اعمال 16 - کِتاب مُقدّس سرائیکی ترجمہ

تِیمُتِھیُس، پولُس تے سِیلاس نال ویندے

¹ پولُس دِربے تے وَل لُسترہ ءچ وی پُجیا، جِتھاں تِیمُتِھیُس ناں دا ہِک شاگرد ہا۔ اُوندی ماء تاں یہُودی ہئی جیہڑی مسیح اُتے اِیمان گِھن آئی ہئی پر اُوندا پِیُو یُونانی ہا۔

² او لُسترہ تے اکُنیُم دے بِھرانواں ءچ نیک ناں ہا۔

³ پولُس اُونکُوں سفر ءچ آپنڑے نال گِھن ونجنڑ چاہندا ہا اِیں واسطے اُوں اُوندا ختنہ کر ڈِتا کیوں جو اُوں علاقے دے سارے یہُودی جانڑدے ہَن جو اُوندا پِیُو یُونانی ہے۔

⁴ وَل او جیہڑے جیہڑے شہراں ءچوں لنگھدے ہَن، اُتھوں دے اِیمانداراں کُوں اُنہاں فیصلیاں دے بارے ءچ ڈسیندے ہَن جیہڑے یروشلیم دے رسُولاں تے بزُرگاں جاری کیتے ہَن تاں جو اُنہاں اُتے عمل کرݨ۔

⁵ بس کلیسیاواں اِیمان ءچ مضبوط تھیندیاں تے شمار ءچ ہر روز ودھدیاں گئیاں۔

تروآس ءچ پولُس دی رویا

⁶ وَل پولُس تے سِیلاس فروگیہ تے گلِتیہ دے علاقے ءچوں لنگھے کیوں جو رُوح القُدس اُنہاں کُوں آسِیہ ءچ کلام سُنڑاوݨ تُوں روک ڈِتا ہا۔

⁷ اُنہاں مُوسیہ دے نیڑے پُج تے بِتُونیہ ءچ داخل تھیوݨ دی کوشش کیتی پر یسُوع دے رُوح اُنہاں کُوں ونجنڑ نہ ڈِتا۔

⁸ بس او مُوسیہ کنُوں لنگھدے ہوئے تروآس ءچ آئے۔

⁹ رات کُوں پولُس مَکِدُنیہ دے ہِک بندے کُوں رویا ءچ کھڑا ڈِٹھا جیہڑا پولُس دی مِنت کر تے آدھا ہے جو ”اِیں پار مَکِدُنیہ ءچ آ تے ساڈی مدد کر۔“

¹⁰ اُوندی رویا دے بعد اساں فوراً مَکِدُنیہ ونجنڑ دا اِرادہ کیتا کیوں جو اساں ایہ سمجھیا جو خُدا ساکُوں اُتھوں دے لوکاں ءچ خوشخبری سُنڑاوݨ کیتے سڈیا ہے۔

فِلپی ءچ لُدیہ دا اِیمان گِھن آونڑا

¹¹ بس تروآس تُوں اساں جہاز اُتے روانہ تھئے تے سمتُراکے تئیں آئے تے ڈُوجھے ڈینہہ نیاپُلِس ءچ۔

¹² اُتھوں اساں فِلپی روانہ تھئے جیہڑا ضلع مَکِدُنیہ دا وڈا شہر ہا تے جِتھاں بہُوں سارے رومی راہندے ہَن۔ اساں کُجھ ڈینہہ اُتھائیں ریہے۔

¹³ سبت دے ڈینہہ اساں شہر دے پھاٹک ءچوں نِکل تے دریا دے کنارے گئے کیوں جو اساں سمجھیا ہا جو اُتھاں دُعا کرݨ دی جاہ ہوسی۔ اساں اُتھاں بہہ گئے تے کُجھ عورتاں نال جیہڑیاں اُتھاں جمع تھی گئیاں ہَن، کلام کرݨ لگے۔

