اعمال 6 - کِتاب مُقدّس سرائیکی ترجمہ

سَت مددگار

¹ اُنہاں ڈینہاں ءچ جِیں ویلے شاگرداں دی تعداد ودھدی ویندی ہئی تاں یُونانی بولنڑ آلے یہُودی، عبرانیاں دی شکایت کرݨ لگے جو ہر روز جِیں ویلے کھانڑا تقسیم تھیندا ہے تاں ساڈیاں بیوہ عورتاں کُوں نظر انداز کیتا ویندے۔

² وَل بارہاں رسُولاں، شاگرداں دی جماعت کُوں سڈ تے آکھیا، ”مناسب نئیں جو اساں خُدا دے کلام دی تبلیغ کُوں چھوڑ تے کھاوݨ پِیوݨ دا اِنتظام کرُوں۔

³ اِیں واسطے بِھراؤ! آپنڑے ءچوں سَت نیک ناں بندے چُنڑ گِھنو جیہڑے رُوح القُدس تے دانائی نال بھرے ہووݨ جو اساں اُنہاں کُوں اِیں کم کیتے مقرر کرُوں۔

⁴ پر اساں تاں دُعا ءچ تے کلام دی خدمت ءچ مصروف راہسوں۔“

⁵ ایہ گالھ ساری جماعت کُوں پسند آئی۔ بس اُنہاں ستِفُنس ناں دے ہِک بندے کُوں جیہڑا اِیمان تے رُوح القُدس نال بھریا ہویا ہا تے فِلپُس، پرُخُرس، نِیکانور، تِیمون، پرمناس تے نیکُلاؤس کُوں چُنڑ گِھدا۔ نیکُلاؤس انطاکِیہ دا نو مُرید یہُودی ہا۔

⁶ تے اِنہاں کُوں رسُولاں دے اگُوں کھڑا کیتا، تے رسُولاں اُنہاں اُتے ہتھ رکھ تے دُعا کیتی۔

⁷ خُدا دا کلام پھیلدا ریہا تے یروشلیم ءچ شاگرداں دی تعداد بہُوں ای ودھ گئی تے بہُوں سارے کاہِن اِیمان گِھن آئے۔

ستِفُنس دی گرفتاری

⁸ ستِفُنس فضل تے قوت نال بھریا ہویا لوکاں ءچ وڈے وڈے عجیب کم تے معجزے ظاہر کریندا ہا۔

⁹ کُرینی، اِسکندرِیہ، کلکیہ تے آسِیہ دے کُجھ لوک اُوں عبادت خانہ دے ہَن جیہڑا آزاد کیتے گئے غُلاماں دا اکھویندے۔ او ستِفُنس نال بحث کرݨ لگے۔

¹⁰ پر ستِفُنس رُوح القُدس دی مدد نال اِتنی دانائی نال کلام کریندا ہا جو او اُوندا مُقابلہ نہ کر سگے۔

¹¹ اِیں تے اُنہاں کُجھ بندیاں کُوں سِکھا تے اکھوا بھیجیا جو ”اساں اِینکُوں مُوسیٰ تے خُدا دے برخلاف کُفر بَکدے سُنڑیا ہے۔“

¹² وَل او عوام تے بزُرگاں تے شریعت دے عالماں کُوں اُکسا تے ستِفُنس اُتے چڑھ گئے تے اُونکُوں پکڑ تے صدر ِ عدالت ءچ گِھن گئے۔

¹³ تے کُوڑے گواہ پیش کیتے جِنہاں آکھیا جو ”ایہ بندہ اِیں پاک مقام تے شریعت دے خلاف بولنڑ تُوں باز نئیں آندا،

¹⁴ کیوں جو اساں اُونکُوں ایہ آدھے سُنڑیا ہے جو اِیہو یسُوع جیہڑا ناصرۃ دا ہے، اِیں مقام کُوں برباد کر ڈیسی تے اُنہاں رسماں کُوں بدل ڈیسی، جیہڑیاں مُوسیٰ ساکُوں ڈِتیاں ہِن۔“

¹⁵ اُنہاں ساریاں، جیہڑے عدالت ءچ بیٹھے ہَن، ستِفُنس اُتے نِگاہ کیتی تاں ڈِٹھا جو اُوندا چہرہ فرشتے آلی کار ہے۔