اعمال 4 - کِتاب مُقدّس سرائیکی ترجمہ

پطرس تے یُوحنّا دی صدر ِ عدالت ءچ پیشی

¹ پطرس تے یُوحنّا لوکاں کُوں آدھے ای پئے ہَن جو کاہِن تے ہیکل دے سپاہیاں دا سردار تے صدوقی اُنہاں اُتے چڑھ آئے۔

² او بہُوں کاوڑ ءچ ہَن کیوں جو او لوکاں کُوں یسُوع دی مثال ڈے تے مُردیاں ءچوں زندہ تھیوݨ دی تعلیم ڈیندے ہَن۔

³ اُنہاں پطرس تے یُوحنّا کُوں پکڑ تے ڈُوجھے ڈینہہ تئیں قید خانہ ءچ رکھیا کیوں جو شام تھی گئی ہئی۔

⁴ پر کلام سُنڑݨ آلیاں ءچوں بہُوں سارے اِیمان گِھن آئے، اِتُھوں تئیں جو اِیماندار مرداں دی تعداد پنج ہزار تھی گئی۔

⁵ ڈُوجھے ڈینہہ یہُودی سردار، بزُرگ، شریعت دے عالم،

⁶ کاہِن ِ اعظم حنّا، کائفا، یُوحنّا، اِسکندر تے جِتّی سردار کاہِن دے گھرانڑے دے ہَن، یروشلیم ءچ جمع تھئے،

⁷ تے پطرس تے یُوحنّا کُوں اَدھ ءچ کھڑا کر تے پُچھنڑ لگے، ”تُساں کیندی قُدرت تے ناں نال ایہ کم کیتے؟“

⁸ وَل پطرس رُوح القُدس نال بھریج تے اُنہاں کُوں آکھیا، ”اُمت دے سردارو تے بزُرگو!

⁹ جے اَج ساڈے کنُوں ہِک نیک کم پارُوں پُچھ گُچھ کیتی ویندی ہے جو ایہ معذور کِینویں شِفایاب تھی گِیا،

¹⁰ تاں تُساں تے ساری اِسرائیلی قوم ایہ جاݨ گِھنے جو یسُوع مسیح ناصری دے ناں نال جِینکُوں تُساں صلیب اُتے چڑھا ڈِتا تے جِینکُوں خُدا مُردیاں ءچوں زندہ کیتا، ایہ بندہ تُہاڈے سامنڑے تندرُست کھڑا ہے۔

¹¹ یسُوع ’اُوہو پتھر ہے جِینکُوں تُساں مِستریاں رَد کر ڈِتا تے او کونے دے سرے دا پتھر تھی گِیا۔‘

¹² تے کہیں بئے دے وسیلے نجات نئیں مِلدی کیوں جو اسمان دے تلے لوکاں کُوں کوئی ڈُوجھا ناں نئیں بخشیا گِیا جیندے وسیلے نال اساں نجات پا سگوں۔“

¹³ جِیں ویلے اُنہاں پطرس تے یُوحنّا دی جُرأت ڈِٹھی تے معلوم تھیّا جو او اَن پڑھ تے عام بندے ہِن تاں بہُوں حیران تھئے۔ نال نال اُنہاں جاݨ گِھدا جو ایہ ڈوہائیں یسُوع دے نال رہ چُکے ہِن۔

¹⁴ پر اُوں بندے کُوں جیہڑا چنگا تھیّا ہا، اُنہاں نال کھڑا ڈیکھ تے اُوندے خلاف کُجھ نہ آکھ سگے۔

¹⁵ اِیں واسطے اُنہاں کُوں عدالت کنُوں باہر ونجنڑ دا حُکم ڈے تے آپس ءچ صلاح کرݨ لگے جو

¹⁶ ”اساں اِنہاں بندیاں نال کیا کرُوں؟ کیوں جو یروشلیم دے سارے لوک جانڑدے ہِن جو اُنہاں ہِک معجزہ کیتے تے اساں اِیندا اِنکار نئیں کر سگدے۔

¹⁷ پر اِیں واسطے جو ایہ گالھ لوکاں ءچ مزید مشہور نہ تھیوے، اساں اُنہاں کُوں دڑکے ڈیسوں جو ولا یسُوع دا ناں گِھن تے کہیں نال گالھ نہ کرݨ۔“

¹⁸ بس اُنہاں کُوں سڈ تے حُکم ڈِتا جو یسُوع دا ناں گِھن تے ہرگز کہیں نال گالھ نہ کرݨ تے نہ تعلیم ڈیوݨ۔

¹⁹ پر پطرس تے یُوحنّا جواب ڈِتا، ”تُساں ای فیصلہ کرو جو خُدا دی نِگاہ ءچ کیا ٹھیک ہے، اساں تُہاڈی گالھ منُوں یا خُدا دی؟

