اعمال 22 - کِتاب مُقدّس سرائیکی ترجمہ

¹ ”بِھراؤ تے بزُرگو، ہُنڑ میڈے گالھیں سُنڑو جیہڑیاں مَیں آپنڑے دفاع ءچ اکھیندا ہاں۔“

² جِیں ویلے لوکاں اُونکُوں عبرانی بُولیندے سُنڑیا تاں بِیا وی چُپ تھی گئے۔ وَل اُوں آکھیا،

³ ”مَیں یہُودی ہاں تے کلکیہ دے شہر تَرسُس ءچ پیدا تھیّا، پر میڈی تربیت اِیں شہر ءچ گملی ایل دے پیراں ءچ تھئی۔ مَیں پِیُو ڈاڈا دی شریعت اُتے پابندی نال عمل کرݨ دی تعلیم گِھدی۔ مَیں خُدا کیتے ایجھا جوشیلا ہم جِینویں اَج تُساں ہیوے۔

⁴ مَیں مسیح دی راہ اُتے چلنڑ آلیاں کُوں ستایا، ایہ تئیں جو قتل وی کیتا۔ مَیں مرداں تے عورتاں ڈوہائیں کُوں بَدھ بَدھ تے قید خانہ ءچ سٹوا ڈِتا۔

⁵ کاہِن ِ اعظم تے سارے بزُرگ میڈے گواہ ہِن جو بِھرانواں کیتے مَیں اُنہاں کنُوں خط گِھدے تے دمشق دو روانہ تھیّا جو اِیں راہ اُتے ٹُرݨ آلے جِتّی اُتھاں ہووݨ، اُنہاں کُوں وی بَدھ تے یروشلیم گِھن آواں تے سزا ڈیواں۔

پولُس آپنڑے اِیمان گِھن آوݨ دا ڈسیندے

⁶ مَیں جِیں ویلے سفر کریندا کریندا دمشق دے نیڑے پُجیا تاں ڈوپہر ویلے اسمان کنُوں ہِک تیز روشنی آئی تے میڈے چودھارُوں چمکنڑ لگ پئی۔

⁷ مَیں زمین اُتے ڈھے پِیا تے ہِک اواز سُنڑی جیہڑی میکُوں آدھی پئی ہئی، ’ساؤل! ساؤل! تُوں میکُوں کیوں سَتیندیں؟‘

⁸ مَیں پُچھیا، ’اے خُداوند! تُساں کوݨ ہیوے؟‘ اُوں آکھیا، ’مَیں یسُوع ناصری ہاں جِینکُوں تُوں سَتیندیں۔‘

⁹ جیہڑے میڈے نال ہَن اُنہاں روشنی تاں ڈِٹھی پر میڈے نال گالھیں کرݨ آلی اواز نہ سُنڑی۔

¹⁰ مَیں پُچھیا، ’اے خُداوند! مَیں کیا کراں؟‘ خُداوند میکُوں آکھیا، ’اُٹھی دمشق وَنج، اُتھاں تیکُوں او سارا کُجھ جیہڑا تیڈے کرݨ کیتے مقرر تھیّا ہے ڈسا ڈِتا ویسی۔‘

¹¹ اُوں نُور دے جلال دی وجہ کنُوں میکُوں کُجھ ڈِکھالی نہ ڈِتا، اِیں واسطے میڈے ساتھی میڈا ہتھ پکڑ تے میکُوں دمشق گِھن گئے۔

¹² اُتھاں حننیاہ ناں دا ہِک بندہ جیہڑا شریعت دا سخت پابند تے اُتھوں دے یہُودیاں ءچ بہُوں نیک ناں ہا،

¹³ میڈے کولھ آ تے آکھنڑ لگا، ’بِھرا ساؤل! وَل سُجاکھا تھی وَنج۔‘ مَیں اُونہی ویلے سُجاکھا تھی گِیا تے اُونکُوں ڈیکھنڑ لگا۔

¹⁴ وَل اُوں آکھیا جو ’ساڈے پِیُو ڈاڈا دے خُدا تیکُوں چُنڑ گِھدے تاں جو تُوں اُوندی مرضی کُوں جانڑیں تے اُوں راستباز کُوں ڈیکھیں تے اُوندے مُنہ دے گالھیں سُنڑیں۔

¹⁵ کیوں جو تُوں سارے لوکاں دے سامنڑے اُنہاں گالھیں دی جیہڑیاں تَیں سُنڑیاں تے ڈِٹھیاں ہِن، گواہی ڈیسیں۔

