اعمال 15 - کِتاب مُقدّس سرائیکی ترجمہ

یروشلیم ءچ اِجلاس

¹ وَل کُجھ لوک یہُودیہ تُوں آ تے مسیحی بِھرانواں کُوں ایہ تعلیم ڈیوݨ لگے جو ”جے مُوسیٰ دی رسم دے مطابق تُہاڈا ختنہ نہ تھیّا ہووے تاں تُساں نجات نئیں پا سگدے۔“

² جِیں ویلے پولُس تے برنباس دی اُنہاں دے نال سخت تکرار تے بحث تھئی تاں کلیسیا ایہ مقرر کیتا جو پولُس تے برنباس تے اُنہاں ءچوں کُجھ بئے بندے اِیں مسئلہ کیتے رسُولاں تے بزُرگاں کولھ یروشلیم ونجنڑ۔

³ بس کلیسیا اُنہاں کُوں روانہ کیتا تے او فینیکے تے سامریہ ءچوں تھیندے ہوئے، غیر قوماں دا مسیح اُتے اِیمان گِھن آوݨ دا بیان کریندے گئے تے اِیں خبر نال سبھ بِھرانواں کُوں خوش کریندے گئے۔

⁴ جِیں ویلے یروشلیم پُجے تاں کلیسیا، رسُول تے بزُرگ اُنہاں کُوں خوشی نال مِلے تے اُنہاں سبھ کُجھ بیان کیتا جیہڑا خُدا اُنہاں دی معرفت کیتا ہا۔

⁵ پر فریسیاں دے فرقہ ءچوں جیہڑے اِیمان گِھن آئے ہَن، کُجھ کھڑے تھی تے آکھنڑ لگے جو ”غیریہُودیاں ءچوں اِیمان گِھن آوݨ آلیاں دا ختنہ کراوݨ تے اُنہاں کُوں مُوسیٰ دی شریعت اُتے عمل کرݨ دا حُکم ڈیوݨ ضرور ہے۔“

⁶ بس رسُول تے بزُرگ اِیں گالھ اُتے غور کرݨ کیتے کٹھے تھئے۔

⁷ کافی بحث دے بعد پطرس کھڑا تھی تے اُنہاں کُوں آکھیا جو ”بِھراؤ! تُساں جانڑدے ہیوے جو بہُوں عرصہ پہلے خُدا تُساں لوکاں ءچوں میکُوں چُنڑیا جو غیر قوماں میڈی زبان تُوں خوشخبری دا کلام سُنڑ تے اِیمان گِھن آوݨ۔

⁸ تے خُدا جیہڑا دِلاں دا حال جانڑدے، اُنہاں کُوں وی ساڈے آلی کار رُوح القُدس ڈے تے گواہی ڈِتی جو اُوں اُنہاں کُوں قبول کر گِھدے،

⁹ تے اِیمان دے وسیلہ نال اُنہاں دے دل پاک کر تے ساڈے ءچ تے اُنہاں ءچ کوئی فرق نئیں کیتا۔

¹⁰ بس ہُنڑ تُساں شاگرداں دی گردن اُتے ایجھی پنجالی رکھ تے جِینکُوں نہ ساڈے پِیُو ڈاڈا چا سگدے ہَن، نہ ای اساں، خُدا کُوں کیوں ازمیندے ہیوے؟

¹¹ جڈاں جو ساڈا اِیمان ہے جو ساکُوں خُداوند یسُوع دے فضل دے وسیلے نال نجات مِلسی، جِینویں اُنہاں کُوں مِلسی۔“

¹² وَل ساری جماعت چُپ ریہی تے پولُس تے برنباس دا بیان سُنڑݨ لگی جو خُدا اُنہاں دے ذریعے غیر قوماں ءچ کیجھے کیجھے معجزے تے عجیب کم ظاہر کیتے۔

¹³ جِیں ویلے اُنہاں دے گالھیں ختم تھیّاں تاں یعقُوب آکھنڑ لگا جو ”بِھراؤ! میڈی گالھ سُنڑو۔

¹⁴ شمعون تُہاکُوں ڈسائے جو خُدا پہلے کِینویں غیر قوماں اُتے نِگاہ کیتی تاں جو اُنہاں ءچوں لوکاں کُوں چُنڑ تے آپنڑے ناں دی ہِک اُمت بنڑا گِھنے۔

¹⁵ تے نبیاں دے گالھیں وی اِیندے مطابق ہِن۔ جِینویں لِکھیا ہے جو

¹⁶ ’اِیندے بعد مَیں ولا آساں تے داؤد دے ڈھٹھے ہوئے تمبُو کُوں کھڑا کریساں تے اُوندے کھنڈراں دی مرمت کر تے اُونکُوں ولا تعمیر کریساں۔

¹⁷ تاں جو باقی لوک یعنی ساریاں قوماں جیہڑیاں میڈے ناں تُوں اکھویندیاں ہِن، خُداوند کُوں گولھنڑ۔‘ ایہ اُوہو خُداوند فرمیندے

¹⁸ جیہڑا دُنیا دے شروع تُوں اِنہئی گالھیں دی خبر ڈیندا آیا ہے۔

¹⁹ بس میڈا فیصلہ ایہ ہے جو غیر قوماں ءچوں جیہڑے لوک خُدا دو رجُوع کریندے ہِن اُنہاں کُوں اساں تکلیف نہ ڈیؤں۔