²⁰ کیوں جو ممکن نئیں جو اساں جیہڑا کُجھ ڈِٹھا تے سُنڑیا ہے، اُوندا ذِکر نہ کرُوں۔“

²¹ عدالت آلیاں اُنہاں کُوں بِیا وی دھمکا تے چھوڑ ڈِتا کیوں جو لوکاں دے سببّوں اُنہاں کُوں سزا ڈیوݨ دا کوئی موقع نہ مِلیا۔ اِیں واسطے جو سارے لوک اُوں واقعے دے سببّوں خُدا دی تعریف کریندے ہَن۔

²² کیوں جو جیہڑا بندہ اِیں معجزے کنُوں شِفا پا گِیا ہا، چالیہہ سالہاں کنُوں زیادہ عُمر دا ہا۔

اِیماندار دلیری کیتے دُعا منگدے ہِن

²³ جِینویں ای پطرس تے یُوحنّا رِہا تھئے، او آپنڑے لوکاں کولھ چلے گئے تے جیہڑا کُجھ سردار کاہِناں تے بزُرگاں اُنہاں کُوں آکھیا ہا، بیان کیتا۔

²⁴ جِیں ویلے اُنہاں ایہ سُنڑیا تاں ہِک دل تھی تے خُدا کنُوں دُعا کیتی جو ”مالک! تُوں اسمان، زمین تے سمندر تے جیہڑا کُجھ اُنہاں ءچ ہے، سبھ کُوں بنڑایا۔

²⁵ تُوں رُوح القُدس دے وسیلے نال ساڈے پِیُو، آپنڑے خادم داؤد دی زبانی فرمایا جو ’غیر قوماں کیوں کاوڑ ءچ ہِن تے اُمتاں کیوں فضول منصوبے بنڑیندیاں ہِن؟

²⁶ رب تے اُوندے المسیح دی مخالفت ءچ دُنیا دے بادشاہ اُٹھی کھڑے تھئے تے سردار جمع تھی گئے۔‘

²⁷ واقعی تیڈے قدُّوس خادم یسُوع دے خلاف جِینکُوں تَیں مسیح مقرر کیتا، ہیرودیس تے پنطیُس پِیلاطُس، بنی اِسرائیل تے غیر قوماں نال کٹھے تھی گئے

²⁸ تاں جو جیہڑا کُجھ تیڈی قُدرت تے اِرادہ دے مطابق پہلے ای مقرر کر ڈِتا گِیا ہا اُوہو تھیوے۔

²⁹ ہُنڑ اے خُداوند! اُنہاں دیاں دھمکیاں کُوں ڈیکھ تے آپنڑے بندیاں کُوں آپنڑا کلام بہُوں جُرأت نال سُنڑاوݨ دی توفیق ڈے۔

³⁰ تے تُوں آپنڑی قُدرت دا اِظہار کر تاں جو تیڈے قدُّوس خادم یسُوع دے ناں نال شِفا، معجزے تے عجیب کم تھیوݨ۔“

³¹ جِیں ویلے اُنہاں دُعا کر گِھدی تاں او جاہ جِتھاں او جمع ہَن کمب گئی تے او سارے رُوح القُدس نال بھریج گئے تے او خُدا دا کلام جُرأت نال سُنڑاوݨ لگے۔

اِیمانداراں دی مشترکہ زندگی

³² اِیمانداراں دی جماعت ہِک دل تے یک جان ہئی تے کہیں وی آپنڑے مال کُوں آپنڑا نہ آکھیا بلکہ اُنہاں دی ہر چیز سانجھی ہئی۔

³³ تے رسُول وڈی قُدرت نال خُداوند یسُوع دے مُردیاں ءچوں زندہ تھیوݨ دی گواہی ڈیندے ہَن۔ تے اُنہاں ساریاں اُتے خُدا دا وڈا فضل ہا

³⁴ کیوں جو اُنہاں ءچوں کوئی مُتھاج نہ ہا، اِیں واسطے جو جیہڑے لوک زمیناں یا گھراں دے مالک ہَن، اُنہاں کُوں ویچ ویچ تے وِکیاں ہوئیاں چیزاں دے پیسے گِھن آندے ہَن۔

³⁵ تے رسُولاں دے پیراں ءچ رکھ ڈیندے ہَن تے او ہر ہِک کُوں اُنہاں دی ضرورت دے مطابق وَنڈ ڈیندے ہَن۔

³⁶ لاوی قبیلے دا یُوسف ناں دا ہِک بندہ ہا جیہڑا کُپرُس دا راہنڑ آلا ہا۔ رسُولاں اُوندا ناں برنباس رکھیا ہا جِیندا مطلب ہے حوصلہ ڈیوݨ آلا۔

³⁷ اُوں آپنڑا کھیت ویچ تے پیسے رسُولاں دے پیراں ءچ رکھ ڈِتے۔