اعمال 1 - کِتاب مُقدّس سرائیکی ترجمہ

تعارف

¹ تِھیُفِلُس! مَیں آپنڑی پہلی کتاب ءچ اُنہاں گالھیں کُوں لِکھے جیہڑیاں یسُوع شروع ءچ کریندا تے سکھیندا ریہا،

² اُوں ڈینہہ تئیں جِیں ویلے او اسمان اُتے چاتا گِیا۔ چاتے ونجنڑ تُوں پہلے اُوں آپنڑے چُنڑے ہوئے رسُولاں کُوں رُوح القُدس دے وسیلہ نال ہدایت کیتی۔

³ ڈُکھ سہنڑ تُوں بعد اُوں آپنڑے آپ کُوں رسُولاں اُتے ظاہر کر تے، آپنڑے زندہ ہووݨ دے بہُوں سارے ثبوت ڈِتے۔ چالیہہ ڈینہہ تئیں او اُنہاں کُوں نظر آندا تے خُدا دی بادشاہی دے بارے ءچ ڈسیندا ریہا۔

⁴ جِیں ویلے او اُنہاں دے نال ہا تاں اُوں اُنہاں کُوں حُکم ڈِتا، ”یروشلیم کنُوں باہر نہ وَنجائے بلکہ باپ دے اُوں وعدے دے پُورے تھیوݨ دا اِنتظار کرائے جِیندا ذِکر تُساں مَیں کنُوں سُنڑ چُکے ہیوے۔

⁵ کیوں جو یُوحنّا تاں پانڑی نال بپتسمہ ڈِتا پر تُساں تھوڑے ڈینہاں دے بعد رُوح القُدس نال بپتسمہ پےسو۔“

یسُوع دا اسمان اُتے چایا ونجنڑاں

⁶ جِیں ویلے رسُول یسُوع دے نال ہِک جاہ تے جمع ہَن تاں اُوں کنُوں ایہ پُچھیا، ”اے خُداوند! کیا تُساں اِیں ویلے ای اِسرائیل دی بادشاہی بحال کریسو؟“

⁷ اُوں اُنہاں کُوں آکھیا، ”اُنہاں وقتاں تے معیاداں کُوں جاننڑاں جِنہاں کُوں باپ آپنڑے اِختیار ءچ رکھے، تُہاڈا کم نئیں۔

⁸ پر جِیں ویلے رُوح القُدس تُہاڈے اُتے نازل تھیسی تاں تُہاکُوں قوت مِلسی تے تُساں یروشلیم تے یہُودیہ تے سامریہ دے سارے علاقے ءچ بلکہ زمین دی اِنتہا تئیں میڈے گواہ ہوسو۔“

⁹ ایہ آکھ تے او اُنہاں دے ڈیدھے ڈیدھے اُتے چا گِھدا گِیا تے بدّل اُونکُوں اُنہاں دے اکھیں کنُوں لُکا گِھدا۔

¹⁰ او حالی تئیں اُونکُوں اسمان دو ویندے ہوئے غور نال ڈیدھے پئے ہَن جو ڈیکھو ڈُو مرد سفید پُشاک ءچ اُنہاں دے کولھ آ کھڑے تھئے،

¹¹ تے آکھنڑ لگے ”گلیل دے مردو! تُساں کھڑے کھڑے اسمان دو کیوں ڈیدھے پئے ہیوے؟ اِیہو یسُوع جیہڑا تُہاڈے سامنڑے اسمان اُتے چا گِھدا گِیا ہے اِینویں ای ولا آسی جِینویں تُساں اُونکُوں اسمان دو ویندے ڈِٹھے۔“

یہُوداہ اِسکریُوتی دا جانشین

¹² وَل او اُوں پہاڑ تُوں جیہڑا زیتون دا اکھویندے تے یروشلیم کنُوں ادھے مِیل دے فاصلے تے ہے، یروشلیم کُوں واپس گئے۔

