اعمال 13 - کِتاب مُقدّس سرائیکی ترجمہ

برنباس تے ساؤل کُوں مخصوص کر تے بھیجیا ویندے

¹ انطاکِیہ دی کلیسیا ءچ کئی نبی تے اُستاد ہَن یعنی برنباس تے شمعون جیہڑا کالا اکھویندے تے لُوکِیُس کُرینی تے مناہیم جیہڑا چوتھائی مُلک دے حاکم ہیرودیس دے نال پلیا ہا تے ساؤل۔

² جِیں ویلے او خُداوند دی عبادت کریندے تے روزے رکھیندے پئے ہَن تاں رُوح القُدس آکھیا، ”میڈے کیتے برنباس تے ساؤل کُوں اُوں کم کیتے مخصوص کر ڈیؤ جیندے کیتے مَیں اُنہاں کُوں سڈیا ہے۔“

³ وَل اُنہاں روزہ رکھیا تے دُعا کیتی تے اُنہاں اُتے ہتھ رکھ تے اُنہاں کُوں رُخصت کیتا۔

ساؤل تے برنباس کُپرُس ءچ

⁴ بس او ڈوہائیں رُوح القُدس دے بھیجے ہوئے، سِلُوکیہ گئے تے اُتھوں کنُوں جہاز اُتے کُپرُس چلے گئے۔

⁵ سَلَمِیس ءچ پُج تے او یہُودیاں دے عبادت خانیاں ءچ خُدا دا کلام سُنڑاوݨ لگے تے یُوحنّا اُنہاں دی مدد کیتے اُنہاں دے نال ہا۔

⁶ جِیں ویلے او سارے جزیرے ءچوں تھیندے ہوئے پافُس تئیں پُجے تاں اُتھاں اُنہاں کُوں بریسوع ناں دا ہِک یہُودی جادُوگر تے کُوڑا نبی مِلیا۔

⁷ او جزیرے دے گورنر سرگیُس پولُس دے نال ہا جیہڑا دانشمند بندہ ہا۔ اُوں ساؤل تے برنباس کُوں سڈ تے خُدا دا کلام سُنڑنڑاں چاہیا

⁸ پر الِیماس جادُوگر (اِیہو اُوندے ناں دا مطلب ہے) اُنہاں دی مخالفت کیتی تے گورنر کُوں اِیمان گِھن آوݨ کنُوں روکنڑا چاہیا۔

⁹ پر ساؤل جِیندا ناں پولُس وی ہے، رُوح القُدس نال بھریج تے اُوندے اُتے غور نال نِگاہ کیتی

¹⁰ تے آکھیا جو ”ابلیس دے پوتر! تُوں جیہڑا ہر قِسم دی مکاری تے شرارت نال بھریا ہویا تے ہر طرحاں دی نیکی دا دُشمنڑ ہیں، کیا تُوں خُداوند دے سِدھے رستیاں کُوں وِگاڑن تُوں باز نہ آسیں؟

¹¹ ہُنڑ ڈیکھ خُداوند دا ہتھ تیڈے خلاف اُٹھیا ہے تے تُوں اندھا تھی تے کُجھ عرصہ تئیں سِجھ کُوں نہ ڈیکھسیں۔“ اُونہئی ویلے کُہیڑ تے اندھارا اُوندے اُتے چھا گِیا تے او لوکاں کُوں گولھیندا پِھردا ریہا جو کوئی اُوندا ہتھ پکڑ تے اُونکُوں نال گِھن ونجے۔

¹² وَل گورنر ایہ واقع ڈیکھ تے، تے خُداوند دی تعلیم کنُوں حیران تھی تے اِیمان گِھن آیا۔

پِسِدیہ صوبے دے انطاکِیہ ءچ

¹³ وَل پولُس تے اُوندے ساتھی جہاز دے ذریعے پافُس تُوں روانہ تھی تے پمفِیلیہ صوبے دے شہر پِرگہ ءچ آئے۔ اُتھاں یُوحنّا اُنہاں کُوں چھوڑ تے یروشلیم کُوں واپس وَل گِیا۔

¹⁴ او ڈوہائیں پِرگہ کنُوں روانہ تھی تے پِسِدیہ دے شہر انطاکِیہ ءچ پُجے تے سبت دے ڈینہہ عبادت خانہ ءچ وَنج بیٹھے۔

¹⁵ توریت تے نبیاں دے صحیفے پڑھن تُوں بعد عبادت خانہ دے سرداراں اُنہاں کُوں اکھوا بھیجیا جو ”بِھراؤ! جے لوکاں دی نصیحت کیتے تُہاڈے کولھ پیغام ہے تاں آکھو۔“

¹⁶ بس پولُس کھڑا تھی تے ہتھ نال اِشارہ کر تے آکھیا، ”اِسرائیلیو تے خُدا دا خوف مننڑ آلیو! سُنڑو۔

