اعمال 11 - کِتاب مُقدّس سرائیکی ترجمہ

پطرس یروشلیم ءچ کلیسیا کُوں رپورٹ ڈیندے

¹ تے یہُودیہ دے علاقے ءچ راہنڑ آلے رسُولاں تے بِھرانواں سُنڑیا جو غیر قوماں وی خُدا دا کلام قبول کیتے۔

² اِیں واسطے جڈاں پطرس یروشلیم ءچ آیا تاں یہُودی جیہڑے اِیماندار تھی گئے ہَن، اُوندے نال ایہ بحث کرݨ لگے

³ جو ”تُوں غیریہُودیاں کولھ گِیا تے اُنہاں نال کھانڑا کھادے۔“

⁴ پطرس اُنہاں کُوں سبھ کُجھ شروع کنُوں اخیر تئیں ترتیب نال ڈسایا جو

⁵ ”مَیں یافا شہر ءچ دُعا کریندا پِیا ہم تے بے خُودی دی حالت ءچ مَیں ہِک رویا ڈِٹھی جو کوئی چیز وڈی چادر وانگُوں چارے کونیاں کنُوں لٹکدی ہوئی اسمان کنُوں تلے لتھی تے مَیں تئیں آئی۔

⁶ جِیں ویلے مَیں اُوندے اُتے غور نال نِگاہ کیتی تاں زمین دے ڈھورڈنگر تے جنگلی جانور تے کیڑے مکوڑے تے ہوا دے پکھی ڈِٹھے۔

⁷ تے میکُوں ہِک اواز وی ایہ آدھے ہوئے سُنڑائی ڈِتی جو ’پطرس! اُٹھی، ذبح کر تے کھا۔‘

⁸ پر مَیں آکھیا ’اے خُداوند ہرگز نئیں! کیوں جو کوئی حرام یا ناپاک چیز کڈھائیں میڈے مُنہ ءچ نئیں گئی۔‘

⁹ پر او اواز اسمان کنُوں ڈُوجھی پھیر آئی جو ’جیہڑی شے کُوں خُدا پاک مقرر کیتے، تُوں اُونکُوں حرام نہ آکھ۔‘

¹⁰ ترے پھیری اِینویں ای تھیّا۔ وَل او ساریاں چیزاں اسمان دو چھیک گِھدیاں گئیاں۔

¹¹ تے ڈیکھو اُونہی ویلے ترے بندے جیہڑے قیصریہ تُوں میڈے کولھ بھیجے گئے ہَن اُوں گھر دے سامنڑے آ کھڑے تھئے جِتھاں اساں راہندے ہسے۔

¹² رُوح القُدس میکُوں آکھیا جو ’جِھجکے بغیر اُنہاں نال چلیا وَنج۔‘ ایہ چِھی بِھرا وی میڈے نال گئے تے اساں اُوں بندے دے گھر ءچ داخل تھئے۔

¹³ اُوں ساکُوں ڈسایا جو کِینویں ہِک فرشتہ اُونکُوں گھر ءچ نظر آیا تے آکھنڑ لگا جو ’یافا ءچ کہیں بندے کُوں بھیج تے شمعون کُوں جیہڑا پطرس اکھویندے سڈوا گِھن۔

¹⁴ او تیکُوں ہِک ایجھا پیغام ڈیسی جیندے وسیلے تُوں تے تیڈا سارا خاندان نجات پیسی۔‘

¹⁵ جِیں ویلے مَیں کلام کرݨ لگا تاں رُوح القُدس اُنہاں اُتے اِینویں نازل تھیّا جِینویں شروع ءچ ساڈے اُتے نازل تھیّا ہا۔

¹⁶ تے میکُوں خُداوند دی او گالھ یاد آئی جیہڑی اُوں آکھی ہئی جو ’یُوحنّا تاں پانڑی نال بپتسمہ ڈِتا پر تُساں رُوح القُدس نال بپتسمہ پے سو۔‘