¹³ شہر ءچ داخل تھی تے او اُوں چوبارے اُتے گئے جِتھاں او یعنی پطرس، یُوحنّا، یعقُوب، اندریاس، فِلپُس، توما، بَرتُلمائی، متّی، حلفئی دا پوتر یعقُوب، شمعون جیہڑا حُریت پسند اکھویندا ہا تے یعقُوب دا پوتر یہُوداہ راہندے ہَن۔

¹⁴ ایہ سارے اُنہاں عورتاں تے یسُوع دی ماء مریم تے اُوندے بِھرانواں نال کٹھے تھی تے دُعا کریندے ریہے۔

¹⁵ اُنہاں ڈینہاں ءچ پطرس بِھرانواں دی جماعت ءچ جیہڑے تقریباً ہِک سو وِیہہ دے نیڑے ہَن، کھڑا تھی تے آکھنڑ لگا،

¹⁶ ”بِھراؤ! اُوں نوِشتہ دا پُورا تھیوݨ ضرور ہا، جیہڑا رُوح القُدس پہلے ای داؤد دی زبان کنُوں اکھوا ڈِتا ہا۔ او گالھ یہُوداہ دے بارے ءچ ہئی جئیں یسُوع کُوں پکڑواوݨ آلیاں دی راہنمائی کیتی ہئی،

¹⁷ بھانویں او ساڈے نال شمار کیتا گِیا تے اُوں اِیں خدمت دا حصہ پاتا۔“

¹⁸ (بدکاری دی کمائی ہوئی رقم نال اُوں ہِک کھیت مُل گِھدا۔ اُتھاں او سر دے بھار ڈھٹھا تے اُوندا پیٹ پھٹ گِیا تے اُوندیاں آندراں باہر نِکل آئیاں۔

¹⁹ یروشلیم دے سبھ لوکاں کُوں اِیں گالھ دا پتہ لگ گِیا، اِتُھوں تئیں جو اُنہاں آپنڑی زبان ءچ اُوں کھیت دا ناں ای ہَقَل دما رکھ ڈِتا جِیندا مطلب ہے خون دا کھیت۔)

²⁰ پطرس وَل آکھیا، ”زبُور ءچ لِکھیا ہے جو ’اُوندا گھر برباد تھی ونجے تے اُوندے ءچ راہنڑ آلا کوئی نہ ہووے‘ تے ’اُوندی خدمت کوئی بِیا گِھن گِھنے۔‘

^21-22 بس جِتّی عرصہ تئیں خُداوند یسُوع ساڈے نال آندا ویندا ریہا، یعنی یُوحنّا دے بپتسمہ تُوں گِھن تے خُداوند دے ساڈے کولُھوں اُتے چا گِھدے ونجنڑ تئیں جیہڑے لوک مسلسل ساڈے نال ریہے، چاہیدا ہے جو اُنہاں ءچوں ہِک بندہ ساڈے نال یسُوع دے زندہ تھیوݨ دا گواہ بنڑے۔“

²³ وَل اُنہاں ڈُو بندے پیش کیتے، ہِک دا ناں یُوسف جیہڑا برسبّا اکھویندے تے جِیندا لقب یُوستُس ہے، تے ڈُوجھا متّیاہ کُوں۔

²⁴ تے ایہ آکھ تے دُعا کیتی جو ”اے خُداوند! تُوں جیہڑا سبھ دے دِلاں کُوں جانڑدا ہیں، ساڈے اُتے ظاہر کر جو اِنہاں ڈوہائیں ءچوں تُوں کِینکُوں چُنڑیا ہے،

²⁵ جو او رسُول ہووݨ تے اِیں خدمت دی ذمہ داری چاوے جِینکُوں یہُوداہ چھوڑ تے اُوں جاہ چلیا گِیا جیندے او لائق ہا۔“

²⁶ وَل اُنہاں ڈوہاں دے ناں دی پرچی پاتی تے متّیاہ دا ناں نِکلیا۔ بس او اُنہاں یارہاں رسُولاں دے نال شمار کیتا گِیا۔