2 پطرس 2 - کِتاب مُقدّس سرائیکی ترجمہ

کُوڑے اُستاد

¹ پر جِینویں بنی اِسرائیل ءچ کُوڑے نبی وی ہَن، اُونویں ای تُہاڈے ءچ وی کُوڑے اُستاد ہوسن۔ او چلاکی نال ہلاک کرݨ آلیاں بِدعتاں کِھنڈیسن، بلکہ آپنڑے اُوں مالک دا اِنکار کریسن جئیں اُنہاں کُوں مُل گِھدا ہا۔ ایجھے کماں نال او آپنڑے اُتے جلد ہلاکت گِھن آسن۔

² بہُوں سارے لوک اُنہاں دی شہوت پرستی دی پیروی کریسن جیندے سببّوں سچائی دی راہ دی بدنامی تھیسی۔

³ لالچ دے سببّوں ایہ اُستاد فرضی گالھیں سُنڑا تے تُہاڈے تُوں ناجائز فائدہ چیسن۔ پر اُنہاں دی سزا دا حُکم بہُوں پہلے کنُوں تھی گئے، تے او سزا تیار ہے تے اُنہاں دی ہلاکت ءچ دیر نہ تھیسی۔

⁴ ڈیکھو، خُدا اُنہاں فرشتیاں کُوں نئیں چھوڑیا جِنہاں گُناہ کیتا، بلکہ اُنہاں کُوں اندھارے دیاں زنجیراں نال بَدھ تے دوزخ ءچ سَٹ ڈِتا تاں جو عدالت دے ڈینہہ تئیں قید ءچ راہوݨ۔

⁵ اِینویں ای خُدا قدیم دُنیا کُوں نہ چھوڑیا بلکہ دُنیا دے بے دین لوکاں اُتے طوفان بھیج تے صرف راستبازی دی منادی کرݨ آلے نُوح کُوں بئے سَت لوکاں سمیت بچا گِھدا۔

⁶ تے خُدا سدُوم تے عمُورہ دے شہراں کُوں ہلاکت دے لائق قرار ڈے تے اُنہاں کُوں ساڑ تے سواہ کر ڈِتا تے آوݨ آلے زمانہ دے بے دیناں کیتے عِبرت دا نشان بنڑا ڈِتا۔

⁷ پر راستباز لُوط کُوں بچایا جیہڑا بدکاراں دے گندے چال چلنڑ تُوں تنگ ہا۔

⁸ کیوں جو اُنہاں دے وچال راہندے ہوئے، اُوں راستباز آدمی دا پاک دل اُنہاں دے بُرے کماں کُوں ڈیکھ تے، تے سُنڑ تے عذاب ءچ راہندا ہا۔

⁹ تاں ظاہر ہے جو خُداوند دیندار لوکاں کُوں ازمائش تُوں بچاوݨ تے بے دین لوکاں کُوں عدالت دے ڈینہہ تئیں سزا ءچ رکھنڑ جانڑدے

¹⁰ خاص کر اُنہاں کُوں جیہڑے آپنڑے جِسم دیاں گندیاں خواہشاں دی پیروی کریندے ہِن تے اِختیار کُوں حقیر سمجھدے ہِن۔ ایہ لوک گُستاخ تے مغرُور ہِن تے جلالی ہستیاں دی توہین کرݨ تُوں نئیں ڈردے۔

¹¹ حالانکہ اِیندے مُقابلہ ءچ فرشتے وی، جیہڑے طاقت تے قُدرت ءچ اُنہاں تُوں وڈے ہِن، خُداوند دے سامنڑے لعن طعن کر تے اُنہاں ہستیاں اُتے اِلزام نئیں لیندے۔

¹² پر ایہ کُوڑے اُستاد، آپنڑی فطرت اُتے چلنڑ آلے ناسمجھ جانوراں وانگُوں ہِن جیہڑے اِیں واسطے پیدا تھئے ہِن جو اُنہاں کُوں پکڑیا تے ختم کیتا ونجے۔ او اُوندی توہین کریندے ہِن جیہڑا کُجھ او نئیں سمجھدے، تے اُنہاں دی بربادی ءچ او وی برباد تھی ویسن۔

¹³ ڈُوجھیاں کُوں نُقصان پُچاوݨ دے بدلے ءچ اُنہاں کُوں نُقصان تھیسی۔ اُنہاں دے نیڑے لُطف چاوݨ تُوں مُراد ایہ ہے جو ڈینہہ ویلے کُھل تے عیاشی کرݨ۔ او داغ تے دھبے ہِن جیہڑے تُہاڈے نال رفاقتی کھانڑے ءچ شریک تھی تے عیاشیاں کریندے ہِن۔

¹⁴ اُنہاں دے اکھیں ہر ویلے زِناکار عورتاں دی گولھ ءچ راہندیاں ہِن، تے گُناہ کرݨ تُوں کڈھائیں باز نئیں آندیاں۔ او کمزور لوکاں کُوں غلط کم کرݨ کیتے ورغلیندے ہِن تے لالچ کرݨ ءچ ماہر ہِن۔ او لعنتی ہِن۔

¹⁵ او صحیح راہ کُوں چھوڑ تے گُمراہ تھی گئے ہِن تے بلعام بِن بعور دے رستے اُتے ٹُردے پئے ہِن جئیں بُرے کماں دی مزدُوری کُوں پسند کیتا۔

¹⁶ پر گڈھاں اُونکُوں اِیں گُناہ پارُوں ملامت کیتی۔ اُوں جانور، جیہڑا بولنڑ دے قابل نہ ہا، اِنسان جیہی اواز ءچ گالھ کیتی تے نبی کُوں اُوندی بیوقُوفی کنُوں روکیا۔

¹⁷ ایہ لوک سُکے ہوئے چشمے تے اندھاری دے اُڈائے ہوئے بدّل ہِن۔ اِنہاں کیتے سخت اندھارا مقرر ہے۔

¹⁸ ایہ لوک غرور دیاں فضول گالھیں کریندے ہِن، تے بے ہُودہ جسمانی خواہشاں نال ایجھے لوکاں کُوں ورغلیندے ہِن جیہڑے گُمراہی ءچ راہوݨ آلیاں ءچوں ہُنڑیں ہُنