اعمال 24 - کِتاب مُقدّس سرائیکی ترجمہ

فیلِکس دے سامنڑے پولُس دے خلاف مقدمہ

¹ پنج ڈینہہ بعد کاہِن ِ اعظم حننیاہ، کُجھ بزُرگاں تے تِرطُلُس وکیل نال قیصریہ پُجیا تے گورنر دے حضُور ءچ پولُس دے خلاف فریاد کیتی۔

² جِیں ویلے پولُس حاضر کیتا گِیا تاں تِرطُلُس اُوندے اُتے اِلزام لا تے آکھیا، ”معزز فیلِکس! اساں تُہاڈے سببّوں بہُوں امن نال زندگی گُزریندے پئے ہیں تے تُساں آپنڑی دُور اندیشی نال اِیں قوم دے فائدے کیتے چنگیاں تبدیلیاں کیتیاں ہِن۔

³ اساں ہر جاہ تے ہر ویلے تُہاڈیاں مہربانیاں دی وجہ تُوں تُہاڈے بہُوں شُکر گُزار ہیں۔

⁴ ہُنڑ تُہاکُوں تکلیف ڈِتے بغیر درخاست کریندا ہاں جو مہربانی نال ساڈے ہِک ڈُو گالھیں سُنڑ گِھنو۔

⁵ اساں ڈِٹھے جو ایہ بندہ بہُوں خطرناک ہے۔ ایہ دُنیا دے سارے یہُودیاں ءچ فساد پیدا کریندے تے ناصری دے بِدعتی فرقہ دا راہنما ہے۔

⁶ اِینیں تاں ہیکل کُوں وی ناپاک کرݨ دی کوشش کیتی ہئی۔ اِیں واسطے اساں اِینکُوں پکڑ گِھدے۔ [اساں آپنڑی شریعت دے مطابق اِیندے اُتے مقدمہ چلاوݨ چاہندے ہسے۔

⁷ پر پلٹن دا سپہ سالار لُوسِیاس اُونکُوں ساڈے ہتھاں ءچوں زبردستی کَھس تے گِھن گِیا،

⁸ تے اِلزام لاوݨ آلیاں کُوں تُہاڈے کولھ ونجنڑ دا حُکم ڈِتا۔] اِیندی تفتیش کر تے تُہاکُوں اُنہاں اِلزاماں دی حقیقت معلوم تھی ویسی جیہڑے اساں اِیندے اُتے لائے ہِن۔“

⁹ یہُودی وی وکیل نال رَل تے آکھنڑ لگے جو ”ایہ گالھیں بالکل سچ ہِن۔“

پولُس آپنڑی صفائی پیش کریندے

¹⁰ جِیں ویلے گورنر پولُس کُوں بولنڑ دا اِشارہ کیتا تاں اُوں جواب ڈِتا، ”کیوں جو مَیں جانڑدا ہاں جو تُساں بہُوں سالاں تُوں اِیں قوم دی عدالت کریندے ہیوے، اِیں واسطے مَیں خوشی نال آپنڑی صفائی پیش کریندا ہاں۔

¹¹ تُساں خود پتہ کر سگدے ہیوے جو بارہاں ڈینہہ پہلے مَیں یروشلیم ءچ عبادت کرݨ گِیا ہم۔

¹² میڈے اُتے اِلزام لاوݨ آلیاں میکُوں ہیکل ءچ کہیں نال وی بحث کریندے یا عبادت خانیاں ءچ یا اِڈے اُڈے شہر ءچ فساد کریندے نئیں ڈِٹھا۔

¹³ ہُنڑ او اِنہاں اِلزاماں کُوں جیہڑے او میڈے اُتے لیندے پئے ہِن، تُہاڈے سامنڑے ثابت نئیں کر سگدے۔

¹⁴ پر مَیں تُہاڈے سامنڑے اِقرار کریندا ہاں جو مسیح دی راہ جِینکُوں او بِدعت قرار ڈیندے ہِن اُوندے مطابق مَیں آپنڑے پِیُو ڈاڈا دے خُدا دی عبادت کریندا ہاں تے جیہڑا کُجھ توریت تے نبیاں دے صحائف ءچ لِکھیا ہے اُنہاں ساریاں اُتے میڈا اِیمان ہے۔

