اعمال 2 - کِتاب مُقدّس سرائیکی ترجمہ

رُوح القُدس دا نزُول

¹ جِیں ویلے عید ِ پِنتیکُست دا ڈینہہ آیا تاں او سارے ہِک جاہ تے جمع ہَن،

² جو اچانک اسمان کنُوں ایجھی اواز آئی جِینویں زور دی اندھاری چلدی ہے، تے اُوں اواز نال سارا گھر بھریج گِیا جِتھاں او بیٹھے ہَن۔

³ اُنہاں کُوں بھاہ دیاں لَمباں وانگُوں زباناں ڈِکھالی ڈِتیاں جیہڑیاں اَنج اَنج تھی تے اُنہاں ءچوں ہر ہِک اُتے آ تے کھڑ گئیاں۔

⁴ تے او سارے رُوح القُدس نال بھریج گئے تے مختلف زباناں بولنڑ لگے جِینویں رُوح اُنہاں کُوں قابلیت بخشی ہئی۔

⁵ اُوں ویلے دُنیا دی ہر قوم ءچوں خُدا ترس یہُودی، یروشلیم ءچ راہندے ہَن۔

⁶ جِیں ویلے اُنہاں ایہ اواز سُنڑی تاں بِھیڑ جمع تھی گئی تے لوک ہکے بکے رہ گئے کیوں جو ہر ہِک کُوں اِیہو سُنڑدا ہا جو ایہ میڈی ای بولی بُولیندے پئے ہِن۔

⁷ سارے بہُوں حیران تھی تے آکھنڑ لگے ”کیا ایہ بولنڑ آلے یکے گلیل دے راہوݨ آلے نئیں؟

⁸ وَل ایہ کِینویں تھی سگدے جو ہر ہِک آپنڑے آپنڑے وطن دی بولی سُنڑدا پِیا ہے؟

⁹ اساں تاں پارتھی، مادی، عِیلامی، مسوپتامیہ، یہُودیہ، کپَدُکیہ، پُنطُس، آسِیہ،

¹⁰ فروگیہ، پمفِیلیہ، مِصر تے لِبیا دے اُوں علاقے دے راہنڑ آلے ہیں جیہڑا کُرینے دے نیڑے ہے۔ تے اِتھاں رومی مسافر

¹¹ بھانویں پیدائشی یہُودی بھانویں اُنہاں دے مُرید، تے کریتی تے عرب ہِن۔ پر اساں آپنڑی آپنڑی بولی ءچ اُنہاں کنُوں خُدا دے عظیم کماں دا بیان سُنڑدے ہیں۔“

¹² سبھ حیران تھئے تے پریشان تھی تے ہِک بئے کُوں آکھنڑ لگے، ”ایہ کیا تھیندا پئے؟“

¹³ پر کُجھ ٹھٹّھا کر تے آکھیا، ”ایہ تاں شراب دے نشے ءچ ہِن۔“

پطرس دا پیغام

¹⁴ پر پطرس باقی یارہاں دے نال کھڑا تھیّا تے اُچی اواز ءچ لوکاں کُوں آکھیا، ”یہُودی بِھراؤ تے یروشلیم دے سارے راہنڑ آلیو! ایہ جاݨ گِھنو تے میڈی گالھ توجہ نال سُنڑو۔

¹⁵ ایہ لوک نشہ ءچ نئیں جِینویں تُساں سمجھدے پئے ہیوے کیوں جو حالی تاں سویل دے نؤں وجے ہِن۔

¹⁶ بلکہ ایہ او تھیندا پئے جیہڑا یُوایل نبی دی معرفت آکھیا گئے

¹⁷ ’خُدا فرمیندے جو آخری ڈینہاں ءچ اِینویں تھیسی جو مَیں ہر بندے اُتے آپنڑا رُوح نازل کریساں تُہاڈے پوتر تے تُہاڈیاں دِھیاں نبُوّت کریسن تُہاڈے جوان رویا ڈیکھسن تے تُہاڈے بُڈھے خواب۔

¹⁸ مَیں اُنہاں ڈینہاں ءچ آپنڑے خادماں، مرداں تے عورتاں اُتے آپنڑا رُوح نازل کریساں تے او نبُوّت کریسن۔

¹⁹ مَیں اسمان اُتے عجیب کم تے تلے زمین اُتے نشانیاں ڈِکھیساں یعنی خون تے بھاہ تے گھاٹا دُھواں۔

²⁰ سِجھ تاریک تھی ویسی چَن خون وانگُوں تھی ویسی اِیں کنُوں پہلے جو رب دا عظیم تے جلال آلا ڈینہہ آوے۔

²¹ تے اِینویں تھیسی جو جیہڑا وی خُداوند دا ناں گِھنسی، نجات پیسی۔‘

²² اِسرائیلیو! سُنڑو، یسُوع ناصری ایجھا بندہ ہا جیندے ذریعے خُدا تُہاڈے وچال معجزے، عجیب کم تے نشان ڈِکھا تے ثابت کیتا جو او خُدا دی طرفوں ہا۔ تُساں آپ ای ایہ گالھ جانڑدے ہیوے۔

²³ جِیں ویلے او خُدا دے پہلے کنُوں بنڑائے منصوبے تے علم دے مطابق پکڑوایا گِیا تاں تُساں اُونکُوں بدکار لوکاں دے ہتُھوں صلیب اُتے چڑھا تے قتل کر ڈِتا۔

²⁴ پر خُدا اُونکُوں زندہ کر ڈِتا تے موت دے قبضے تُوں چُھڑایا کیوں جو ایہ ممکن نہ ہا جو او موت دے قبضہ ءچ راہندا۔