²⁰ پر اُنہاں کُوں خط لِکھ تے ایہ ڈساؤں جو او بُتاں کُوں نذر کیتیاں ہوئیاں چیزاں تے حرام کاری تے گَل گُھٹ تے مارے ہوئے جانوراں تے خون کنُوں پرہیز کرݨ۔

²¹ کیوں جو ہر شہر ءچ پُرانڑے زمانے تُوں مُوسیٰ دی شریعت دی منادی کیتی گئی ہے تے او عبادت خانیاں ءچ ہر سبت کُوں سُنڑائی ویندی ہے۔“

غیر یہُودی اِیمانداراں دے ناں خط

²² وَل رسُولاں تے بزُرگاں ساری کلیسیا سمیت مناسب سمجھیا جو آپنڑے ءچوں کُجھ بندیاں کُوں چُنڑ تے پولُس تے برنباس دے نال انطاکِیہ بھیجنڑ یعنی یہُوداہ کُوں جیہڑا برسبّا اکھویندے تے سِیلاس کُوں۔ ایہ بِھرانواں ءچ قابل ِ احترام ہَن۔

²³ تے اُنہاں دے ہتھ ایہ خط بھیجیا جو رسُولاں تے بزُرگ بِھرانواں دی طرفوں انطاکِیہ، سُوریہ تے کلکیہ دے اُنہاں مسیحی بِھرانواں کُوں جیہڑے غیر قوماں ءچوں ہِن، سلام پُجے۔

²⁴ کیوں جو اساں سُنڑیا ہے جو ساڈے ءچوں کُجھ لوکاں جِنہاں کُوں اساں حُکم نہ ڈِتا ہا تُہاکُوں آپنڑے گالھیں نال پریشان کر ڈِتے۔

²⁵ اِیں واسطے اساں رَل تے مناسب جانڑیا جو کُجھ چُنڑے ہوئے بندیاں کُوں آپنڑے عزیزاں پولُس تے برنباس دے نال تُہاڈے کولھ بھیجُوں۔

²⁶ ایہ ڈوہائیں ایجھے بندے ہِن جِنہاں آپنڑیاں جاناں کُوں ساڈے خُداوند یسُوع مسیح دے ناں کیتے خطرے ءچ پایا ہویا ہے۔

²⁷ اِیں واسطے اساں یہُوداہ تے سِیلاس کُوں بھیجیا ہے، جیہڑے ایہ گالھیں زبانی وی بیان کریسن۔

²⁸ کیوں جو رُوح القُدس تے اساں مناسب سمجھیا جو اِنہاں لازمی گالھیں دے علاوہ تُہاڈے اُتے کوئی بِیا بھار نہ سَٹُوں،

²⁹ جو تُساں بُتاں دیاں قُربانیاں دے گوشت، خون تے گلا گُھٹ تے مارے ہوئے جانوراں دے گوشت تے حرام کاری کنُوں پرہیز کرو۔ جے تُساں آپنڑے آپ کُوں اِنہاں چیزاں کنُوں بچائی رکھیسو تاں چنگا کریسو۔ والسّلام۔

³⁰ بس او روانہ تھی تے انطاکِیہ پُجے تے جماعت کُوں کٹھا کر تے خط ڈے ڈِتا۔

³¹ او خط دے تسلی بخش کلام کُوں پڑھ تے خوش تھئے۔

³² تے یہُوداہ تے سِیلاس جیہڑے خود وی نبی ہَن، بِھرانواں کُوں نصیحت کر تے مضبوط کر ڈِتا۔

³³ کُجھ ڈینہہ بعد او بِھرانواں تُوں سلامتی دی دُعا گِھن تے آپنڑے بھیجنڑ آلیاں کولھ روانہ کیتے گئے۔

³⁴ [پر سِیلاس کُوں اُتھاں راہنڑ چنگا لگیا۔]

³⁵ پر پولُس تے برنباس انطاکِیہ ءچ ای کھڑ گئے تے بہُوں سارے بئے لوکاں نال خُداوند دا کلام سکھیندے تے اُوندی تبلیغ کریندے ریہے۔

پولُس تے برنباس ءچ تکرار تے جُدائی

³⁶ کُجھ ڈینہہ بعد پولُس، برنباس کُوں آکھیا جو ”جِنہاں شہراں ءچ اساں خُداوند دا کلام سُنڑایا ہا، آؤ وَل اُنہاں ءچ وَنج تے بِھرانواں کُوں ڈیکھوں جو اُنہاں دا کیا حال ہے۔“

³⁷ برنباس، یُوحنّا کُوں جیہڑا مرقس اکھویندا ہے، نال گِھننڑ چاہندا ہا۔

³⁸ پر پولُس ایہ مناسب نہ سمجھیا جو جیہڑے بندے اُنہاں نال پمفِیلیہ ءچ ونجنڑ تُوں کنارہ کیتا تے اِیں کم کیتے اُنہاں دے نال نہ گِیا ہا، اُونکُوں نال گِھن ونجُوں۔

³⁹ بس اُنہاں ءچ ایجھی تکرار تھئی جو او ہِک بئے کنُوں اَنج تھی گئے۔ برنباس مرقس کُوں گِھن تے جہاز ءچ کُپرُس روانہ تھیّا۔

⁴⁰ پر پولُس سِیلاس کُوں نال گِھن گِھدا تے بِھرانواں کنُوں خُداوند دے فضل دے سپُرد تھی تے اُتھوں روانہ تھیّا۔

⁴¹ پولُس سُوریہ تے کلکیہ ءچوں تھیندا ہویا کلیسیاواں کُوں مضبوط کریندا گِیا۔