیں کِینویں سمجھ سگدا ہاں جئیں تئیں کوئی میڈی راہنمائی نہ کرے؟“ تے اُوں فِلپُس کُوں درخاست کیتی جو ”میڈے کولھ آ بہہ۔“

³² پاک کلام ءچوں جیہڑا حصہ او پڑھدا پِیا ہا، او ایہ ہا جو ”لوک اُونکُوں بھیڈ آلی کار ذبح کرݨ کیتے گِھن گئے تے جِینویں لیلا آپنڑے وال کُترݨ آلے دے سامنڑے چُپ راہندے، اِینویں ای اُوں آپنڑا مُنہ نہ کھولیا۔

³³ اُوندی بےعزتی کیتی گئی تے اُوندا اِنصاف نہ تھیّا تے کوݨ اُوندی نسل دا حال بیان کریسی؟ کیوں جو زمین اُتے اُوندی زندگی ختم کر ڈِتی گئی ہے۔“

³⁴ خوجے فِلپُس کُوں آکھیا، ”مہربانی کر تے میکُوں ڈساؤ جو نبی ایہ کیندے بارے ءچ آدھے؟ آپنڑے یا کہیں بئے دے بارے ءچ؟“

³⁵ فِلپُس خُدا دے کلام دی اُوں جاہ تُوں شروع کر تے اُونکُوں یسُوع دے بارے ءچ خوشخبری ڈِتی۔

³⁶ او رستے ءچ ویندے ہوئے، ایجھی جاہ اُتے پُجے جِتھاں پانڑی ہا۔ خوجے آکھیا ”ڈیکھ اِتھاں پانڑی موجود ہے، ہُنڑ میکُوں بپتسمہ گِھننڑ تُوں کیہڑی چیز روکیندی ہے؟“

³⁷ [فِلپُس آکھیا جو ”جے تُساں دل تے جان نال اِیمان رکھیندے ہیوے تاں بپتسمہ گِھن سگدے ہیوے۔“ اُوں جواب ڈِتا، ”مَیں اِیمان رکھیندا ہاں جو یسُوع مسیح خُدا دا پوتر ہے۔“]

³⁸ بس اُوں بگھی کُوں روکنڑ دا حُکم ڈِتا تے فِلپُس تے خوجہ ڈوہائیں پانڑی ءچ لتھے تے فِلپُس اُونکُوں بپتسمہ ڈِتا۔

³⁹ جِیں ویلے او پانڑی ءچوں نِکل تے باہر آئے تاں خُداوند دا رُوح فِلپُس کُوں چا تے گِھن گِیا تے خوجے اُونکُوں ولا نہ ڈِٹھا۔ پر او خوشی کریندا ہویا آپنڑی منزل دو روانہ تھی گِیا۔

⁴⁰ وَل فِلپُس اشدُود ءچ وَنج نِکلیا تے قیصریہ ءچ پُجنڑ تئیں سارے شہراں ءچ خوشخبری سُنڑیندا گِیا۔