²⁵ کیوں جو داؤد اُوندے بارے ءچ آدھا ہے جو ’مَیں رب کُوں ہمیشاں آپنڑے سامنڑے ڈیدھا ریہا کیوں جو او میڈے سجے پاسُوں ہے تاں جو مَیں ہلایا نہ وَنجاں۔

²⁶ اِیں سببّوں میڈا دل خوش تھیّا تے میڈی زبان خوشی منائی، بلکہ میڈا جِسم وی اُمید ءچ قائم راہسی۔

²⁷ اِیں واسطے جو تُوں میڈی جان کُوں عالم ِ ارواح ءچ نہ چُھوڑیسیں تے نہ آپنڑے قدُّوس دے سڑن دی نوبت آوݨ ڈیسیں۔

²⁸ تُوں میکُوں زندگی دے رستے ڈِکھائے، تُوں میکُوں آپنڑی حضُوری ءچ خوشی نال بھر ڈیسیں۔‘

²⁹ بِھراؤ! مَیں قوم دے بزُرگ داؤد دے حق ءچ تُہاکُوں دلیری نال آکھ سگدا ہاں جو او مر گِیا تے دفن وی تھیّا تے اُوندی قبر اَج تئیں ساڈے ءچ موجود ہے۔

³⁰ پر او نبی ہا تے ایہ جانڑدا ہا جو خُدا میڈے نال قَسم کھادی ہے جو مَیں تیڈی نسل ءچوں ہِک بندے کُوں تیڈے تخت اُتے بِلھیساں۔

³¹ اُوں پیشن گوئی کریندے ہوئے المسیح دے زندہ تھیوݨ دا ذِکر کیتا جو نہ او عالم ِ ارواح ءچ چھوڑیا گِیا تے نہ اُوندے جِسم کُوں سڑن ڈِتا گِیا۔

³² خُدا یسُوع کُوں زندہ کیتا تے اساں سارے اِیں گالھ دے گواہ ہیں۔

³³ ہُنڑ اُونکُوں سرفراز کر تے خُدا دے سجے ہتھ بِلھایا گِیا ہے، تے اُوں باپ کنُوں وعدہ کیتا ہویا رُوح القُدس حاصل کر تے نازل کیتا جِیندا اثر تُساں ڈیدھے تے سُنڑدے ہیوے۔

³⁴ کیوں جو داؤد تاں اسمان اُتے نئیں چڑھیا پر او آپ آدھے جو ’رب میڈے خُداوند کُوں آکھیا، میڈے سجے پاسُوں بہہ،

³⁵ جئیں تئیں مَیں تیڈے دُشمنڑاں کُوں تیڈے پیراں دی چوکی نہ بنڑا ڈیواں۔‘

³⁶ بس اِسرائیل دا سارا خاندان جاݨ گِھنے جو خُدا اُوں یسُوع کُوں جِینکُوں تُساں صلیب چڑھایا، خُداوند وی بنڑایا تے المسیح وی۔“

³⁷ جِیں ویلے اُنہاں ایہ سُنڑیا تاں اُنہاں دے دِلاں کُوں ڈُکھ لگیا تے پطرس تے باقی رسُولاں کُوں آکھیا جو ”بِھراؤ! اساں کیا کرُوں؟“

³⁸ پطرس اُنہاں کُوں آکھیا، ”توبہ کرو تے تُہاڈے ءچوں ہر ہِک آپنڑے گُناہاں دی معافی کیتے یسُوع مسیح دے ناں ءچ بپتسمہ گِھنے تاں تُساں رُوح القُدس دی نعمت پے سو۔

³⁹ کیوں جو ایہ وعدہ تُہاڈے کیتے تے تُہاڈی اولاد کیتے بلکہ اُنہاں ساریاں کیتے وی ہے جیہڑے دُور دے ہِن، جِنہاں کُوں خُداوند ساڈا خُدا آپنڑے کولھ سڈیسی۔“

⁴⁰ تے پطرس مزید بہُوں سارے گالھیں کیتیاں تے اُنہاں کُوں ایہ نصیحت کیتی جو ”آپنڑے آپ کُوں اِیں بدکار قوم کنُوں بچائی رکھو۔“

⁴¹ بس جِنہاں لوکاں اُوندا کلام قبول کیتا اُنہاں بپتسمہ گِھدا تے اُوں ڈینہہ تقریباً ترے ہزار لوک جماعت ءچ شامل تھی گئے۔

⁴² تے ایہ لوک رسُولاں کنُوں تعلیم گِھننڑ، رفاقت رکھنڑ، کٹھے روٹی کھاوݨ تے دُعا کرݨ ءچ لگے ریہے۔

اِیمان داراں دی اِجتماعی زندگی

⁴³ ہر بندے اُتے خوف چھا گِیا تے رسُولاں دے ذریعے بہُوں سارے معجزے تے عجیب کم، ظاہر تھیندے ہَن۔

⁴⁴ جیہڑے اِیمان گِھن آئے ہَن او سارے کٹھے راہندے تے اُنہاں دیاں سبھ چیزاں سانجھیاں ہَن۔

⁴⁵ تے آپنڑا مال اسباب ویچ تے ہر ہِک کُوں اُوندی ضرورت دے مطابق پیسے وَنڈ ڈیندے ہَن۔

⁴⁶ او ہر روز ہِک دل تھی تے ہیکل ءچ جمع تھیندے تے گھراں ءچ روٹی تروڑ تے خوشی تے سادہ دِلی نال کٹھے کھانڑا کھاندے ہَن۔

⁴⁷ تے خُدا دی حمد کریندے تے سارے لوکاں دی نظر ءچ مقبول ہَن۔ تے خُداوند ہر روز نجات پاوݨ آلیاں کُوں جماعت ءچ شامل کر ڈیندا ہا۔