¹⁶ ہُنڑ کیجھی دیر؟ اُٹھی بپتسمہ گِھن، تے اُوندا ناں گِھن تے آپنڑے گُناہ دھو گِھن۔‘

پولُس کُوں غیر قوماں ءچ منادی کرݨ دی بُلاہٹ

¹⁷ جِیں ویلے مَیں یروشلیم وَل آیا تے ہیکل ءچ دُعا کریندا پِیا ہم تاں مَیں بے خود تھی گِیا۔

¹⁸ مَیں خُداوند کُوں ڈِٹھا تے ایہ آدھے سُنڑیا جو ’جلدی کر تے فوراً یروشلیم ءچوں نِکل وَنج کیوں جو او میڈے بارے ءچ تیڈی گواہی قبول نہ کریسن۔‘

¹⁹ مَیں جواب ڈِتا، ’اے خُداوند! ایہ لوک جانڑدے ہِن جو مَیں ہر ہِک عبادت خانہ ءچ ویندا ہم تے کِینویں تیڈے مننڑ آلیاں کُوں قید کرویندا تے کُٹویندا ہم۔

²⁰ تے جِیں ویلے تیڈے شہید ستِفُنس دا خون وہایا ویندا پِیا ہا تاں مَیں وی اُتھائیں موجود ہم تے اُوندے قتل اُتے راضی تے اُونکُوں قتل کرݨ آلیاں دے کپڑیاں دی حفاظت کریندا پِیا ہم۔‘

²¹ خُداوند میکُوں آکھیا، ’وَنج مَیں تیکُوں غیر قوماں دے کولھ بہُوں دُور بھجیساں‘۔“

²² بِھیڑ اِیں گالھ تئیں تاں پولُس دی سُنڑدی ریہی۔ وَل اُچی اواز نال آکھنڑ پے گئی جو ایجھے بندے کُوں زمین تُوں ختم کر ڈے۔ او زندہ راہنڑ دے لائق نئیں۔

²³ جِیں ویلے او چیخدے تے آپنڑے کپڑے سٹیندے تے دھُوڑ اُڈیندے ہَن،

²⁴ تاں پلٹن دے سپہ سالار پولُس کُوں قلعہ دے اندر گِھن ونجنڑ دا حُکم ڈِتا تے آکھیا جو ”اُونکُوں کوڑے مارو تے اُوندا بیان گِھنو تاں جو میکُوں پتہ لگے جو ایہ لوک اُوندے اُتے کیوں اِینویں چیخدے پئے ہِن۔“

²⁵ جِیں ویلے او کوڑے لاوݨ کیتے پولُس کُوں بدھنڑ لگے تاں اُوں، اُوں رومی افسر کُوں جیہڑا نال ای کھڑا ہا آکھیا، ”کیا ہِک رومی شہری کُوں اُوندا جُرم ثابت کیتے بغیر کوڑیاں نال مارݨ جائز ہے؟“

²⁶ صوبہ دار ایہ سُنڑیا تاں او پلٹن دے سپہ سالار دے کولھ گِیا تے اُنہاں کُوں خبر ڈے تے آکھیا، ”تُساں کیا کریندے ہیوے؟ ایہ بندہ تاں رومی ہے۔“

²⁷ پلٹن دے سپہ سالار پولُس دے کولھ آ تے پُچھیا، ”میکُوں ڈسا، کیا تُوں رومی ہیں؟“ اُوں آکھیا، ”ہاں۔“

²⁸ پلٹن دے سپہ سالار آکھیا، ”مَیں تاں ہِک بہُوں وڈی رقم ڈے تے رومی شہریت گِھدی ہئی۔“ پولُس آکھیا، ”مَیں تاں جماندرُو رومی ہاں۔“

²⁹ جیہڑے سپاہی اُوندا بیان گِھننڑ آلے ہَن، او فوراً پِچھاں ہٹ گئے تے پلٹن دا سپہ سالار وی ایہ جاݨ تے گھبرا گِیا جو جِینکُوں مَیں بدھیا ہویا ہے او رومی ہے۔

پولُس دی صدر ِ عدالت ءچ پیشی

³⁰ ڈُوجھے ڈینہہ پلٹن دے سپہ سالار پولُس کُوں کھول ڈِتا تے ایہ حقیقت جانڑن کیتے جو یہُودی اُوندے اُتے کیوں اِلزام لیندے ہِن، سردار کاہِناں تے یہُودیاں دی صدر ِ عدالت کُوں جمع تھیوݨ دا حُکم ڈِتا۔ وَل پولُس کُوں تلے گِھن وَنج تے سامنڑے کھڑا کر ڈِتا۔