اعمال 14 - کِتاب مُقدّس سرائیکی ترجمہ

پولُس تے برنباس اکُنیُم ءچ

¹ اکُنیُم ءچ وی پولُس تے برنباس یہُودیاں دے عبادت خانہ ءچ گئے تے ایجھی تقریر کیتی جو بہُوں سارے یہُودی تے یُونانی اِیمان گِھن آئے۔

² پر جیہڑے یہُودی اِیمان نہ گِھن آئے ہَن، اُنہاں یہُودیاں، غیریہُودیاں کُوں بھڑکایا تے اُنہاں دی سوچ مسیحی بِھرانواں دے خلاف کر ڈِتی۔

³ بس پولُس تے برنباس اُتھاں بہُوں عرصے تئیں ریہے تے خُداوند دے بھروسے تے دلیری نال کلام کریندے ہَن۔ خُداوند اُنہاں معجزیاں تے عجیب کماں دے ذریعے جیہڑے اُنہاں دے ہتُھوں تھیندے ہَن، آپنڑے فضل دے کلام کُوں برحق ثابت کریندا ریہا۔

⁴ پر شہر دے لوک آپس ءچ ونڈیج گئے۔ کُجھ یہُودیاں نال تھی گئے تے کُجھ رسُولاں نال۔

⁵ پر جِیں ویلے یہُودی تے غیریہُودی آپنڑے سرداراں نال رَل تے رسُولاں کُوں بے عزت تے سنگسار کرݨ کیتے اُنہاں اُتے چڑھ آئے

⁶ تاں او اِیندے تُوں واقف تھی تے لُکااُنیہ دے شہر لُسترہ تے دِربے تے نال دیاں وستیاں ءچ بھج گئے۔

⁷ تے اُتھاں خوشخبری سُنڑیندے ریہے۔

پولُس تے برنباس لُسترہ تے دِربے ءچ

⁸ لُسترہ ءچ ہِک بندہ بیٹھا ہا جیہڑا پیراں کنُوں معذور ہا۔ او جماندرُو مَنڈا ہا تے کڈھائیں نہ ٹُریا ہا۔

⁹ او پولُس کُوں گالھیں کریندے سُنڑدا پِیا ہا۔ جِیں ویلے پولُس اُوندے دو غور نال ڈِٹھا جو اُوندے ءچ اِتنا اِیمان ہے جو او شِفا پا سگے،

¹⁰ تاں اُچی اواز ءچ آکھیا جو ”آپنڑے پیراں اُتے سِدھا کھڑا تھی وَنج۔“ بس او ٹپّا مار تے کھڑا تھی گِیا تے ٹُرݨ پِھرݨ لگا۔

¹¹ لوک پولُس دا ایہ کم ڈیکھ تے لُکااُنیہ دی بولی ءچ اُچی اواز نال آکھنڑ لگے جو ”دیوتا ساڈے کولھ اِنسانی شکل ءچ لہہ آئے ہِن۔“

¹² تے اُنہاں برنباس کُوں زِیُوس تے پولُس کُوں ہرمِیس آکھنڑ شروع کر ڈِتا، اِیں واسطے جو زیادہ تر گالھیں پولُس کریندا ہا۔

¹³ زِیُوس دیوتا دا مندر شہر دے سامنڑے ہا۔ اُوندا مذہبی راہنما ڈاند تے پُھلاں دے ہار گِھن تے شہر دے پھاٹک اُتے پُجیا کیوں جو او شہر دے لوکاں نال رسُولاں کیتے قُربانی پیش کرݨ چاہندا ہا۔

¹⁴ جِیں ویلے رسُولاں یعنی پولُس تے برنباس ایہ سُنڑیا تاں آپنڑے کپڑے پھاڑ تے لوکاں ءچ وَنج وڑے تے اُچی اواز ءچ