¹⁷ اِیں اُمت اِسرائیل دے خُدا ساڈے پِیُو ڈاڈا کُوں چُنڑ گِھدا تے جِیں ویلے ایہ اُمت مِصر ءچ پردیسیاں آلی کار راہندی ہئی، اُونکُوں سرفراز کیتا تے آپنڑے زورآور ہتھ نال اُنہاں کُوں اُتھوں کنُوں کڈھ تے گِھن آیا۔

¹⁸ تے تقریباً چالیہہ سال تئیں اُنہاں دیاں عادتاں کُوں بیابان ءچ برداشت کریندا ریہا۔

¹⁹ وَل خُدا کنعان ءچ سَت قوماں کُوں برباد کر تے اُنہاں دی زمین آپنڑے لوکاں کُوں میراث ءچ ڈِتی۔

²⁰ ایہ سبھ کُجھ تقریباً ساڈھے چار سو سال ءچ تھیّا۔ اِنہاں گالھیں دے بعد سموئیل نبی دے زمانہ تئیں اُنہاں ءچ قاضی مقرر کیتے۔

²¹ اِیندے بعد لوکاں بادشاہ کیتے درخاست کیتی تے خُدا اُنہاں کُوں قِیس دا پوتر ساؤل ڈِتا جیہڑا بِنیمِین دے قبیلہ ءچوں ہا۔ ساؤل چالیہہ سال تئیں بادشاہی کریندا ریہا۔

²² وَل اُوں ساؤل کُوں تخت تُوں لہاوݨ دے بعد داؤد کُوں اُنہاں دا بادشاہ بنڑایا جیندے بارے ءچ خُدا گواہی ڈِتی جو ’میکُوں یسّی دا پوتر داؤد مِل گئے جیہڑا میڈے دل دے مطابق ہے، اُوہو میڈی ساری مرضی کُوں پُورا کریسی۔‘

²³ اِیندی نسل ءچوں خُدا آپنڑے وعدہ دے مطابق اِسرائیل دے کولھ ہِک نجات ڈیوݨ آلے یعنی یسُوع کُوں بھیجیا۔

²⁴ یسُوع دے آوݨ کنُوں پہلے یُوحنّا اِسرائیل دی ساری اُمت دے سامنڑے توبہ کرݨ تے بپتسمہ گِھننڑ دی منادی کیتی۔

²⁵ جِیں ویلے یُوحنّا دا کم پُورا تھیوݨ آلا ہا تاں اُوں آکھیا جو ’تُساں میکُوں کیا سمجھدے ہیوے؟ مَیں او نئیں بلکہ ڈیکھو میڈے بعد او بندہ آوݨ آلا ہے جیندے پیراں دی جُتیاں دا تسمہ مَیں کھولنڑ دے لائق نئیں۔‘

²⁶ بِھراؤ! ابرہام دے فرزندو تے خُدا دا خوف مننڑ آلیو! اِیں نجات دا کلام ساڈے کولھ بھیجیا گِیا۔

²⁷ کیوں جو یروشلیم دے راہنڑ آلیاں تے اُوندے سرداراں یسُوع کُوں نہ سُنجانڑیا تے نہ نبیاں دیاں گالھیں سمجھیاں جیہڑیاں ہر سبت کُوں سُنڑائیاں ویندیاں ہِن۔ اِیں واسطے اُوندے اُتے سزا دا حُکم ڈے تے اُنہاں کُوں پُورا کیتا۔

²⁸ تے بھانویں اُوندے قتل دی کوئی وجہ نہ مِلی وَل وی اُنہاں پِیلاطُس کُوں درخاست کیتی جو اُونکُوں قتل کر ڈِتا ونجے۔

²⁹ جِیں ویلے او سبھ کُجھ پُورا کر گِھدا جیہڑا اُوندے حق ءچ لِکھیا گِیا ہا تاں اُونکُوں صلیب تُوں لہا تے قبر ءچ رکھ ڈِتا۔

³⁰ پر خُدا اُونکُوں مُردیاں ءچوں زندہ کر ڈِتا۔

³¹ تے جیہڑے لوک گلیل کنُوں اُوندے نال یروشلیم آئے ہَن، او اُنہاں کُوں بہُوں ڈینہاں تئیں ڈِکھالی ڈِتا۔ ہُنڑ اُوہو لوک اُمت دے سامنڑے اُوندے گواہ ہِن۔

³² تے اساں تُہاکُوں اُوں وعدہ دے بارے ءچ جیہڑا ساڈے پِیُو ڈاڈا نال کیتا گِیا ہا، خوشخبری ڈیندے ہیں

³³ جو خُدا یسُوع کُوں زندہ کر تے اُنہاں دی اولاد یعنی ساڈے کیتے اُونہی وعدہ کُوں پُورا کیتا۔ جِینویں ڈُوجھے زبُور ءچ لِکھیا ہے جو ’تُوں میڈا پوتر ہیں، اَج مَیں تیڈا باپ بنڑیا۔‘

