اعمال 23 - کِتاب مُقدّس سرائیکی ترجمہ

¹ پولُس عدالت دے ارکان کُوں غور نال ڈیکھ تے آکھیا، ”میڈے بِھراؤ! مَیں اَج تئیں بہُوں نیک نیّتی نال خُدا دے حُکماں دے مطابق زندگی گُزریندا ریہا ہاں۔“

² اِیندے تے کاہِن ِ اعظم حننیاہ اُوندے کولھ کھڑے لوکاں کُوں حُکم ڈِتا جو اُوندے مُنہ اُتے چاٹ مارو۔

³ پولُس اُونکُوں آکھیا، ”سفیدی تھئی ہوئی کندھ! خُدا تیکُوں مریسی۔ تُوں اِتھاں شریعت دے مطابق میڈا اِنصاف کرݨ کیتے بیٹھیں پر تُوں خود شریعت دے خلاف میکُوں مارݨ دا حُکم ڈیندیں؟“

⁴ جیہڑے نال کھڑے ہَن آکھنڑ لگے، ”تیکُوں خُدا دے کاہِن ِ اعظم کُوں بُرا آکھنڑ دی جُرأت کِینویں تھئی؟“

⁵ پولُس آکھیا، ”بِھراؤ! میکُوں معلوم نہ ہا جو ایہ کاہِن ِ اعظم ہے، کیوں جو لِکھیا ہے جو تُوں آپنڑی قوم دے سردار کُوں بُرا نہ آکھ۔“

⁶ جِیں ویلے پولُس کُوں پتہ لگیا جو اُنہاں ءچوں کُجھ صدوقی ہِن تے کُجھ فریسی تاں اُوں عدالت ءچ اُچی اواز ءچ آکھیا، ”بِھراؤ! مَیں فریسی ہاں تے فریسی پِیُو دا پوتر ہاں۔ میڈے اُتے اِیں واسطے مقدمہ چلایا ویندا پئے جو مَیں اُمید رکھیندا ہاں جو مُردے وَل زندہ تھیسن۔“

⁷ اُوندے ایہ آدھے ای فریسیاں تے صدوقیاں ءچ تکرار شروع تھی گئی تے حاضرین ءچ پُھٹ پے گئی۔

⁸ کیوں جو صدوقی تاں آدھے ہَن جو قیامت نہ تھیسی تے نہ ای فرشتے کوئی چیز ہِن نہ رُوح، پر فریسی اِنہاں سبھ کُوں منیندے ہِن۔

⁹ بس اُتھاں ہنگامہ تھی گِیا، تے فریسیاں ءچوں کُجھ شریعت دے عالم کھڑے تھی گئے تے جھیڑا کر تے آکھنڑ لگے جو ”اساں اِیں بندے ءچ کوئی قصُور نئیں ڈیدھے تے جے کہیں فرشتے یا رُوح اِیندے نال گالھ کیتی ہے تاں کیا تھیّا؟“

¹⁰ تے جِیں ویلے جھیڑا ودھ گِیا تاں پلٹن دے سپہ سالار کُوں اِیں گالھ دا ڈر لگیا جو پولُس دے ٹوٹے ٹوٹے نہ کر ڈِتے ونجنڑ، اِیں واسطے اُوں فوجیاں کُوں حُکم ڈِتا جو ”تلے ونجنڑ تے اُونکُوں اُتھوں زبردستی کڈھ تے قلعہ ءچ گِھن آوݨ۔“

¹¹ اُونہی رات خُداوند پولُس دے کولھ آ کھڑا تھیّا تے آکھیا، ”حوصلہ رکھ، جِینویں تَیں یروشلیم ءچ میڈی گواہی ڈِتی ہے، اُونویں ای تیکُوں روم ءچ گواہی ڈیونڑی پوسی۔“

پولُس کُوں قتل کرݨ دی سازش

¹² سویل نال یہُودیاں رَل تے فیصلہ کیتا تے لعنت دی قَسم کھادی جو ”جیہڑے ویلے تئیں اساں پولُس کُوں مار نہ گھتوں، اُوں ویلے تئیں نہ کُجھ کھاسوں، نہ کُجھ پِیسوں۔“

¹³ اِیں سازش ءچ چالیہہ بندیاں تُوں زیادہ شریک ہَن۔

¹⁴ بس او سردار کاہِناں تے بزُرگاں دے کولھ گئے تے آکھنڑ لگے جو ”اساں لعنت دی قَسم کھادی ہے جو پولُس کُوں قتل کرݨ تُوں پہلے کُجھ نہ کھاسوں۔

¹⁵ بس ہُنڑ تُساں صدر ِ عدالت آلیاں نال رَل تے پلٹن دے سپہ سالار کُوں درخاست کرو جو پولُس کُوں تُہاڈے سامنڑے گِھن آوے تاں جو اُوندے مقدمہ دی حقیقت مزید پُچھی ونجے۔ اُوندے اِتھاں پُجنڑ کنُوں پہلے اساں اُونکُوں قتل کر ڈیوݨ کیتے تیار ہیں۔“

¹⁶ پر جِیں ویلے پولُس دے بھڑینجے کُوں اِیں سازش دا پتہ چلیا تاں اُوں قلعہ ءچ وَنج تے پولُس کُوں خبر ڈِتی۔