¹⁵ مَیں وی خُدا تُوں اُوہو اُمید رکھیندا ہاں جیہڑی ایہ رکھیندے ہِن جو راستباز تے ناراست ڈوہائیں دی قیامت تھیسی۔

¹⁶ اِیں واسطے میڈی تاں اِیہو کوشش راہندی ہے جو خُدا تے اِنسان ڈوہائیں دے سامنڑے میڈی نیّت نیک راہوے۔

¹⁷ بہُوں سالاں بعد مَیں آپنڑی قوم کُوں خیرات پُچاوݨ تے خُدا کُوں نذرانے پیش کرݨ کیتے یروشلیم آیا ہم۔

¹⁸ جِیں ویلے اُنہاں میکُوں ہیکل ءچ ایہ کم کریندے ڈِٹھا تاں مَیں طہارت دی حالت ءچ ہم۔ نہ کوئی ہنگامہ ہا تے نہ کوئی فساد۔ ہا، آسِیہ دے کُجھ یہُودی ہَن۔

¹⁹ جے اُنہاں کُوں کوئی شکایت ہئی تاں اُنہاں کُوں اِتھاں تُہاڈے کولھ حاضر تھی تے میڈے اُتے اِلزام لاوݨ چاہیدا ہا۔

²⁰ یا ایہ لوک جیہڑے اِتھاں موجود ہِن ڈساوݨ جو جِیں ویلے مَیں صدر ِ عدالت ءچ پیش تھیّا ہم تاں اُنہاں میڈے ءچ کیا بُرائی ڈِٹھی ہئی؟

²¹ سوائے اِیں ہِک گالھ دے جیہڑی مَیں اُچی اواز ءچ آکھی ہئی جو اَج تُہاڈے سامنڑے میڈے اُتے مُردیاں دی قیامت دے بارے ءچ مقدمہ کیتا گِیا ہے۔“

²² وَل فیلِکس جیہڑا مسیح دی راہ دے بارے ءچ چنگی طرحاں جانڑدا ہا، ایہ آکھ تے مقدمہ ملتوی کر ڈِتا جو ”جِیں ویلے پلٹن دا سپہ سالار لُوسِیاس اِتھاں آسی تاں مَیں تُہاڈے مقدمہ دا فیصلہ کریساں۔“

²³ تے صوبہ دار کُوں حُکم ڈِتا جو پولُس کُوں پہرے ءچ تاں رکھیا ونجے پر زیادہ سختی نہ کیتی ونجے تے اِیندے ساتھیاں ءچوں کہیں کُوں اُوندی خدمت کرݨ تُوں منع نہ کیتا ونجے۔

پولُس فیلِکس تے دُروسِلہ دے سامنڑے

²⁴ کُجھ ڈینہاں بعد فیلِکس آپنڑی ذال دُروسِلہ کُوں جیہڑی یہُودی ہئی نال گِھن تے آیا۔ اُوں پولُس کُوں سڈوا بھیجیا تے یسُوع مسیح اُتے اِیمان گِھن آوݨ دے بارے ءچ اُوندے گالھیں سُنڑیاں۔

²⁵ جِیں ویلے او راستبازی، پرہیزگاری تے آوݨ آلی عدالت دے بارے ءچ بیان کریندا پِیا ہا تاں فیلِکس ڈر تے آکھنڑ لگا، ”اجنڑ ایہ بہُوں ہے، تُوں وَنج سگدیں۔ جڈاں میکُوں فُرصت مِلسی تاں مَیں تیکُوں ولا سڈوا گِھنساں۔“

²⁶ فیلِکس کُوں پولُس دی طرفوں پیسے مِلنڑ دی اُمید وی ہئی، اِیں واسطے او اُونکُوں ولا ولا سڈویندا تے اُوندے نال گالھیں کریندا ہا۔

²⁷ ڈُو سالاں بعد فیلِکس دی جاہ پُرکِیُس فیستُس گورنر مقرر تھیّا تے فیلِکس خود کُوں یہُودیاں دا خیر خواہ ثابت کرݨ کیتے پولُس کُوں قید ءچ ای چھوڑ گِیا۔