¹⁴ ساڈے گالھیں سُنڑݨ آلیاں عورتاں ءچوں لُدیہ ناں دی ہِک عورت ہئی۔ او تھواتِیرہ شہر دی ہئی تے جامنی رنگ دے کپڑے دا کاروبار کریندی ہئی تے بہُوں خُدا پرست ہئی۔ خُداوند اُوندا دل کھولیا تاں جو او پولُس دا پیغام سُنڑے تے اُونکُوں قبول کرے۔

¹⁵ وَل جِیں ویلے اُوں تے اُوندے خاندان بپتسمہ گِھن گِھدا تاں ساکُوں آکھیا جو ”جے تُساں میکُوں خُداوند دی اِیماندار بندی سمجھدے ہیوے تاں جُلو تے میڈے گھر ٹِکو۔“ بس اُوں ساکُوں مجبور کیتا۔

پولُس تے سِیلاس فِلپی دے قید خانہ ءچ

¹⁶ جِیں ویلے اساں دُعا آلی جاہ دو ویندے پئے ہسے تاں ساکُوں ہِک کنیز مِلی جیندے ءچ ہِک ایجھی بدرُوح ہئی جیندے ذریعے او فال گِیری کریندی ہئی۔ او کنیز قسمت دا حال ڈسا تے آپنڑے مالکاں کیتے بہُوں کمائی کریندی ہئی۔

¹⁷ او پولُس تے ساڈے پِچُھوں آ تے چیخنڑ لگ پئی جو ”ایہ لوک خُدا تعالیٰ دے خادم ہِن جیہڑے تُہاکُوں نجات دا رستہ ڈسیندے ہِن۔“

¹⁸ او بہُوں ڈینہاں تئیں اِینویں ای کریندی ریہی۔ آخر پولُس بہُوں تنگ تھی گِیا تے اُوں مُڑ تے بدرُوح کُوں آکھیا جو ”مَیں تیکُوں یسُوع مسیح دے ناں نال حُکم ڈیندا ہاں جو اِیندے ءچوں نِکل وَنج۔“ تے اُونہی ویلے او بدرُوح اُوں چھوہیر ءچوں نِکل گئی۔

¹⁹ جِیں ویلے اُوندے مالکاں ڈِٹھا جو اُنہاں دی کمائی دا ذریعہ ختم تھی گِیا تاں او پولُس تے سِیلاس کُوں پکڑ تے چوک ءچ حاکماں کولھ گِھن گئے۔

²⁰ اُنہاں پولُس تے سِیلاس کُوں عدالت آلیاں دے سامنڑے پیش کیتا تے آکھیا، ”ایہ لوک یہُودی ہِن تے ساڈے شہر ءچ بہُوں کھلبلی مچیندے ہِن۔

²¹ تے ایجھے رسماں دی تعلیم ڈیندے ہِن جِنہاں کُوں مننڑا تے اُنہاں اُتے عمل کرنڑا اساں رومیاں کُوں اصلُوں جائز نئیں۔“

²² عوام وی اُنہاں نال رَل گئی تے پولُس تے سِیلاس دی مخالفت کرݨ لگ پئی تے حاکماں اُنہاں دے کپڑے پھاڑ تے اُنہاں کُوں بینت نال کُٹنڑ دا حُکم ڈِتا۔

²³ وَل سپاہیاں اُنہاں کُوں بینت مروا تے قید خانہ ءچ سَٹ ڈِتا تے قید خانہ دے داروغہ کُوں حُکم ڈِتا جو اُنہاں دی چنگی طرحاں چوکیداری کرے۔

²⁴ ایہ حُکم مِلدے ای اُوں اُنہاں کُوں ہِک اندرُونی کوٹھڑی ءچ بند کر ڈِتا تے اُنہاں دے پیراں ءچ بیڑیاں لا ڈِتیاں۔

²⁵ اَدھ رات ویلے پولُس تے سِیلاس دُعا تے خُدا دی حمد کریندے پئے ہَن تے قیدی سُنڑدے پئے ہَن،

