2 تِیمُتھِیُس 3 - کِتاب مُقدّس سرائیکی ترجمہ

آخری زمانہ

¹ پر ایہ جاݨ گِھن جو اخیر زمانے ءچ بہُوں بُرے ڈینہہ آسن۔

² لوک خود غرض، پیسیاں دے لالچی، شیخی مارݨ آلے، تکبر کرݨ آلے، چُغلی کرݨ آلے، ماء پِیُو دے نا فرمان، نا شُکرے، ناپاک،

³ محبت تُوں خالی، سخت دل، بدنام کرݨ آلے، آپنڑے نفس اُتے قابو نہ رکھنڑ آلے، ظالم، نیکی دے دُشمنڑ،

⁴ دوکھے باز، بے پرواہ، مغرُور تے خُدا دی نسبت عیش و عشرت کُوں زیادہ پسند کرݨ آلے ہوسن۔

⁵ او دیندار تاں لگسن پر زندگی ءچ دینداری دا کوئی اثر قبول نہ کریسن۔ ایجھیاں کنُوں دُور ای راہویں۔

⁶ اِنہاں ءچ کُجھ ایجھے وی ہِن جیہڑے چُپ چپیتے گھراں ءچ وڑ آندے ہِن تے چھچھوری عورتاں کُوں آپنڑے قابو ءچ کر گِھندے ہِن جیہڑیاں گُناہاں ءچ دبیاں ہوندیاں ہِن تے طرحاں طرحاں دیاں بُریاں خواہشاں دے تابع راہندیاں ہِن۔

⁷ ایہ عورتاں تعلیم حاصل کریندیاں راہندیاں ہِن پر سچائی دی پچھاݨ تئیں کڈھائیں نئیں پُجدیاں۔

⁸ جِینویں جادُوگر ینیّس تے یمبریس مُوسیٰ دی مخالفت کیتی ہئی، اُونویں ای ایہ لوک وی سچائی دی مخالفت کریندے ہِن۔ اُنہاں دا دماغ وِگڑ گئے ہِن تے ایہ اِیمان دے لحاظ نال نا مقبول ہِن۔

⁹ پر ایہ زیادہ کامیاب نہ تھی سگسنڑ کیوں جو اُنہاں دی نادانی سبھ لوکاں اُتے ظاہر تھی ویسی جِینویں اُنہاں جادُوگراں دی تھئی ہئی۔

آخری ہدایات

¹⁰ پر تُوں تعلیم ءچ، چال چلنڑ ءچ، مقصد ءچ، اِیمان ءچ، صبر ءچ، محبت ءچ، برداشت ءچ،

¹¹ ستائے ونجنڑ تے ڈُکھ چاوݨ ءچ میڈی پیروی کیتی۔ تُوں جانڑدیں جو انطاکِیہ، اکُنیُم تے لُسترہ ءچ میڈے اُتے کِتنے ڈُکھ آئے پر خُداوند میکُوں اُنہاں ساریاں تُوں رہائی بخشی۔

¹² اصل ءچ سبھ لوک جیہڑے مسیح یسُوع ءچ دینداری دی زندگی گُزارݨ چاہندے ہِن، او سبھ ستائے ویسن۔

¹³ تے بدکار تے دوکھے باز لوک فریب ڈیندے ڈیندے تے فریب کھاندے کھاندے وِگڑدے ویسن۔

¹⁴ پر تُوں اِنہاں گالھیں اُتے قائم رہ جیہڑیاں تَیں سکھیاں ہِن تے جِنہاں دا تیکُوں پُورا یقین ہے، کیوں جو تُوں جانڑدا ہیں جو اِنہاں گالھیں کُوں سِکھاوݨ آلے کوݨ ہِن۔

¹⁵ تے تُوں چھوٹے لا کنُوں خُدا دے پاک صحیفیاں تُوں واقف ہیں جیہڑے تیکُوں مسیح یسُوع اُتے اِیمان گِھن آوݨ نال نجات حاصل کرݨ دی دانائی بخش سگدن۔

¹⁶ ہر ہِک مُقدّس صحیفہ خُدا دے اِلہام کنُوں ہے تے او تعلیم ڈیوݨ، ملامت کرݨ، اصلاح کرݨ تے راستبازی ءچ تربیت ڈیوݨ کیتے مفید ہے۔

¹⁷ تاں جو خُدا دا بندہ کامِل بنڑے تے ہر ہِک نیک کم کرݨ کیتے تیار تھی ونجے۔