¹⁷ وَل پولُس ہِک صوبہ دار کُوں سڈوایا تے آکھیا جو ”اِیں نوجوان کُوں پلٹن دے سپہ سالار دے کولھ گِھن وَنج کیوں جو ایہ اُونکُوں کُجھ ڈساوݨ چاہندا ہے۔“

¹⁸ بس او اُونکُوں پلٹن دے سپہ سالار دے کولھ گِھن گِیا تے آکھنڑ لگا، ”پولُس قیدی میکُوں سڈیا تے میکُوں درخاست کیتی جو اِیں جوان کُوں تُہاڈے کولھ گِھن آواں کیوں جو ایہ تُہاکُوں کُجھ ڈساوݨ چاہندے۔“

¹⁹ پلٹن دا سپہ سالار اُوں جوان دا ہتھ پکڑ تے اُونکُوں اَنج گِھن گِیا تے پُچھنڑ لگا، ”تُوں میکُوں کیا ڈساونڑا چاہندا ہیں؟“

²⁰ اُوں آکھیا، ”یہُودیاں ایکا کر تے تُہاکُوں درخاست کرݨ دا فیصلہ کیتا ہے جو تُساں پولُس کُوں مزید تفتیش کیتے کل صدر ِ عدالت دے سامنڑے گِھن آؤ۔

²¹ پر تُساں اُنہاں دی گالھ نہ منائے کیوں جو اُنہاں ءچوں چالیہہ تُوں زیادہ اُوندے اُتے حملہ کرݨ دی تاڑ ءچ ہِن، جِنہاں قَسم کھادی ہے جو پولُس کُوں قتل کیتے بغیر نہ تاں اساں کُجھ کھاسوں تے نہ ای کُجھ پِیسوں تے ہُنڑ او تیار ہِن۔ صرف تُہاڈے فیصلے دا اِنتظار ہے۔“

²² بس سپہ سالار اُوں نوجوان کُوں ایہ حُکم ڈے تے بھیج ڈِتا جو ”اِنہاں گالھیں دا جیہڑیاں تَیں میکُوں ڈسائیاں، کہیں کُوں پتہ نہ لگے۔“

پولُس کُوں فیلِکس حاکم دے کولھ بھیجیا ویندے

²³ سردار آپنڑے ڈُو صوبہ داراں کُوں سڈوا تے آکھیا، ”پلٹن دے ڈُو سو سپاہی، ستّر گُھڑ سوار تے ڈُو سو نیزہ بردار رات دے نؤں وجے قیصریہ ونجنڑ کیتے تیار رکھائے۔“

²⁴ وَل حُکم ڈِتا جو پولُس کیتے سواری دا اِنتظام کیتا ونجے تاں جو او گورنر فیلِکس کولھ حفاظت نال پُج ونجے۔

²⁵ تے اُوں ہِک خط اِیں موضوع دا لِکھیا۔

²⁶ کلَودِیُس لُوسِیاس دی طرفوں معزز گورنر فیلِکس کُوں سلام۔

²⁷ اِیں بندے کُوں یہُودی پکڑ تے مارݨ آلے ای ہَن جو مَیں سپاہیاں کُوں گِھن گِیا تے اُونکُوں چُھڑوا گِھدا کیوں جو میکُوں معلوم تھیّا ہا جو او ہِک رومی شہری ہے۔

²⁸ مَیں پتا کرݨ چاہندا ہم جو او اُوندے اُتے کیا اِلزام لیندے پئے ہِن، اِیں واسطے مَیں اُونکُوں اُنہاں دی صدر ِ عدالت ءچ پیش کیتا۔

²⁹ تے پتہ لگیا جو اُنہاں دا اِلزام اُنہاں دی شریعت دے مسئلیاں نال تعلق رکھیندے پر اُوندے خلاف ایجھا کوئی اِلزام نئیں جیندی وجہ تُوں اُونکُوں موت یا قید دی سزا ڈِتی ونجے۔

³⁰ جِیں ویلے میکُوں خبر تھئی جو اُوندے خلاف کوئی سازش تھیندی پئی ہے تاں مَیں اِینکُوں فوراً تُہاڈے کولھ بھیج ڈِتا تے اُوندے اُتے اِلزام لاوݨ آلیاں کُوں حُکم ڈِتا جو او تُہاڈے حضُور ءچ آ تے آپنڑا مقدمہ پیش کرݨ۔

³¹ بس سپاہی اُوندے حُکم دے مطابق پولُس کُوں آپنڑے نال گِھن گئے تے اُوں رات ای اُنہاں کُوں انتیپترِس ءچ پُچا ڈِتا۔

³² ڈُوجھے ڈینہہ او گُھڑ سواراں کُوں اُنہاں نال اگُوں ونجنڑ کیتے چھوڑ تے خود قلعہ دو وَل گئے۔

³³ جِیں ویلے گُھڑ سوار قیصریہ پُجے تاں اُنہاں گورنر کُوں خط ڈے تے پولُس کُوں اُوندے حضُور ءچ پیش کر ڈِتا۔

³⁴ گورنر خط پڑھ تے پُچھیا، ”ایہ کیہڑے صوبے دا ہے؟“ تے ایہ معلوم کر تے جو کلکیہ دا ہے

³⁵ تاں اُونکُوں آکھیا، ”مَیں تیڈا مقدمہ اُوں ویلے سُنڑساں جِیں ویلے تیڈے مُدعی وی اِتھاں حاضر ہوسن۔“ وَل اُوں پولُس کُوں ہیرودیس دے قلعہ ءچ قید رکھنڑ دا حُکم ڈِتا۔