اعمال 5 - کِتاب مُقدّس سرائیکی ترجمہ

حننیاہ تے سفیرہ

¹ حننیاہ ناں دے ہِک بندے، تے اُوندی ذال سفیرہ آپنڑی کُجھ جائیداد ویچی۔

² اُوں آپنڑی ذال دے جانڑدے ہوئے قیمت ءچوں کُجھ رقم آپنڑے کولھ رکھ گِھدی تے باقی رقم رسُولاں دے پیراں ءچ رکھ ڈِتی۔

³ پر پطرس آکھیا، ”حننیاہ! شیطان تیڈے دل ءچ ایہ گالھ کیوں پا ڈِتی جو تُوں رُوح القُدس نال کُوڑ ماریں تے زمین دی قیمت ءچوں کُجھ رکھ چھوڑیں؟

⁴ کیا ویچنڑ کنُوں پہلے زمین تیڈی نہ ہئی؟ تے جِیں ویلے ویچی گئی تاں رقم تیڈے اِختیار ءچ نہ ہئی؟ تیڈے دل ءچ ایہ گالھ کِینویں آئی؟ تَیں اِنسان نال نئیں بلکہ خُدا نال کُوڑ مارے۔“

⁵ حننیاہ ایہ سُنڑدے ای ڈھٹھا تے مر گِیا، تے سبھ سُنڑݨ آلیاں اُتے بہُوں خوف چھا گِیا۔

⁶ وَل کُجھ جوان آئے تے اُوندی لاش کُوں کفن ءچ ولھیٹ تے باہر گِھن گئے تے دفن کر ڈِتا۔

⁷ تقریباً ترے گھنٹے بعد اُوندی ذال، اِیں واقعہ کنُوں بے خبر اندر آئی۔

⁸ پطرس اُوں کنُوں پُچھیا، ”میکُوں ڈسا، کیا تُساں اِتنے ءچ ای زمین ویچی ہئی؟“ اُوں آکھیا، ”ہاں، اِتنے ءچ ای۔“

⁹ پطرس اُونکُوں آکھیا، ”تُساں کیوں خُداوند دے رُوح القُدس کُوں ازماوݨ کیتے ایکا کیتے؟ ڈیکھ، جیہڑے لوکاں تیڈے پئے کُوں دفن کیتے، او دروازے تئیں پُج گئے ہِن تے تیکُوں وی باہر گِھن ویسن۔“

¹⁰ او اُوں ویلے ای پطرس دے پیراں ءچ ڈھے پئی تے مر گئی۔ جوان اندر آئے تاں اُونکُوں مریا ڈیکھ تے باہر گِھن گئے تے اُونکُوں اُوندے پئے نال دفن کر ڈِتا۔

¹¹ تے ساری کلیسیا بلکہ اِنہاں گالھیں کُوں سبھ سُنڑݨ آلیاں اُتے خوف چھا گِیا۔

نشان تے عجیب کم

¹² تے رسُولاں دے ہتُھوں بہُوں سارے معجزے تے عجیب کم لوکاں ءچ تھیندے ہَن۔ تے سارے اِیماندار ہِک دل تھی تے سُلیمان دے برانڈے ءچ جمع تھیندے ہَن۔

¹³ پر ڈُوجھیاں ءچوں کہیں کُوں جُرأت نہ تھیندی ہئی جو اُنہاں ءچ شامل تھی ونجنڑ، بےشک لوک اُنہاں دی بہُوں عزت کریندے ہَن۔

¹⁴ اِیندے باوجود بہُوں سارے مرد تے عورتاں اِیمان گِھن آئے تے خُداوند دے مننڑ آلیاں دی تعداد ودھدی ویندی ہئی۔

¹⁵ اِتُھوں تئیں جو لوک بیماراں کُوں کَھٹاں تے چٹائیاں اُتے گِھن گِھن تے سڑکاں اُتے سَٹ ڈیندے ہَن، تاں جو جِیں ویلے پطرس اُتھوں لنگھے تاں گھٹ و گھٹ اُوندا پرچھانواں ای اُنہاں اُتے پے ونجے۔

¹⁶ تے یروشلیم دے چارے پاسُوں دیاں وستیاں ءچوں بے شمار لوک بیماراں تے اُنہاں کُوں جِنہاں ءچ بدرُوحاں ہَن، آپنڑے نال گِھن آندے ہَن تے او سارے دے سارے چنگے کر ڈِتے ویندے ہَن۔

رسُول ستائے ویندے ہِن

¹⁷ اِیں گالھ اُتے کاہِن ِ اعظم تے اُوندے سارے ساتھی جیہڑے صدوقیاں دے فرقہ دے ہَن، حسد کنُوں بھریج گئے۔

¹⁸ تے رسُولاں کُوں گرفتار کروا تے جیل ءچ سَٹ ڈِتا۔

¹⁹ پر رات کُوں خُداوند دے ہِک فرشتہ قید خانہ دے دروازے کھولے تے اُنہاں کُوں باہر کڈھ تے آکھنڑ لگا جو

²⁰ ”ونجو ہیکل ءچ کھڑے تھی تے اِیں زندگی دے بارے ءچ سارے گالھیں لوکاں کُوں ڈساؤ۔“

²¹ او ایہ سُنڑ تے سویل نال ای ہیکل ءچ گئے تے تعلیم ڈیوݨ لگے۔ پر کاہِن ِ اعظم تے اُوندے ساتھیاں آ تے صدر ِ عدالت آلیاں یعنی بنی اِسرائیل دے سارے بزُرگاں کُوں جمع کیتا تے قید خانہ ءچ اکھوا بھیجیا جو رسُولاں کُوں گِھن آوݨ۔