³⁴ تے یسُوع دے مُردیاں ءچوں زندہ تھیوݨ تے اُوندے جِسم دے سڑن دے بارے ءچ خُدا اِینویں آکھیا ہے، ’مَیں تیکُوں داؤد نال وعدہ کیتیاں ہوئیاں پاک تے سچیاں نعمتاں ڈیساں۔‘

³⁵ تے او ہِک بئے زبُور ءچ آدھے جو ’تُوں آپنڑے قدُّوس دے سڑن دی نوبت نہ آوݨ ڈیسیں۔‘

³⁶ کیوں جو داؤد تاں آپنڑے زمانہ ءچ خُدا دا مقصد پُورا کرݨ دے بعد موت دی نیندر سَم گِیا تے آپنڑے پِیُو ڈاڈا نال دفن تھیّا تے اُوندے سڑن دی نوبت آئی۔

³⁷ پر جِینکُوں خُدا زندہ کیتا اُوندے سڑن دی نوبت نئیں آئی۔

³⁸ بس بِھراؤ! تُساں جاݨ گِھنو جو یسُوع ای دے وسیلے تُہاکُوں گُناہاں دی معافی دی خبر ڈِتی ویندی ہے۔

³⁹ تے جیہڑے گالھیں کنُوں تُساں مُوسیٰ دی شریعت دے ذریعے نجات نہ پا سگدے ہَوے، ہُنڑ مسیح اُتے اِیمان گِھن آوݨ دے ذریعے ہر کہیں کُوں نجات مِل سگدی ہے۔

⁴⁰ بس خبردار! اِینویں نہ تھیوے جو جیہڑا نبیاں دیاں کتاباں ءچ لِکھیا ہے او تُہاڈے اُتے سچ تھیوے جو

⁴¹ ’حقارت کرݨ آلیو! ڈیکھو، حیران تھیؤ تے ہلاک تھی ونجو کیوں جو مَیں تُہاڈے زمانے ءچ ہِک کم کرݨ آلا ہاں ایجھا کم جیندی خبر سُنڑ تے وی تُہاکُوں کڈھائیں یقین نہ آسی‘۔“

⁴² جِیں ویلے برنباس تے پولُس عبادت خانہ ءچوں باہر نِکلدے پئے ہَن تاں لوک اُنہاں دی مِنت کرݨ لگے جو اگلے سبت کُوں وی ایہ گالھیں ساکُوں سُنڑائیاں ونجنڑ۔

⁴³ جِیں ویلے عبادت ختم تھی گئی تاں بہُوں سارے یہُودی تے خُدا پرست نومُرید یہُودی پولُس تے برنباس دے پِچُھوں تھی پئے۔ اُنہاں ڈوہائیں، اُنہاں نال مزید گالھیں کیتیاں تے زور ڈے تے آکھیا جو خُدا دے فضل اُتے قائم راہو۔

⁴⁴ ڈُوجھے سبت، تقریباً سارا شہر خُداوند دا کلام سُنڑݨ کیتے جمع تھی گِیا۔

⁴⁵ پر یہُودی اِتی بِھیڑ ڈیکھ تے حسد نال بھریج گئے تے پولُس دے گالھیں دی مخالفت کرݨ تے بُرا بھلا آکھنڑ لگے۔

⁴⁶ پولُس تے برنباس دلیری نال آکھنڑ لگے ”لازم ہا جو خُدا دا کلام پہلے تُہاکُوں سُنڑایا ویندا پر کیوں جو تُساں اُونکُوں رَد کریندے ہیوے تے آپنڑے آپ کُوں ہمیشاں دی زندگی دے لائق نئیں سمجھدے تاں ڈیکھو اساں غیر قوماں دو توجہ کریندے ہیں۔

⁴⁷ کیوں جو خُداوند ساکُوں ایہ حُکم ڈِتے جو ’مَیں تیکُوں غیر قوماں کیتے نُور مقرر کیتے تاں جو تُوں زمین دی اِنتہا تئیں نجات دا باعث ہوویں‘۔“

⁴⁸ جِیں ویلے غیر قوم آلیاں ایہ سُنڑیا تاں بہُوں خوش تھئے تے خُداوند دے کلام دی تعریف کرݨ لگے تے جِتّی ہمیشاں دی زندگی کیتے مقرر کیتے گئے ہَن، اِیمان گِھن آئے۔

⁴⁹ تے خُداوند دا کلام اُوں سارے علاقے ءچ پھیل گِیا۔

⁵⁰ پر یہُودیاں خُدا پرست تے معزز عورتاں تے شہر دے راہنماواں کُوں بھڑکایا تے پولُس تے برنباس کُوں ستاوݨ کیتے اُبھار تے اُنہاں کُوں آپنڑے علاقے ءچوں کڈھ ڈِتا۔

⁵¹ او آپنڑے پیراں دی دھُوڑ اُنہاں دے سامنڑے چِھنڈک تے اکُنیُم کُوں چلے گئے۔

⁵² پر شاگرد خوشی تے رُوح القُدس نال معمُور تھیندے ریہے۔