اعمال 20 - کِتاب مُقدّس سرائیکی ترجمہ

مَکِدُنیہ تے اَخیہ ءچ پولُس دا دورہ

¹ جِیں ویلے افراتفری ختم تھی گئی تاں پولُس شاگرداں کُوں سڈ تے نصیحت کیتی تے اُنہاں کنُوں رُخصت تھی تے مَکِدُنیہ کیتے روانہ تھی گِیا۔

² تے اُوں علاقے کنُوں لنگھدے ہوئے اِیمانداراں کُوں بہُوں نصیحت کر تے یُونان پُجیا،

³ جِتھاں او ترے مہینے تئیں ریہا۔ جِیں ویلے او جہاز ءچ سُوریہ ونجنڑ آلا ہا تاں یہُودیاں اُوندے خلاف سازش کیتی۔ اِیں واسطے اُوں اِرادہ کیتا جو مَکِدُنیہ ءچوں تھی تے واپس چلیا ونجے۔

⁴ کُجھ لوک یعنی پُرس دا پوتر سوپَترُس جیہڑا بیرِیہ دا ہا تے ارِسترخُس تے سِکُندُس جیہڑے تھِسّلُنِیکے دے ہَن تے گِیُس جیہڑا دِربے دا ہا تے تِیمُتِھیُس، تے آسِیہ صوبے دے تخِکُس تے ترُفِمُس، اُوندے نال ہَن۔

⁵ ایہ اگُوں روانہ تھئے تے تروآس ءچ ساڈا اِنتظار کریندے ریہے۔

⁶ پر اساں بے خمیری روٹی دی عید دے بعد فِلپی کنُوں جہاز ءچ روانہ تھئے تے پنج ڈینہہ بعد تروآس ءچ اُنہاں کُوں وَنج مِلے تے سَت ڈینہہ تئیں اُتھائیں ریہے۔

پولُس دا تروآس دا آخری دورہ

⁷ ہفتے دے پہلے ڈینہہ جِیں ویلے اساں خُداوند دی یادگاری ءچ روٹی تروڑن کیتے کٹھے تھئے تاں پولُس لوکاں نال گالھ کرݨ لگا۔ اُوں ڈُوجھے ڈینہہ اُتھوں کنُوں روانہ تھیونڑا ہا، اِیں واسطے او رات دیر تئیں کلام کریندا ریہا۔

⁸ جِیں چوبارے ءچ اساں کٹھے ہسے، اُوندے ءچ بہُوں سارے ڈیوے بلدے پئے ہَن۔

⁹ تے یُوتخُس ناں دا ہِک نوجوان کِھڑکی ءچ بیٹھا ہا۔ جڈاں پولُس دیر تئیں گالھیں کریندا ریہا تاں او سُنڑدے سُنڑدے سَم گِیا تے ڈاڈھی نیندر ءچ تریجھی منزل تُوں تلے وَنج ڈھٹھا۔ جِیں ویلے اُونکُوں چاتا گِیا تاں او مویا پِیا ہا۔

¹⁰ پولُس تلے لتھا تے اُوں نوجوان نال وَلھٹیج گِیا تے اُونکُوں آپنڑے باہیں ءچ گِھن تے آکھنڑ لگا، ”گھبراؤ نہ، اِیندے ءچ جان ہے۔“

¹¹ وَل اُوں، اُتے وَنج تے روٹی تروڑی تے ساریاں نال رَل تے کھادی۔ وَل او سوجھلا تھیوݨ تئیں اُنہاں نال گالھیں کرݨ تُوں بعد اُتھوں کنُوں روانہ تھی گِیا۔

¹² لوک اُوں نوجوان کُوں زندہ گھر گِھن گئے تے اُنہاں کُوں بہُوں تسلی تھئی۔

تروآس تُوں مِیلیتُس آونڑاں

¹³ اساں اگُوں وَنج تے جہاز اُتے اسُّس کُوں روانہ تھئے تاں جو اُتھوں پولُس کُوں جہاز اُتے سوار کر گِھنوں کیوں جو اُوں پہلے کنُوں ای اُتھاں پیدل پُج ونجنڑ دا اِرادہ کر گِھدا ہا۔

¹⁴ بس جِیں ویلے او ساکُوں اسُّس ءچ مِلیا تاں اساں اُونکُوں جہاز اُتے چڑھا گِھدا تے مِتُلینے چلے گئے۔

¹⁵ اُتھوں کنُوں اساں جہاز اُتے روانہ تھئے تے ڈُوجھے ڈینہہ خِیُس دے سامنڑے پُجے تے تریجھے ڈینہہ سامُس تئیں آئے تے اگلے ڈینہہ مِیلیتُس پُجے۔

¹⁶ پولُس ایہ فیصلہ کر گِھدا ہا جو او اِفِسُس کولُھوں لنگھے تاں جو اُونکُوں آسِیہ ءچ مزید دیر نہ لگے۔ کیوں جو او جلدی نال یروشلیم وَنج تے پِنتیکُست دا ڈینہہ اُتھاں گُزارنڑاں چاہندا ہا۔

اِفِسُس دے بزُرگاں دے سامنڑے پولُس دی الوداعی تقریر

¹⁷ مِیلیتُس پُج تے پولُس اِفِسُس ءچ پیغام بھیج تے کلیسیا دے بزُرگاں کُوں سڈوایا۔

¹⁸ جِیں ویلے او آئے تاں اُنہاں کُوں آکھیا، ”تُساں جانڑدے ہیوے جو جئیں ڈینہہ تُوں مَیں آسِیہ ءچ پیر رکھیا ہے میڈی زندگی تُہاڈے سامنڑے کیجھی لنگھدی پئی ہے۔

