اعمال 19 - کِتاب مُقدّس سرائیکی ترجمہ

پولُس اِفِسُس ءچ

¹ جِیں ویلے اپُلّوس کُرِنتُھس ءچ ہا تاں پولُس پہاڑی علاقہ ءچوں لنگھدے ہوئے اِفِسُس پُجیا۔ اُتھاں اُونکُوں کُجھ شاگرد مِلے۔

² پولُس اُنہاں تُوں پُچھیا جو ”کیا اِیمان گِھن آوݨ ویلے تُہاکُوں رُوح القُدس مِلیا ہا؟“ اُنہاں جواب ڈِتا ”کائنا، اساں کڈھائیں رُوح القُدس دے بارے ءچ نئیں سُنڑیا۔“

³ اِیں گالھوں پولُس آکھیا جو ”وَل تُساں کِیندا بپتسمہ گِھدے؟“ اُنہاں جواب ڈِتا ”یُوحنّا دا بپتسمہ۔“

⁴ پولُس آکھیا ”یُوحنّا تاں توبہ دا بپتسمہ ڈِتا تے آکھیا جو ’او جیہڑا میڈے بعد آوݨ آلا ہے تُساں اُوندے اُتے اِیمان گِھن آؤ یعنی یسُوع اُتے‘۔“

⁵ ایہ سُنڑ تے اُنہاں خُداوند یسُوع دے ناں ءچ بپتسمہ گِھدا۔

⁶ جِیں ویلے پولُس اُنہاں اُتے ہتھ رکھے تاں رُوح القُدس اُنہاں اُتے نازل تھیّا تے او غیر زباناں بولنڑ تے نبُوّت کرݨ لگے۔

⁷ تے او سارے تقریباً بارہاں بندے ہَن۔

⁸ وَل پولُس ترے مہینے تئیں عبادت خانہ ءچ وَنج تے دلیری نال خُدا دی بادشاہی دے بارے ءچ بحث کریندا تے لوکاں کُوں قائل کریندا ریہا۔

⁹ پر اُنہاں ءچوں کُجھ سخت دل تھی تے اِیمان نہ گِھن آئے بلکہ مسیح دی اِیں راہ کُوں لوکاں دے سامنڑے بُرا بھلا آکھنڑ لگے تاں پولُس اُنہاں کُوں چھوڑ ڈِتا۔ او مسیحی شاگرداں کُوں نال گِھن تے تُرنّس دے سکُول ءچ وَنج تے ہر روز بحث کریندا راہندا ہا۔

¹⁰ ایہ سلسلہ ڈُو سال تئیں چلدا ریہا، اِتُھوں تئیں جو آسِیہ ءچ راہنڑ آلیاں بھانویں یہُودی بھانویں یُونانی، سبھ خُداوند دا کلام سُنڑیا۔

سِکِوا دے پوتر

¹¹ تے خُدا پولُس دے ہتُھوں وڈے وڈے معجزے ڈکھیندا ہا۔

¹² اِتُھوں تئیں جو رومال تے پٹکے جیہڑے اُوندے جِسم نال لگدے ہَن، بیماراں اُتے سٹے ویندے ہَن تے او آپنڑیاں بیماریاں تُوں شِفا پا گِھندے ہَن، تے بدرُوحاں اُنہاں ءچوں نِکل ویندیاں ہَن۔

¹³ پر اِڈے اُڈے پِھرݨ آلے کُجھ یہُودی عامل وی خُداوند یسُوع دے ناں نال بدرُوحاں کُوں کڈھنڑ لگے۔ او بدرُوحاں کُوں کڈھنڑ کیتے ایہ آدھے ہَن جو ”جئیں یسُوع دی پولُس تبلیغ کریندے، مَیں اُونہی دے ناں دی قَسم ڈے تے تیکُوں نِکل ونجنڑ دا حُکم ڈیندا ہاں۔“

