2تھِسّلُنیکیوں 2 - کِتاب مُقدّس سرائیکی ترجمہ

گُناہ دا بندہ

¹ بِھراؤ! اساں آپنڑے خُداوند یسُوع مسیح دی ڈُوجھی آمد تے اُوندے کولھ جمع تھیوݨ دے بارے ءچ تُہاکُوں ایہ درخاست کریندے ہیں،

² جو جڈاں لوک دعویٰ کرݨ جو کہیں اِلہام یا پیغام تُوں یا ساڈی طرفوں کہیں خط تُوں پتا چلے جو خُداوند دے واپس آوݨ دا ڈینہہ آ گئے تاں تُساں پریشان نہ تھیوائے تے نہ گھبرائے۔

³ تُساں کہیں دے دوکھے ءچ نہ اوائے۔ کیوں جو او ڈینہہ اُوں ویلے تئیں نہ آسی جئیں تئیں خُدا دے خلاف وڈی بغاوت نہ تھی ونجے تے او بدکار ظاہر نہ تھی ونجے جِیندا انجام ہلاکت ہے۔

⁴ او ہر ہِک دی مخالفت کریسی جیہڑا معبُود اکھویندے یا جیندی پُوجا تھیندی ہے تے آپنڑے آپ کُوں اُنہاں تُوں وڈا بنڑیسی۔ اِتُھوں تئیں جو او خُدا دی ہیکل ءچ بہہ تے دعویٰ کریسی جو او خُدا ہے۔

⁵ کیا تُہاکُوں یاد نئیں جو جِیں ویلے مَیں تُہاڈے نال ہم تاں تُہاکُوں ایہ گالھیں ڈسیندا راہندا ہم؟

⁶ تے تُساں جانڑدے ہیوے جو کیا کُچھ اُوں بدکار کُوں روکی پئے تاں جو او صرف آپنڑے مقرر وقت اُتے ظاہر تھیوے۔

⁷ کیوں جو بدی دی لُکی ہوئی طاقت ہُنڑ وی آپنڑا اثر کریندی پئی ہے، پر ہِک روکنڑ آلا وی ہے تے جئیں تئیں او روکنڑ آلا رستے کنُوں ہٹایا نہ ونجے او اُوں بدکار کُوں روکی رکھیسی۔

⁸ وَل او بدکار ظاہر تھیسی جِینکُوں خُداوند یسُوع آپنڑے مُنہ دی پُھوک نال مار سٹیسی تے آپنڑی آمد دے جلال نال برباد کر ڈیسی۔

⁹ اِیں بدکار دی آمد شیطان دے اثر دے مطابق ہر طرحاں دی کُوڑی قُدرت، نشاناں تے معجزیاں نال ہوسی۔

¹⁰ تے او ہلاک تھیوݨ آلیاں کیتے بُرائی دے ہر طرحاں دے دوکھے استعمال کریسی۔ او لوک اِیں واسطے ہلاک تھیسن جو اُنہاں حق کُوں قبول کرݨ تُوں اِنکار کیتے جیندے وسیلے او نجات پا سگدے ہَن۔

¹¹ اِیں واسطے خُدا اُنہاں کُوں گُمراہی ءچ پھسنڑ ڈیندے تاں جو او کُوڑ کُوں سچ مننڑ۔

¹² تے جِتّی لوک سچائی دا یقین نئیں کریندے بلکہ بُرائی کُوں پسند کریندے ہِن، او سبھ سزا پیسن۔

تُساں نجات کیتے چُنڑے گئے ہیوے

¹³ پر بِھراؤ تے خُداوند دے پیاریو! تُہاڈے کیتے خُدا دا شُکر کریندے راہوݨ ساڈے اُتے فرض ہے کیوں جو اُوں تُہاکُوں شروع کنُوں ای چُنڑ گِھدے جو تُساں رُوح القُدس دے ذریعے پاکیزگی حاصل کر تے، تے حق اُتے اِیمان گِھن آ تے نجات پاؤ۔

¹⁴ خُدا تُہاکُوں اِیں نجات کیتے ساڈی سُنڑائی ہوئی خوشخبری دے ذریعے سڈیا تاں جو تُساں ساڈے خُداوند یسُوع مسیح دے جلال ءچ شامل تھی ونجو۔

¹⁵ اِیں واسطے بِھراؤ! ثابت قدم راہو تے اُنہاں تعلیمات اُتے قائم راہو جیہڑیاں تُساں ساڈی زبانی سُنڑیاں یا ساڈے خط دے ذریعے سِکھیاں۔

¹⁶ ہُنڑ ساڈا خُداوند یسُوع مسیح خود تے ساڈا باپ خُدا جئیں ساڈے نال محبت رکھی تے آپنڑے فضل نال ابدی تسلی تے چنگی اُمید بخشی،

¹⁷ تُہاڈے دِلاں کُوں تسلی بخشے تے ہر نیک کم تے کلام ءچ تُہاکُوں مضبوط کرے۔