اعمال 27 - کِتاب مُقدّس سرائیکی ترجمہ

پولُس دی جہاز ءچ روم کیتے روانگی

¹ جِیں ویلے ایہ فیصلہ تھیّا جو اساں جہاز ءچ اِطالِیہ ویسوں تاں پولُس تے کُجھ ڈُوجھے قیدی شہنشاہی پلٹن دے ہِک صوبہ دار دے سپُرد کر ڈِتے گئے جِیندا ناں یُولِیُس ہا۔

² اساں ادرمُتیُّم تُوں ہِک جہاز اُتے سوار تھی تے روانہ تھئے جیہڑا آسِیہ دی ساحلی بندرگاہاں کنُوں تھیندا ہویا اگُوں ونجنڑ آلا ہا تے تھِسّلُنِیکے دا ارِسترخُس مَکِدُنی ساڈے نال ہا۔

³ ڈُوجھے ڈینہہ جِیں ویلے جہاز صیدا ءچ کھڑا تھیّا تاں یُولِیُس مہربانی کر تے پولُس کُوں دوستاں نال مُلاقات کرݨ دی اِجازت ڈے ڈِتی تاں جو اُوندی خدمت تھی سگے۔

⁴ اُتھوں کنُوں ولا اساں جہاز اُتے روانہ تھئے تے کیوں جو ہوا ساڈے مخالف ہئی اِیں واسطے اساں [ہوا تُوں بچنڑ کیتے] کُپرُس دے شمال کنُوں لنگھے۔

⁵ وَل اساں کلکیہ تے پمفِیلیہ دے سمندر کنُوں لنگھ تے اگُوں ودھے تے لُوکیہ دے شہر مُورہ ءچ وَنج لتھے۔

⁶ صوبہ دار کُوں اُتھاں اِسکندرِیہ دا ہِک جہاز مِل گِیا جیہڑا اِطالِیہ ویندا پِیا ہا۔ بس ساکُوں اُوندے اُتے بِلھا ڈِتا۔

⁷ اساں بہُوں ڈینہاں تئیں ہولے ہولے اگُوں ودھدے ریہے تے مُشکل نال کَنِدُس دے سامنڑے پُجے پر تیز ہوا ساکُوں سِدھے اگُوں نہ ونجنڑ ڈِتا۔ وَل اساں ہوا تُوں بچنڑ کیتے سلمونے دے سامنڑے کنُوں تھی تے کریتے دے جنُوب کنُوں ٹُرے،

⁸ تے بہُوں مُشکل نال ساحل دے نال نال اگُوں ودھدے ہوئے حسِین ناں دی بندرگاہ ءچ پُجے جِتُھوں لَسَیہ شہر نزدیک ہا۔

⁹ سفر ءچ بہُوں ڈینہہ گُزر گئے ہَن تے ہُنڑ سمندری سفر بِیا وی خطرے آلا تھی گِیا کیوں جو روزہ دا ڈینہہ لنگھ گِیا ہا۔ پولُس اُنہاں کُوں نصیحت کر تے آکھیا،

¹⁰ ”بِھراؤ! میکُوں لگدے جو ساڈا سفر بہُوں نُقصان دہ ہوسی، نہ صرف مال اسباب تے جہاز بلکہ ساڈیاں جاناں کُوں وی خطرہ ہے۔“

¹¹ پر صوبہ دار پولُس دے گالھیں سُنڑݨ دی بجائے جہاز دے مالک تے اُوندے کپتان دے گالھیں کُوں زیادہ اہمیت ڈِتی۔

¹² کیوں جو او بندرگاہ سیالا گُزارݨ کیتے چنگی نہ ہئی اِیں واسطے ڈھیر لوکاں دا فیصلہ ایہ ہا جو اساں اگُوں ودُھوں تے جے تھی سگے تاں فِینِکس ءچ پُج تے سیالے دا موسم لنگھاؤں۔ ایہ کریتے دی ہِک بندرگاہ ہئی جِیندا رُخ شمال مشرق تے جنُوب مشرق دو ہا۔

سمندر ءچ طوفان

¹³ جِیں ویلے جنُوب کنُوں ہلکی ہلکی ہوا گُھلنڑ شروع تھی گئی تاں او سمجھے جو ”ہُنڑ ساڈا مقصد پُورا تھی سگدے۔“ اِیں واسطے اُنہاں لنگر چا تے جہاز ٹوریا تے کریتے دے ساحل دے نال نال اگُوں ودھے۔