¹⁴ تے سِکِوا ناں دے یہُودی سردار کاہِن دے سَت پوتر وی اِیہو کم کریندے ہَن۔

¹⁵ پر ہِک ڈینہہ بدرُوح اُنہاں کُوں آکھیا جو ”مَیں یسُوع کُوں تاں جانڑدی ہاں تے پولُس دا وی پتہ ہے پر تُساں کوݨ ہیوے؟“

¹⁶ وَل جئیں بندے ءچ بدرُوح ہئی، اُوں اُنہاں اُتے ٹپّا ماریا تے اُنہاں کُوں قابو کر تے ایجھا کُٹیا جو او اُتھوں زخمی تے ننگے ای بھج گئے۔

¹⁷ جِیں ویلے اِفِسُس دے یہُودیاں تے یُونانیاں کُوں اِیں گالھ دا پتہ چلیا تاں اُنہاں اُتے خوف چھا گِیا تے خُداوند یسُوع دے ناں دی تعریف تھئی۔

¹⁸ تے بہُوں سارے لوکاں جیہڑے اِیمان گِھن آئے ہَن، آ تے آپنڑے بُرے کماں دا اِظہار تے اِقرار کیتا۔

¹⁹ تے بہُوں سارے جادُوگراں آپنڑیاں کتاباں کُوں کٹھا کر تے سبھ لوکاں دے سامنڑے بھاہ لا ڈِتی تے جِیں ویلے اُنہاں کتاباں دی قیمت دا اندازہ کیتا گِیا تاں او پنجھاہ ہزار چاندی دے سِکے ہئی۔

²⁰ اِینویں خُداوند دا کلام بہُوں زور نال جڑھ پکڑیندا تے پھیلدا گِیا۔

اِفِسُس ءچ ہنگامہ

²¹ اِنہاں گالھیں دے بعد پولُس پکّا اِرادہ کر گِھدا جو ”مَیں مَکِدُنیہ تے اَخیہ دے علاقے ءچوں تھیندا ہویا یروشلیم چلیا ویساں تے وَل اُتھوں روم وَنج تے اُوں شہر کُوں وی ڈیکھ ساں۔“

²² بس اُوں آپنڑے خدمت گُزاراں ءچوں تِیمُتِھیُس تے اِراستُس کُوں مَکِدُنیہ روانہ کیتا تے خود کُجھ دیر آسِیہ دے صوبہ ءچ ریہا۔

²³ اُوں ویلے مسیح دی راہ دے بارے ءچ وڈا ہنگامہ تھیّا۔

²⁴ کیوں جو دیمیترِیُس ناں دا ہِک سُنیارا ہا جیہڑا اَرتمِس دے مندر دے چاندی دے چھوٹے چھوٹے نمونے بنڑویندا ہا، تے کاریگراں کُوں بہُوں کم ڈویندا ہا۔

²⁵ اُوں اُنہاں کُوں تے اِیں پیشے نال تعلق رکھنڑ آلے بئے کاریگراں کُوں جمع کیتا تے آکھیا، ”بِھراؤ! تُساں جانڑدے ہیوے جو ساکُوں اِیں کم دی وجہ کنُوں دولت مِلدی ہے۔

²⁶ پر تُساں ڈیدھے تے سُنڑدے ہیوے جو ایہ بندہ پولُس اِفِسُس تے تقریباً سارے آسِیہ ءچ بہُوں سارے لوکاں کُوں قائل کر تے گُمراہ کریندا پِیا ہے تے آدھے جو ہتھ دے بنڑائے بُت اصلُوں خُدا نئیں۔

²⁷ بس فقط اِیں گالھ دا ای ڈر نئیں جو ساڈے پیشے دی بےقدری تھیسی بلکہ عظیم دیوی اَرتمِس دے مندر دی حیثیت وی گھٹ تھی ویسی تے ساڈی دیوی جیندی پُوجا سارا صوبہ آسِیہ بلکہ پُوری دُنیا کریندی ہے، اُوندے ناں دی عظمت وی نہ راہسی۔“

