2 پطرس 3 - کِتاب مُقدّس سرائیکی ترجمہ

مسیح دی ڈُوجھی آمد دا وعدہ

¹ عزیزو! ایہ ڈُوجھا خط ہے جیہڑا مَیں تُہاکُوں لِکھدا پِیا ہاں۔ مَیں ڈُوہائیں خطاں ءچ تُہاڈی یاداشت کُوں تازہ کر تے تُہاڈے ذہناں ءچ پاک سوچ کُوں اُبھارݨ دی کوشش کیتی۔

² مَیں چاہندا ہاں جو تُساں پاک نبیاں دیاں پیشن گوئیاں تے ساڈے خُداوند تے نجات ڈیوݨ آلے دے حُکم کُوں یاد رکھو جیہڑا اساں رسُولاں دے ذریعے تُہاڈے تئیں پُجیا ہے۔

³ سبھ تُوں پہلے تُہاکُوں ایہ سمجھنڑا چاہیدے جو آخری ڈینہاں ءچ ایجھے ٹھٹّھا باز لوک آسن جیہڑے آپنڑیاں نفسانی خواہشاں دے مطابق زندگی گُزریسن،

⁴ تے اکھیسن، ”مسیح دے آوݨ دا وعدہ کِتھاں گِیا؟ ساڈے پِیُو ڈاڈا تاں مر گئے تے دُنیا دے خلق تھیوݨ تُوں ہُنڑ تئیں سبھ کُجھ اِینویں ای ہے۔“

⁵ او جاݨ بُجھ تے بُھل گئے جو اسمان خُدا دے کلام دے ذریعے بہُوں پہلے تُوں بنڑائے گئے، تے زمین پانڑی ءچوں تے پانڑی دے ذریعے بنڑی۔

⁶ تے اُوہو پانڑی دے ذریعے اُوں وقت دی دُنیا بُڈ تے تباہ تھی گئی۔

⁷ تے موجودہ اسمان تے زمین خُدا دے کلام دے وسیلہ نال بھاہ ءچ ساڑے ونجنڑ کیتے رکھے گئے ہِن۔ او بے دیناں دی عدالت تے ہلاکت دے ڈینہہ تئیں محفوظ راہسن۔

⁸ عزیزو! ہِک گالھ کڈھائیں نہ بُھلائے جو خُداوند دی نظر ءچ ہِک ڈینہہ ہزار سال تے ہزار سال ہِک ڈینہہ دے برابر ہِن۔

⁹ خُداوند آپنڑا وعدہ پُورا کرݨ ءچ دیر نئیں کریندا جِینویں کُجھ لوک سمجھدے ہِن، بلکہ او تُہاڈے کیتے صبر کریندے، کیوں جو او کہیں دی ہلاکت نئیں چاہندا بلکہ چاہندے جو ہر کوئی توبہ کرے۔

¹⁰ پر خُداوند دے واپس آوݨ دا ڈینہہ چور وانگُوں آ ویسی۔ اُوں ڈینہہ اسمان بہُوں خوفناک اواز نال غائب تھی ویسن، تے اسمان دیاں سبھ چیزاں بھاہ دی شِدت کنُوں پگھر ویسن تے زمین تے اُوندے اُتے دے سبھ کم ظاہر تھی ویسن۔

¹¹ جِیں ویلے سبھ چیزاں اِینویں پگھرݨ آلیاں ہِن تاں تُہاکُوں کیجھے لوک ہوونڑا چاہیدے؟ تُہاکُوں تاں بہُوں ای پاکیزگی تے پرہیزگاری دی زندگی گُزریندے ہوئے

¹² خُدا دے اُوں ڈینہہ دے بہُوں مُشتاق تے اِنتظار ءچ راہونڑا چاہیدے جو او جلد آسی۔ اُوں ڈینہہ اسمان بھاہ نال سڑ تے برباد تھی ویسی تے اسمان دیاں سبھ چیزاں بھاہ دی شِدت کنُوں پگھر ویسن۔

¹³ پر اساں خُدا دے وعدے دے مطابق نویں اسمان تے نوِیں زمین دے اِنتظار ءچ ہیں جِتھاں راستبازی سکونت کریندی ہے۔

¹⁴ بس عزیزو، کیوں جو تُساں اِنہاں گالھیں دے اِنتظار ءچ ہیوے، اِیں واسطے پُوری کوشش کرو جو تُساں خُدا دے نال صُلح ءچ اُوندے نزدیک بے داغ تے بے اِلزام تے ثابت تھیؤ۔

¹⁵ ساڈے خُداوند دے صبر کُوں نجات حاصل کرݨ دا موقع سمجھو، جِینویں ساڈے عزیز بِھرا پولُس وی اُوں حِکمت دے مطابق جیہڑی خُدا اُونکُوں ڈِتی ہے، تُہاکُوں لِکھیا ہے۔

¹⁶ او آپنڑے سبھ خطاں ءچ اِنہاں گالھیں دا ذِکر کریندے۔ اُوندے کُچھ گالھیں دا سمجھنڑ مُشکل ہے، تے احمق تے بے قیام لوک اُنہاں دے معنی کُوں اِینویں تروڑ مروڑ تے پیش کریندے ہِن، جِینویں او ڈُوجھے صحیفیاں نال وی کریندے ہِن۔ او آپنڑے کیتے تباہی پیدا کریندے ہِن۔

¹⁷ اِیں واسطے عزیزو! تُساں جیہڑے اِنہاں گالھیں تُوں پہلے ای خبردار ہیوے، ہوشیار راہو، اِینویں نہ تھیوے جو بدکاراں دے غلط گالھیں تُہاکُوں گُمراہ کر تے محفوظ جاہ تُوں ہٹا ڈیوݨ۔

¹⁸ بلکہ ساڈے خُداوند تے نجات ڈیوݨ آلے یسُوع مسیح دے فضل تے علم ءچ ودھدے ونجو۔ اُوندی تعریف ہُنڑ وی تھیوے تے ہمیشاں تئیں تھیندی راہوے۔ آمین۔