¹⁴ پر تھوڑی دیر بعد ہِک طوفانی ہوا جیہڑی شمال مشرقی اکھویندی ہے، گُھل پئی۔

¹⁵ جِیں ویلے جہاز اُوندی گرفت ءچ آ گِیا تے اُوندا سامنڑا نہ کر سگیا، تاں اساں مجبور تھی تے جہاز کُوں ہوا نال واہنڑ ڈِتا۔

¹⁶ واہندے واہندے کوَدہ جزیرہ دے گھٹ ہوا آلے پاسے پُجے تاں اساں چھوٹی کشتی کُوں بہُوں مُشکل نال قابو ءچ کر سگے۔

¹⁷ تے جِیں ویلے جہاز چلاوݨ آلیاں اُونکُوں جہاز اُتے چڑھا گِھدا تاں جہاز کُوں تروٹنڑ کنُوں بچاوݨ کیتے اُونکُوں رسیاں نال بَدھ ڈِتا۔ اُنہاں کُوں ڈر ہا جو جہاز سُورتِس دے نیڑے ریت دیاں ٹِبیاں ءچ پَھس ویسی، اِیں واسطے اُنہاں لنگر کُوں سمندر ءچ سَٹ ڈِتا۔

¹⁸ ڈُوجھے ڈینہہ جِیں ویلے جہاز طوفانی ہوا ءچ بہُوں ای لوڈے کھاوݨ لگا تاں اُنہاں جہاز کُوں ہولا کرݨ کیتے مال سمندر ءچ سٹنڑ شروع کر ڈِتا۔

¹⁹ تریجھے ڈینہہ اُنہاں آپنڑے ای ہتھاں نال جہاز دا ضروری سامان وی سَٹ ڈِتا۔

²⁰ جِیں ویلے بہُوں ڈینہاں تئیں نہ تاں سِجھ ڈِٹھا نہ تارے تے شدید طوفان چلدا پِیا ہا تاں بچنڑ دی آخری اُمید وی ختم تھی گئی۔

²¹ بہُوں عرصے تُوں اُنہاں کُجھ نہ کھادا ہا تاں آخر کار پولُس اُنہاں دے اَدھ ءچ کھڑا تھی تے آکھیا، ”بِھراؤ! جے تُساں میڈی نصیحت منیندے تے کریتے کنُوں روانہ نہ تھیندے تاں ایہ نُقصان تے ڈُکھ نہ چیندے۔

²² پر ہُنڑ مَیں تُہاڈی مِنت کریندا ہاں جو حوصلہ نہ ہارو۔ تُساں ءچوں کہیں دا جانی نُقصان نہ تھیسی پر فقط جہاز دا۔

²³ کیوں جو خُدا جِیندا مَیں بندہ ہاں تے جیندی مَیں عبادت وی کریندا ہاں، اُوندا فرشتہ اِیں رات میڈے کولھ آیا،

²⁴ تے آکھنڑ لگا، ’پولُس! اصلُوں نہ ڈر۔ تُوں رومی بادشاہ قیصر دے حضُور لازمی پیش تھیسیں تے تیڈی خاطر خُدا اُنہاں ساریاں دی جان بخش ڈِتی ہے جیہڑے جہاز اُتے تیڈے نال سفر کریندے پئے ہِن۔‘

²⁵ اِیں واسطے صاحبو! تُساں آپنڑا حوصلہ وڈا رکھو۔ میڈا اِیمان ہے جو اُوہو کُجھ تھیسی جیہڑا میڈے خُدا میکُوں فرمائے۔

²⁶ پر اساں ضرور کہیں جزیرے اُتے وَنج پُجسوں۔“

²⁷ چوڈھویں رات کُوں جِیں ویلے اساں بحر ِادریہ ءچ اِڈے اُڈے ٹکریندے ودے ہسے تاں ادھی رات دے نیڑے جہاز چلاوݨ آلیاں محسوس کیتا جو او کنارے دے نیڑے پُجدے پئے ہِن۔

²⁸ اُنہاں پانڑی دی گہرائی ناپی تاں او اسّی ہتھ ہئی۔ وَل تھوڑا اگُوں وَنج تے ناپی تاں سَٹھ ہتھ ہئی۔

²⁹ اِیں ڈر کنُوں جو کِتھائیں چٹاناں نال ٹکرا ونجے، اُنہاں جہاز دے پِچھلے حصہ کنُوں چار لنگر سمندر ءچ سَٹ ڈِتے تے سویل تھیوݨ کیتے دُعا کرݨ لگے۔