²⁸ جِیں ویلے اُنہاں ایہ سُنڑیا تاں قہر ءچ آ گئے تے زور نال نعرے مارݨ لگ پئے جو ”اِفِسِیاں دی دیوی اَرتمِس بہُوں عظیم ہے۔“

²⁹ سارے شہر ءچ افراتفری مچ گئی تے لوکاں گِیُس تے ارِسترخُس مَکِدُنیہ آلیاں کُوں جیہڑے پولُس نال آئے ہَن پکڑ گِھدا تے اُنہاں کُوں گھلیندے ہوئے تماشا گاہ دو بھج پئے۔

³⁰ پولُس وی مجمع ءچ ونجنڑ چاہندا ہا پر شاگرداں اُونکُوں ونجنڑ نہ ڈِتا۔

³¹ تے آسِیہ دے حاکماں ءچوں کُجھ جیہڑے پولُس دے دوست ہَن، اُونکُوں پیغام بھیج تے مِنت کیتی جو تماشا گاہ ءچ نہ ونجے۔

³² مجمع ءچ کھلبلی مچی ہوئی ہئی کیوں جو سارے لوک اُچی اواز ءچ آپنڑی آپنڑی آدھے پئے ہَن۔ تے بہُوں سارے لوکاں کُوں تاں ایہ وی پتہ نہ ہا جو او اُتھاں کیوں کٹھے تھئے ہِن۔

³³ ایہ ڈیکھ تے یہُودیاں اِسکندر کُوں مجمع ءچوں کڈھ تے اگُوں کر ڈِتا۔ اِسکندر لوکاں کُوں چُپ تھی ونجنڑ دا اِشارہ کیتا تاں جو او اُنہاں کُوں آپنڑی صفائی پیش کر سگے۔

³⁴ پر جِینویں ای لوکاں کُوں پتہ لگیا جو او یہُودی ہے تاں سارے ہِک اواز تھی تے ڈُو گھنٹے تئیں نعرے مریندے ریہے جو ”اِفِسِیاں دی دیوی اَرتمِس عظیم ہے۔“

³⁵ وَل شہر دے ناظم لوکاں کُوں ٹھڈا کر تے آکھیا، ”اِفِسُس دے راہنڑ آلیو! کیہڑا بندہ نئیں جانڑدا جو اِفِسِیاں دا شہر وڈی دیوی اَرتمِس دے مندر تے اُوں مُورت دا محافظ ہے جیہڑی اسمان دی طرفوں ڈھٹھی ہئی؟

³⁶ بس جڈاں اِنہاں گالھیں دا اِنکار کوئی نئیں کر سگدا تاں لازم ہے جو تُساں چُپ راہو تے سوچے بغیر کُجھ کم نہ کرو۔

³⁷ کیوں جو تُساں جیہڑے آدمیاں کُوں اِتھاں گِھن آئے ہیوے اُنہاں نہ تاں مندراں کُوں لُٹیا ہے تے نہ ای ساڈی دیوی دی شان ءچ گُستاخی کیتی ہے۔

³⁸ اِیں واسطے جے دیمیترِیُس تے اُوندے ہم پیشہ کاریگر کہیں دے خلاف دعویٰ کریندے ہووݨ تاں عدالت دے دروازے کُھلے ہِن تے مُنصف موجود ہِن۔ اُتھاں او ہِک ڈُوجھے اُتے مقدمہ کر سگدے ہِن۔

³⁹ تے جے کوئی ڈُوجھا مسئلہ وی ہے تاں اُوندا فیصلہ قانُونی مجلس ءچ تھی سگدے۔

⁴⁰ ساکُوں تاں خطرہ ہے جو اَج دے ہنگامے دے مُجرم نہ کھڑائے ونجُوں کیوں جو اِیں تماشے دے بارے ءچ ساڈے کولھ کوئی جواب نئیں۔“

⁴¹ ایہ آکھ تے اُوں مجلس کُوں برخاست کر ڈِتا۔