اعمال 28 - کِتاب مُقدّس سرائیکی ترجمہ

پولُس مِلِتے ءچ

¹ جِیں ویلے اساں خیریت نال پُج گئے تاں ساکُوں پتہ لگیا جو جزیرے دا ناں مِلِتے ہے۔

² اُتھوں دے لوک ساڈے نال وڈی مہربانی نال پیش آئے۔ اُنہاں بھاہ بال تے ساڈا اِستقبال کیتا کیوں جو بارش تھیندی پئی ہئی تے سردی ہئی۔

³ جِیں ویلے پولُس لکڑیاں دا گٹھا جمع کر تے بھاہ ءچ سٹیا تاں بھاہ دی گرمی دی وجہ کنُوں ہِک نانگ باہر نِکل تے اُوندے ہتھ اُتے وَلھٹیج گِیا۔

⁴ جِیں ویلے جزیرہ دے لوکاں نانگ کُوں اُوندے ہتھ نال لٹکدے ڈِٹھا تاں آپس ءچ آکھنڑ لگے جو ”بے شک ایہ بندہ کوئی خونی ہے۔ ایہ سمندر ءچ مرݨ کنُوں تاں بچ گِیا ہے پر اِنصاف اُونکُوں زندہ نہ چھوڑیسی۔“

⁵ پر پولُس نانگ کُوں بھاہ ءچ چِھنڈک ڈِتا تے اُونکُوں کوئی تکلیف نہ تھئی۔

⁶ او لوک اِنتظار ءچ ہَن جو اِیندا جِسم سُج سی تے او مر تے ڈھے پوسی پر بہُوں اِنتظار دے بعد جِیں ویلے پولُس کُوں کوئی تکلیف نہ تھئی تاں اُنہاں دا خیال بدل گِیا تے آکھیا جو ”ایہ ضرور کوئی دیوتا ہے۔“

⁷ اُوں جاہ دے نیڑے جزیرہ دے حاکم پُبلِیُس دی جاگیر ہا۔ او ساڈا اِستقبال کر تے آپنڑے گھر گِھن گِیا تے ترے ڈینہہ تئیں ساڈی چنگی مہمان نوازی کیتی۔

⁸ تے پُبلِیُس دا پِیُو بُخار تے دَست دے سببّوں بیمار ہا۔ پولُس اُوندی خبرگیری کرݨ گِیا تے دُعا دے بعد آپنڑے ہتھ اُوندے اُتے رکھے تے اُونکُوں شِفا ڈِتی۔

⁹ جِیں ویلے اِینویں تھیّا تاں اُوں جزیرے دے باقی مریض وی آ تے شِفا پاوݨ لگے۔

¹⁰ اُنہاں ساکُوں بہُوں عزت ڈِتی تے اگُوں ونجنڑ دے وقت سفر کیتے ساڈی ضرورت دیاں ساریاں چیزاں جہاز اُتے رکھوا ڈِتیاں۔

مِلِتے تُوں روم روانگی

¹¹ ترے مہینے بعد اساں اِسکندرِیہ دے ہِک جہاز ءچ روانہ تھئے جیہڑا سیالا گُزارݨ کیتے اُوں جزیرے ءچ رُکیا پِیا ہا۔ اِیں جہاز دا نشان جاڑا دیوتا ہا۔

¹² پہلے اساں سرَکُوسہ پُجے تے ترے ڈینہہ اُتھاں ریہے۔

¹³ اُتھوں کنُوں نِکل تے اساں ریگِیُم گئے۔ ڈُوجھے ڈینہہ جنُوبی ہوا گُھلی تے اساں ہِک ڈینہہ بعد پُتیُلِی وَنج پُجے۔

¹⁴ اُتھاں ساکُوں کُجھ بِھرا مِلے۔ اُنہاں دی دعوت اُتے اساں سَت ڈینہہ تئیں اُنہاں دے کولھ ریہے۔ تے اِینویں اساں روم وَنج پُجے۔

¹⁵ اُتھاں دے بِھرانواں ساڈی خبر سُنڑ تے ساڈے اِستقبال کیتے اَپّیُس دے چوک تے ترے سرائے تئیں آئے۔ پولُس اُنہاں کُوں ڈیکھ تے خُدا دا شُکر ادا کیتا تے اُونکُوں بہُوں حوصلہ تھیّا۔

پولُس روم ءچ

¹⁶ روم پُجنڑ تُوں بعد پولُس کُوں ہِک پہرے دار دی نِگرانی ءچ کلھا راہنڑ دی اِجازت مِل گئی۔

¹⁷ ترے ڈینہہ بعد پولُس یہُودی راہنماواں کُوں سڈوایا۔ جِیں ویلے او جمع تھئے تاں پولُس اُنہاں کُوں آکھیا، ”بِھراؤ، مَیں آپنڑی اُمت دے تے پِیُو ڈاڈا دیاں رسماں دے خلاف کوئی کم نئیں کیتا وَل وی میکُوں یروشلیم ءچ گرفتار کر تے رومیاں دے حوالے کر ڈِتا گئے۔

