اعمال 3 - کِتاب مُقدّس سرائیکی ترجمہ

ہِک منڈے بِھکاری کُوں شِفا ڈِتی ویندی ہے

¹ پطرس تے یُوحنّا، دُعا ویلے یعنی ڈوپہر ترے وجے ہیکل دو ویندے پئے ہَن۔

² اُوں ویلے لوک ہِک بندے کُوں جیہڑا جماندرُو مَنڈا ہا، چاتی آندے ہَن۔ او اُونکُوں اندر ونجنڑ آلیاں کنُوں خیرات منگنڑ کیتے ہر روز ہیکل دے دروازے اُتے جیہڑا خُوبصُورت اکھویندا ہے، چھوڑ ویندے ہَن۔

³ جِیں ویلے اُوں پطرس تے یُوحنّا کُوں ہیکل ءچ ویندے ڈِٹھا تاں اُنہاں کنُوں خیرات منگی۔

⁴ پطرس تے یُوحنّا اُوندے اُتے غور نال نِگاہ کیتی تے پطرس آکھیا، ”ساڈے دو ڈیکھ۔“

⁵ او اُنہاں کنُوں کُجھ مِلنڑ دی اُمید تے اُنہاں دو متوجہ تھیّا۔

⁶ پطرس آکھیا، ”چاندی، سونا تاں میڈے کولھ نئیں پر جیہڑا کُجھ میڈے کولھ ہے مَیں تیکُوں ڈے ڈیندا ہاں۔ یسُوع مسیح ناصری دے ناں نال اُٹھی، تے ٹُر پِھر۔“

⁷ وَل پطرس اُوندا سجا ہتھ پکڑ تے اُونکُوں کھڑا کیتا، تے فوراً اُوندے پیر تے گِٹے مضبوط تھی گئے۔

⁸ او ٹپّا مار تے کھڑا تھی گِیا تے ٹُرݨ پِھرݨ لگا، تے ٹپے مریندا تے خُدا دی حمد کریندا ہویا اُنہاں نال ہیکل ءچ داخل تھی گِیا۔

⁹ سارے لوکاں اُونکُوں ٹُردے پِھردے تے خُدا دی حمد کریندے ڈیکھ تے

¹⁰ اُونکُوں پچھاݨ گِھدا جو ایہ تاں اُوہو ہے جیہڑا ہیکل دے خُوب صورت دروازے اُتے بہہ تے خیرات منگدا ہا، تے او جیہڑا اُوندے نال تھیّا ہا، اُوں تُوں بہُوں ای حیران تھئے۔

ہیکل ءچ پطرس دا پیغام

¹¹ جِیں ویلے او بندہ پطرس تے یُوحنّا کُوں پکڑ تے سُلیمانی برانڈے ءچ کھڑا ہا تاں سارے لوک بہُوں حیران تھی تے اُوں دو بھجدے آئے۔

¹² پطرس ایہ ڈیکھ تے لوکاں کُوں آکھیا، ”اِسرائیلیو! تُساں اِیں اُتے کیوں حیران تھیندے ہیوے تے ساکُوں اِینویں کیوں ڈیدھے پئے ہیوے جِینویں اساں آپنڑی قُدرت یا دینداری دے سببّوں اِیں منڈے کُوں ٹُرݨ پِھرݨ دے لائق بنڑا ڈِتے؟

¹³ ابرہام، اِضحاق تے یعقُوب دے خُدا یعنی ساڈے پِیُو ڈاڈا دے خُدا آپنڑے خادم یسُوع کُوں جلال ڈِتے۔ تُساں اُونکُوں پکڑوا ڈِتا تے جِیں ویلے پِیلاطُس اُونکُوں چھوڑ ڈیوݨ دا اِرادہ کیتا تاں تُساں پِیلاطُس دے سامنڑے اُوندا اِنکار کیتا۔

¹⁴ تُساں اُوں قدُّوس تے راستباز دا اِنکار کیتا تے درخاست کیتی جو ہِک خونی تُہاڈے کیتے رِہا کر ڈِتا ونجے۔

¹⁵ تُساں زندگی دے مالک کُوں قتل کر ڈِتا جِینکُوں خُدا مُردیاں ءچوں زندہ کیتا۔ اساں اِیندے گواہ ہیں۔

¹⁶ یسُوع دے ناں اُتے اِیمان رکھنڑ نال اِیں بندے، جِینکُوں تُساں ڈیدھے تے جانڑدے ہیوے، شِفا پائی۔ اُوں اِیمان جیہڑا یسُوع دے وسیلے نال ہے اُونکُوں سبھ دے سامنڑے ایہ کامِل تندرُستی ڈِتی۔

¹⁷ تے ہُنڑ میڈے بِھراؤ! مَیں جانڑدا ہاں جو تُساں ایہ کم نادانی ءچ کیتا تے اِینویں ای تُہاڈے سرداراں وی۔

¹⁸ پر خُدا او سارے گالھیں جیہڑیاں اُوں آپنڑے نبیاں دی زبانی آکھیاں ہَن جو اُوندا مسیح ڈُکھ چیسی، اِیں طرحاں پُوریاں کیتیاں۔

¹⁹ بس توبہ کرو تے رجُوع گِھن آؤ تاں جو تُہاڈے گُناہ مِٹائے ونجنڑ تے خُداوند دی طرفوں تُہاڈے کیتے رُوحانی تازگی دا وقت آوے،

²⁰ تے اُوں المسیح یعنی یسُوع کُوں، جِینکُوں اُوں تُہاڈے کیتے مقرر کیتا، ولا بھیجے۔

²¹ پر یسُوع دا اسمان اُتے راہنڑ ضرور ہے جئیں تئیں او ساریاں چیزاں بحال نہ کر ڈِتیاں ونجنڑ جِنہاں دا ذِکر خُدا دُنیا دے شروع کنُوں آپنڑے پاک نبیاں دی زبانی کیتے۔

²² کیوں جو مُوسیٰ آکھیا ہا جو ’خُداوند خُدا تُہاڈے بِھرانواں ءچوں میڈے وانگُوں ہِک نبی پیدا کریسی۔ جیہڑا کُجھ او تُہاکُوں آکھے اُوندی سُنڑائے۔

²³ جیہڑا بندہ اُوں نبی دی نہ سُنڑسی او اُمت ءچوں فنا کر ڈِتا ویسی۔‘

²⁴ بلکہ سموئیل کنُوں گِھن تے پِچھلیاں تئیں جِتّی نبیاں کلام کیتا اُنہاں ساریاں اِنہاں ڈینہاں دی خبر ڈِتی ہے۔

²⁵ تُساں نبیاں دی اولاد تے اُوں عہد ءچ شریک ہیوے جیہڑا خُدا تُہاڈے پِیُو ڈاڈا نال کیتا جِیں ویلے ابرہام کُوں آکھیا جو ’تیڈی اولاد کنُوں دُنیا دے سبھ لوک برکت پیسن۔‘

²⁶ خُدا آپنڑے خادم یسُوع کُوں زندہ کر تے پہلے تُہاڈے کولھ بھیجیا تاں جو تُہاڈے ءچوں ہر ہِک کُوں اُوندیاں بدکاریاں تُوں ہٹا تے برکت ڈیوے۔“