²⁶ جو اچانک ہِک زوردار زلزلہ آیا جیندے نال قید خانہ دیاں بنیاداں ہل گئیاں۔ دروازے فوراً کُھل گئے تے سارے قیدیاں دیاں بیڑیاں وی کُھل گئیاں۔

²⁷ داروغہ جاگ پِیا تے جِیں ویلے اُوں قید خانہ دے دروازے کُھلے ڈِٹھے تاں سمجھیا جو سارے قیدی قید خانہ ءچوں نِکل تے بھج گئے ہِن۔ بس اُوں آپنڑی تلوار چاتی تے آپنڑے آپ کُوں مارݨ آلا ہا۔

²⁸ پر پولُس اُچی اواز ءچ آکھیا جو ”آپنڑے آپ کُوں کوئی نُقصان نہ پُچا کیوں جو اساں سارے اِتھائیں ہیں۔“

²⁹ داروغہ ڈیوا چوا تے اندر گِیا تے کمبدا ہویا پولُس تے سِیلاس دے پیراں ءچ ڈھے پِیا۔

³⁰ وَل اُنہاں کُوں باہر گِھن آیا تے آکھنڑ لگا، ”صاحبو! مَیں کیا کراں جو نجات پاواں؟“

³¹ اُنہاں جواب ڈِتا، ”خُداوند یسُوع مسیح اُتے اِیمان گِھن آ تاں تُوں تے تیڈا خاندان نجات پے سی۔“

³² وَل اُنہاں اُونکُوں تے اُوندے گھر آلیاں کُوں خُداوند دا کلام سُنڑایا۔

³³ اُونہی ویلے رات کُوں او اُنہاں کُوں گِھن گِیا تے اُنہاں دے زخم دھوتے۔ وَل اُوں تے اُوندے سارے گھر آلیاں بپتسمہ گِھدا۔

³⁴ داروغہ اُنہاں کُوں آپنڑے گھر گِھن گِیا تے اُنہاں کُوں کھانڑا کھوایا۔ تے آپنڑے سارے گھر آلیاں سمیت خُدا اُتے اِیمان گِھن آ تے بہُوں خوشی منائی۔

³⁵ جِیں ویلے سویل تھئی تاں رومی حاکماں آپنڑے سپاہیاں کُوں قید خانہ دے داروغہ دے کولھ ایہ حُکم ڈے تے بھیجیا جو ”اُنہاں بندیاں کُوں رِہا کر ڈے۔“

³⁶ وَل داروغے پولُس کُوں آکھیا جو ”حاکماں تُہاکُوں رِہا کرݨ دا حُکم بھیجیا ہے۔ بس ہُنڑ تُساں نِکل تے سلامت چلے ونجو۔“

³⁷ پر پولُس جواب ڈِتا ”اُنہاں ساکُوں جیہڑے رومی شہری ہیں، ساڈا قصُور ثابت کیتے بغیر ساریاں دے سامنڑے ماریا کٹوایا تے قید خانہ ءچ سَٹ ڈِتا تے ہُنڑ چُپ کر تے چھوڑ ڈیوݨ چاہندے ہِن؟ اِینویں نئیں تھی سگدا بلکہ او خود اِتھاں آوݨ تے ساکُوں قید خانہ ءچوں باہر گِھن ونجنڑ۔“

³⁸ سپاہیاں وَنج تے حاکماں کُوں اِنہاں گالھیں دی خبر ڈِتی۔ جِیں ویلے حاکماں سُنڑیا جو پولُس تے سِیلاس رومی ہِن تاں ڈر گئے،

³⁹ تے اُتھاں آ تے اُنہاں تُوں معافی منگی تے وَل اُنہاں کُوں قید خانہ ءچوں باہر گِھن آئے تے درخاست کیتی جو شہر ءچوں باہر چلے ونجو۔

⁴⁰ بس پولُس تے سِیلاس قید خانہ ءچوں باہر نِکل تے لُدیہ دے گھر گئے جِتھاں او مسیحی بِھرانواں کُوں مِلے تے اُنہاں دی حوصلہ افزائی کر تے اُتھوں روانہ تھی گئے۔