³⁰ جہاز چلاوݨ آلیاں جہاز تُوں بھج نِکلنڑ کیتے چھوٹی کشتی کُوں تلے لہایا پر ظاہر ایہ کیتا جو او جہاز دے اگُوں آلے حصہ کنُوں پانڑی ءچ لنگر سٹنڑ چاہندے ہَن۔

³¹ تاں پولُس صوبہ دار تے سپاہیاں کُوں آکھیا، ”جے ایہ لوک جہاز اُتے نہ راہسن تاں تُساں نئیں بچ سگدے۔“

³² اِیں واسطے سپاہیاں کشتی دیاں رسیاں کپ ڈِتیاں تے اُونکُوں سمندر ءچ چھوڑ ڈِتا۔

³³ سویل تھیوݨ کنُوں ذرا پہلے پولُس ساریاں دی مِنت کیتی جو کُجھ کھا گِھنو تے آکھیا جو ”پِچھلے چوڈھاں ڈینہہ تُوں تُساں لوک فِکر کریندے کریندے کھانڑے کُوں ہتھ تئیں نئیں لایا۔

³⁴ ہُنڑ مَیں تُہاڈی مِنت کریندا ہاں جو کُجھ کھا گِھنو، کیوں جو تُہاڈے بچنڑ کیتے ایہ ضروری ہے۔ تے یقین رکھو جو تُساں ءچوں کہیں دا وی کُجھ نُقصان نہ تھیسی۔“

³⁵ ایہ آکھ تے پولُس کُجھ روٹی گِھدی تے ساریاں دے سامنڑے خُدا دا شُکر کیتا تے اُونکُوں تروڑ تے کھاوݨ لگا۔

³⁶ اِیندے نال ساریاں دا حوصلہ ودھیا تے او وی کھاوݨ لگے۔

³⁷ اساں سارے ڈُو سو چھہتر بندے ہسے جیہڑے اُوں جہاز اُتے سوار ہَن۔

³⁸ جِیں ویلے اُنہاں پیٹ بھر تے کھا گِھدا تاں اُنہاں ساریاں دانڑیاں کُوں سمندر ءچ سَٹ ڈِتا، تاں جو جہاز ہولا تھی ونجے۔

جہاز دی تباہی

³⁹ جِیں ویلے ڈینہہ نِکلیا تاں اُنہاں اُوں مُلک کُوں نہ سُنجانڑیا، پر ہِک ساحل ڈِٹھا جِیندا کنارہ صاف ہا۔ اُنہاں صلاح کیتی جو جے ممکن ہووے تاں جہاز کُوں اُوندے اُتے چڑھا گِھنوں۔

⁴⁰ بس لنگر کھول تے سمندر ءچ چھوڑ ڈِتے تے جہاز دا رُخ بدلنڑ آلے چپُوواں دیاں رسیاں وی کھول ڈِتیاں۔ سامنڑے دا پڑدہ کھول تے اُتے چڑھا ڈِتا تے کنارے دو ودھے۔

⁴¹ پر جہاز ایجھی جاہ تے وَنج پِیا جِتھاں ڈوہائیں پاسُوں سمندر دا زور ہا۔ جہاز سُکی جاہ اُتے پُج تے ریت اُتے وَنج ٹِکیا۔ اُوندے اگُوں آلا حصہ تاں ریت ءچ دَھس گِیا پر پِچھلا حصہ چھلاں دے زور نال تِڑکنڑ لگا۔

⁴² سپاہیاں دی صلاح ہئی جو قیدیاں کُوں مار سٹنڑ کِتھائیں اِینویں نہ تھیوے جو اُنہاں ءچوں کوئی تیر تے بھج ونجے۔

⁴³ پر صوبہ دار پولُس دی زندگی بچاوݨ کیتے اُنہاں کُوں اِیں اِرادے تُوں روک ڈِتا تے حُکم ڈِتا جو جیہڑے تیر سگدے ہِن او پہلے سمندر ءچ ٹپّا مار تے خشکی اُتے پُج ونجنڑ۔

⁴⁴ تے باقی لکڑ دے پھٹیاں اُتے تے جہاز دیاں بنڑیاں چیزاں دی مدد نال آپنڑی جان بچاوݨ۔ بس اِیں طرحاں سارے دے سارے خشکی اُتے سلامت پُج گئے۔