¹⁹ مَیں بہُوں عاجزی نال، تے ہنجُو وہا وہا تے خُداوند دی خدمت کریندا ریہا، تے میکُوں یہُودیاں دی وڈیاں وڈیاں سازشاں دا سامنڑا کرنڑا پِیا ہا۔

²⁰ جیہڑے گالھیں تُہاڈے فائدے کیتے ہَن اُنہاں کُوں مَیں بغیر کہیں جِھجک دے بیان کیتا بلکہ اعلانیہ طور تے گھر گھر وَنج تے سِکھایا۔

²¹ مَیں یہُودیاں تے یُونانیاں ڈوہائیں دے سامنڑے گواہی ڈیندا ریہا ہاں جو او خُدا دو رجُوع کر تے توبہ کرݨ تے ساڈے خُداوند یسُوع المسیح اُتے اِیمان گِھن آوݨ۔

²² ڈیکھو ہُنڑ مَیں رُوح دا پابند تھی تے یروشلیم ویندا پِیا ہاں تے میکُوں پتہ نئیں جو اُتھاں میڈے نال کیا تھیسی۔

²³ فقط اِیہو جانڑدا ہاں جو رُوح القُدس دی طرفوں ہر شہر ءچ اِیہو آگاہی مِلدی ریہی جو قید تے مُصیبتاں میڈے اِنتظار ءچ ہِن۔

²⁴ پر مَیں آپنڑی جان کُوں عزیز نئیں رکھیندا بس ایہ چاہندا ہاں جو مَیں آپنڑی خدمت دا دور تے او کم جیہڑا خُداوند یسُوع میکُوں ڈِتے، پُورا کراں یعنی خُدا دے فضل دی خوشخبری سُنڑاوݨ دا کم۔

²⁵ ہُنڑ مَیں جانڑدا ہاں جو تُساں جِنہاں ءچ مَیں خُدا دی بادشاہی دی تبلیغ کریندا ریہا ہاں میکُوں وَل نہ ڈیکھسو۔

²⁶ اِیں واسطے اَج مَیں تُہاکُوں صاف آکھ ڈیندا ہاں جو مَیں تُہاڈے ءچوں کہیں دی ہلاکت دا ذمہ دار نئیں۔

²⁷ کیوں جو مَیں بغیر کہیں جِھجک دے خُدا دا پُورا مقصد تُہاڈے اُتے ظاہر کریندا ہاں۔

²⁸ بس آپنڑا تے آپنڑے سارے اِجڑ دا خیال رکھو جیندے تُساں رُوح القُدس دی طرفوں نگہبان مقرر کیتے گئے ہیوے تاں جو خُدا دی کلیسیا دی نگہبانی کرو، جِینکُوں اُوں آپنڑے پوتر دے خون نال مُل گِھدے۔

²⁹ مَیں ایہ جانڑدا ہاں جو میڈے ونجنڑ دے بعد پھاڑ ڈیوݨ آلے نہر تُہاڈے وچال آ ویسن تے اِجڑ کُوں نہ چُھڑیسن۔

³⁰ بلکہ تُہاڈے ءچوں ای ایجھے لوک اُٹھسن جیہڑے حق کُوں تروڑ مروڑ تے پیش کریسن تاں جو شاگرداں کُوں آپنڑے پاسے چھیک گِھننڑ۔

³¹ اِیں واسطے خبردار رہوائے تے یاد رکھائے جو مَیں ترے سال تئیں ڈینہہ رات ہنجُو وہا وہا تے ہر ہِک کُوں خطرے تُوں آگاہ کریندا ریہا۔

³² ہُنڑ مَیں تُہاکُوں خُدا تے اُوندے فضل دے کلام دے سپُرد کریندا ہاں جیہڑا تُہاڈے اِیمان دی ترقی دا سبب بنڑ سگدے تے تُہاکُوں سارے مُقدّساں ءچ شامل کر تے میراث دا حقدار بنڑا سگدے۔

³³ مَیں کہیں دے سونے، چاندی یا کپڑے دا لالچ نئیں کیتا۔

³⁴ تُساں خود جانڑدے ہیوے جو مَیں آپنڑے ہتھاں نال آپنڑی تے آپنڑے ساتھیاں دیاں ضرورتاں پُوریاں کیتیاں ہَن۔

³⁵ مَیں تُہاکُوں ایہ سبھ کر تے ڈِکھایا جو اساں کِینویں محنت کر تے کمزوراں کُوں سنبھال سگدے ہیں۔ خُداوند یسُوع دے لفظاں کُوں یاد رکھو جو اُوں آکھیا، ’ڈیونڑا گِھننڑ کنُوں زیادہ مُبارک ہے‘۔“

³⁶ اِنہاں گالھیں دے بعد پولُس اُنہاں ساریاں نال گوڈے ٹیک تے دُعا کیتی۔

³⁷ او سارے بہُوں رُنّے تے پولُس دے گَل لگ تے اُوندے بوسے گِھدے۔

³⁸ تے پولُس دی اِیں گالھ تُوں بہُوں ڈُکھی تھئے جو ”تُساں میکُوں ولا نہ ڈیکھسو۔“ وَل اُونکُوں جہاز تئیں چھوڑن گئے۔