¹⁷ بس جِیں ویلے خُدا اُنہاں کُوں وی اُوہو نعمت ڈِتی جیہڑی ساکُوں خُداوند یسُوع مسیح اُتے اِیمان گِھن آوݨ دے سببّوں مِلی ہئی، تاں مَیں کوݨ ہم جو خُدا کُوں روک سگدا؟“

¹⁸ جِیں ویلے اُنہاں ایہ سُنڑیا تاں چُپ تھی گئے تے خُدا دی حمد کر تے آکھنڑ لگے جو ”وَل تاں خُدا غیر قوماں کُوں وی زندگی حاصل کرݨ کیتے توبہ کرݨ دی توفیق ڈِتی ہے۔“

انطاکِیہ دی کلیسیا

¹⁹ بس جیہڑے لوک اُوں مُصیبت پارُوں جِیندا آغاز ستِفُنس دی موت تُوں تھیّا ہا، کِھنڈ گئے ہَن، او پِھردے پِھردے فینیکے تے کُپرُس تے انطاکِیہ ءچ پُجے پر یہُودیاں دے علاوہ کہیں بئے کُوں کلام نہ سُنڑیندے ہَن۔

²⁰ پر اُنہاں ءچوں کُجھ کُپرُس تے کُرین دے ہَن۔ او انطاکِیہ ءچ آ تے یُونانیاں کُوں وی خُداوند یسُوع دی خوشخبری دے گالھیں سُنڑاوݨ لگے۔

²¹ خُداوند دا ہتھ اُنہاں اُتے ہا تے بہُوں سارے لوک اِیمان گِھن آ تے خُداوند دو رجُوع تھئے۔

²² اُنہاں لوکاں دی خبر یروشلیم دی کلیسیا دے کَناں تئیں پُجی تے اُنہاں برنباس کُوں انطاکِیہ تئیں بھیجیا۔

²³ جِیں ویلے او اُتھاں پُجیا تاں لوکاں اُتے خُدا دا فضل ڈیکھ تے بہُوں خوش تھیّا تے اُنہاں سبھ کُوں نصیحت کیتی جو پُورے دل نال خُداوند دے وفادار بنڑے راہو۔

²⁴ او نیک بندہ ہا تے اِیمان تے رُوح القُدس نال بھریا ہویا ہا۔ تے بہُوں سارے لوک خُداوند دی کلیسیا ءچ شامل تھی گئے۔

²⁵ وَل برنباس ساؤل دی گولھ ءچ تَرسُس کُوں روانہ تھی گِیا۔

²⁶ تے جِیں ویلے او مِلیا تاں اُونکُوں انطاکِیہ ءچ گِھن آیا۔ تے ساؤل تے برنباس ہِک سال تئیں اُتھاں دی کلیسیا ءچ شامل تھیندے تے بہُوں سارے لوکاں کُوں تعلیم ڈیندے ریہے۔ شاگرد پہلی پھیری انطاکِیہ ءچ ای مسیحی اکھوائے۔

²⁷ اُونہی ڈینہاں ءچ کُجھ نبی یروشلیم کنُوں انطاکِیہ ءچ آئے۔

²⁸ اُنہاں ءچوں ہِک بندے جِیندا ناں اگبُس ہا، کھڑا تھی تے رُوح القُدس دی ہدایت نال ایہ نبُوّت کیتی جو ساری دُنیا ءچ وڈا کال پوسی۔ (ایہ کلَودِیُس دے عہد ءچ پِیا۔)

²⁹ بس شاگرداں فیصلہ کیتا جو آپنڑی آپنڑی مالی حیثیت دے مطابق، یہُودیہ ءچ راہنڑ آلے بِھرانواں دی مدد کیتے کُجھ نہ کُجھ بھیجُوں۔

³⁰ بس اُنہاں اِینویں ای کیتا تے ساؤل تے برنباس دے ہتھیں آپنڑی مالی مدد بزُرگاں کُوں بھجوا ڈِتی۔