¹⁵ آکھنڑ لگے جو ”لوکو! تُساں ایہ کیا کریندے ہیوے؟ اساں وی تُہاڈے آلی کار اِنسان ہیں تے تُہاکُوں خوشخبری سُنڑیندے ہیں تاں جو تُساں اِنہاں بے کار چیزاں کُوں چھوڑ تے زندہ خُدا دو رجُوع گِھن آؤ جئیں زمین تے اسمان تے سمندر تے جیہڑا کُجھ اُنہاں ءچ ہے، پیدا کیتے۔

¹⁶ اُوں پِچھلے زمانہ ءچ سبھ قوماں کُوں آپنڑے آپنڑے رستے اُتے ٹُرݨ ڈِتا۔

¹⁷ وَل وی اُوں آپنڑے آپ کُوں بے گواہ نئیں چھوڑیا۔ بلکہ اُوں مہربانیاں کیتیاں تے اسمان تُوں مینہ وسایا تے فصلاں کیتے موسم عطا کیتے تے تُہاکُوں خوراک تے دِلی خوشی نال بھر ڈِتا۔“

¹⁸ ایہ گالھیں آکھ تے وی لوکاں کُوں بہُوں مُشکل نال روکیا جو اُنہاں کیتے قُربانیاں نہ پیش کرݨ۔

¹⁹ وَل کُجھ یہُودی انطاکِیہ تے اکُنیُم تُوں آئے تے لوکاں کُوں آپنڑے نال مِلا تے پولُس کُوں سنگسار کر ڈِتا تے اُونکُوں مُردہ سمجھ تے شہر تُوں باہر گِھیل تے گِھن گئے۔

²⁰ پر جِیں ویلے شاگرد اُوندے چودھارُوں آ کھڑے تھئے تاں او اُٹھی تے شہر ءچ آیا تے ڈُوجھے ڈینہہ برنباس نال دِربے چلیا گِیا۔

سُوریہ دے انطاکِیہ ءچ واپسی

²¹ پولُس تے برنباس اُوں شہر ءچ خوشخبری سُنڑا تے بہُوں سارے شاگرد بنڑا تے لُسترہ، اکُنیُم تے انطاکِیہ دو وَل آئے۔

²² تے شاگرداں دے دِلاں کُوں مضبوط کریندے تے ایہ نصیحت کریندے ہَن جو ”آپنڑے اِیمان اُتے قائم راہو“ تے آدھے ہَن ”ضرور ہے جو اساں بہُوں ساریاں مُصیبتاں سہہ تے خُدا دی بادشاہی ءچ داخل تھیؤں۔“

²³ اُنہاں ہر کلیسیا ءچ بزُرگاں کُوں مقرر کیتا تے روزہ رکھ تے، تے دُعاواں کر تے اُنہاں کُوں خُداوند دے سپُرد کیتا جئیں اُتے او اِیمان گِھن آئے ہَن۔

²⁴ وَل پِسِدیہ ءچوں تھیندے ہوئے پمفِیلیہ دے علاقے ءچ پُجے۔

²⁵ تے پِرگہ ءچ خُدا دا کلام سُنڑا تے اتلّیہ دو چلے گئے۔

²⁶ اُتھوں او جہاز اُتے سوار تھی تے ولا انطاکِیہ گئے جِتھاں اُنہاں کُوں اُوں خدمت کیتے جیہڑی اُنہاں ہُنڑ پُوری کر گِھدی ہئی خُدا دے فضل دے سپُرد کیتا گِیا ہا۔

²⁷ اُتھاں پُج تے اُنہاں کلیسیا کُوں کٹھا کر تے او سبھ ڈسایا جیہڑا کُجھ خُدا اُنہاں دے ذریعے کیتا ہا تے ایہ جو اُوں غیر قوماں کیتے اِیمان دا دروازہ کھول ڈِتے۔

²⁸ تے او شاگرداں دے کولھ بہُوں عرصہ تئیں ٹِکے ریہے۔