²² پر ہیکل دے محافظاں دے افسراں پُج تے اُنہاں کُوں قید خانہ ءچ نہ پاتا تے وَل آ تے خبر ڈِتی جو

²³ ”اساں قید خانہ کُوں تاں بہُوں حفاظت نال بند کیتا ہویا تے پہرے داراں کُوں دروازیاں اُتے کھڑے ڈِٹھا، پر جِیں ویلے کھولیا تاں اندر کوئی نہ مِلیا۔“

²⁴ ہیکل دے محافظاں دے سردار تے سردار کاہِناں ایہ گالھیں سُنڑیاں تاں حیران تھئے تے سوچنڑ لگے جو ہُنڑ کیا تھیسی۔

²⁵ اُوں ویلے کہیں آ تے اُنہاں کُوں خبر ڈِتی جو ”ڈیکھو، او بندے جِنہاں کُوں تُساں قید کیتا ہا، ہیکل ءچ کھڑے لوکاں کُوں تعلیم ڈیندے پئے ہِن۔“

²⁶ وَل ہیکل دے محافظاں دا سردار آپنڑے سپاہیاں نال وَنج تے اُنہاں کُوں گِھن آیا پر زور نال نئیں کیوں جو لوکاں کنُوں ڈردے ہَن جو ساکُوں سنگسار نہ کرݨ۔

²⁷ وَل اُنہاں کُوں گِھن آ تے عدالت ءچ کھڑا کر ڈِتا تے کاہِن ِ اعظم اُنہاں کُوں ایہ آکھیا،

²⁸ ”اساں تاں تُہاکُوں سخت تاکید کیتی ہئی جو ایہ ناں گِھن تے تعلیم نہ ڈیوائے پر ڈیکھو تُساں سارے یروشلیم ءچ آپنڑی تعلیم پھیلا ڈِتی تے اُوں بندے دا خون ساڈی گردن اُتے رکھنڑ چاہندے ہیوے۔“

²⁹ پطرس تے رسُولاں جواب ءچ آکھیا جو ”ساڈے اُتے اِنسان دے حُکم دی بجائے خُدا دا حُکم مننڑ زیادہ فرض ہے۔

³⁰ ساڈے پِیُو ڈاڈا دے خُدا، یسُوع کُوں مُردیاں ءچوں زندہ کیتا جِینکُوں تُساں صلیب اُتے چڑھا تے مار ڈِتا ہا۔

³¹ خُدا اُونکُوں ای مالک تے نجات ڈیوݨ آلا بنڑا تے آپنڑے سجے ہتھ آلے پاسُوں بِلھا گِھدا تاں جو اِسرائیل کُوں توبہ دی توفیق تے گُناہاں دی معافی بخشے۔

³² اساں اِنہاں گالھیں دے گواہ ہیں تے رُوح القُدس وی، جیہڑا خُدا آپنڑے فرمانبرداراں کُوں عطا فرمائے۔“

³³ او ایہ سُنڑ تے کوڑیج گئے تے چاہندے ہَن جو اُنہاں کُوں قتل کر ڈیوݨ،

³⁴ پر گملی ایل ناں دے ہِک فریسی جیہڑا شریعت دا عالم تے سارے لوکاں ءچ عزت دار ہا، عدالت ءچ کھڑا تھی تے حُکم ڈِتا جو اِنہاں بندیاں کُوں تھوڑی دیر کیتے باہر کر ڈیؤ۔

³⁵ وَل اُنہاں کُوں آکھیا، ”اِسرائیلیو! اِنہاں بندیاں دے نال جیہڑا کُجھ کرݨ چاہندے ہیوے، ہوشیاری نال کرائے،

³⁶ کیوں جو کُجھ عرصہ پہلے تھیُوداس اُٹھیا ہا تے دعویٰ کیتا ہا جو مَیں وی کوئی چیز ہاں تے تقریباً چار سو بندے اُوندے نال رَل گئے ہَن۔ پر او ماریا گِیا تے جِتّی اُوندے مننڑ آلے ہَن، سارے تِتربِتر تھی گئے تے اُوندا دعویٰ ختم تھی گِیا۔

³⁷ اِیں بندے دے بعد مردم شماری دے ڈینہاں ءچ یہُوداہ گلیلی اُٹھیا تے اُوں کُجھ لوک آپنڑے نال کر گِھدے۔ او وی ہلاک تھیّا تے جِتّی اُوندے مننڑ آلے ہَن سارے تِتربِتر تھی گئے۔

³⁸ بس ہُنڑ مَیں تُہاکُوں آدھا ہاں جو اِنہاں بندیاں کنُوں دُور رہوائے تے اِنہاں نال کُجھ کم نہ رکھائے، کیوں جو ایہ تدبیر یا کم جے اِنساناں دی طرفوں ہے تاں خودبخود برباد تھی ویسی،

³⁹ پر جے خُدا دی طرفوں ہے تاں تُساں اِنہاں بندیاں کُوں روک نہ سگسو بلکہ خُدا نال لڑن آلے کھڑائے ویسو۔“

⁴⁰ اُنہاں اُوندی گالھ مَن گِھدی تے رسُولاں کُوں سڈ تے اُنہاں کُوں کوڑے مروائے تے ایہ حُکم ڈے تے چھوڑ ڈِتا جو یسُوع دا ناں گِھن تے گالھ نہ کرائے۔

⁴¹ بس رسُول عدالت ءچوں اِیں گالھ تُوں خوش تھی تے چلے گئے جو اساں یسُوع دے ناں دی خاطر بے عزت تھیوݨ دے لائق تاں تھئے۔

⁴² تے او ہیکل تے گھراں ءچ ہر روز تعلیم ڈیوݨ تے اِیں گالھ دی خوشخبری سُنڑاوݨ تُوں باز نہ آئے جو یسُوع ای المسیح ہے۔