¹⁸ تفتیش کرݨ تُوں بعد او میکُوں چھوڑ ڈیوݨ چاہندے ہَن کیوں جو مَیں کوئی ایجھا کم نہ کیتا ہا جو میکُوں سزائے موت ڈِتی ونجے۔

¹⁹ پر جِیں ویلے یہُودیاں مخالفت کیتی تاں مَیں مجبوراً رومی بادشاہ قیصر کُوں اپیل کیتی، پر اِیں واسطے نئیں جو مَیں آپنڑی ای قوم اُتے کوئی اِلزام لاوݨ چاہندا ہم۔

²⁰ بس مَیں تُہاکُوں اِیں واسطے سڈوایا جو تُہاڈے نال مُلاقات کراں تے گالھ کراں کیوں جو مَیں بنی اِسرائیل دی اُمید دی وجہ کنُوں زنجیراں نال بدھیا پِیا ہاں۔“

²¹ اُنہاں جواب ڈِتا، ”ساکُوں یہُودیہ تُوں تُہاڈے بارے ءچ نہ تاں کوئی خط مِلے تے نہ اُتھوں کنُوں آئے ہوئے بِھرانواں ساکُوں تُہاڈی کوئی خبر ڈِتی، تے نہ ای تُہاڈے خلاف کُجھ آکھیا۔

²² پر اساں تُہاڈے خیال جاننڑاں چاہندے ہیں۔ ایہ تاں ساکُوں معلوم ہے جو لوک ہر جاہ اِیں فرقہ دے خلاف گالھیں کریندے ہِن۔“

²³ وَل اُنہاں پولُس دے گالھیں سُنڑݨ کیتے ہِک ڈینہہ مقرر کیتا۔ جِیں ویلے او ڈینہہ آیا تاں او پہلے کنُوں وی زیادہ تعداد ءچ اُوں گھر ءچ آئے جِتھاں او راہندا ہا۔ سویل تُوں گِھن تے شام تئیں پولُس اُنہاں کُوں سمجھا سمجھا تے خُدا دی بادشاہی دے بارے ءچ گواہی ڈِتی تے مُوسیٰ دی توریت تے نبیاں دے صحیفیاں ءچوں اُنہاں کُوں یسُوع دے بارے ءچ قائل کرݨ دی کوشش کیتی۔

²⁴ کُجھ اُوندے گالھیں سُنڑ تے قائل تھی گئے پر کُجھ نہ منے۔

²⁵ جِیں ویلے او آپس ءچ مُتفق نہ تھئے تاں پولُس اُنہاں دے روانہ تھیوݨ تُوں پہلے ایہ گالھ آکھی جو ”رُوح القُدس یسعیاہ نبی دی معرفت ساڈے پِیُو ڈاڈا دے بارے ءچ ٹھیک ای آکھیا ہا جو

²⁶ ’اِیں قوم دے کولھ وَنج تے آکھ جو تُساں سُنڑدے تاں راہسو پر سمجھ نہ سگسو، ڈیدھے تاں راہسو پر پچھاݨ نہ سگسو۔

²⁷ کیوں جو اِیں قوم دے دل اُتے چربی چڑھ گئی ہے۔ او اُچا سُنڑݨ لگے ہِن تے اُنہاں آپنڑے اکھیں بند کر گِھدیاں ہِن۔ کِتھائیں اِینویں نہ تھیوے جو او اکھیں کنُوں ڈیکھنڑ، تے کَناں نال سُنڑݨ، دل نال سمجھنڑ تے رجُوع گِھن آوݨ تے مَیں اُنہاں کُوں شِفا بخشاں۔‘

²⁸ اِیں واسطے مَیں چاہندا ہاں جو تُساں جاݨ گِھنو جو خُدا دی نجات دا پیغام غیریہُودیاں دے کولھ وی بھیجیا گِیا ہے تے او اُونکُوں سُنڑسن۔“

²⁹ [جِیں ویلے پولُس ایہ آکھیا تاں یہُودی آپس ءچ تکرار کریندے ہوئے اُتھوں چلے گئے۔]

³⁰ پولُس پُورے ڈُو سال تئیں آپنڑے کرایہ دے مکان ءچ ریہا تے جیہڑے اُوندے نال مُلاقات کرݨ آندے ہَن، اُنہاں ساریاں کُوں خوشی نال مِلدا ریہا۔

³¹ او بہُوں دلیری نال خُدا دی بادشاہی دی خوشخبری سُنڑیندا تے خُداوند یسُوع المسیح دے بارے ءچ تعلیم ڈیندا ریہا تے کہیں اُونکُوں روکنڑ دی کوشش نہ کیتی۔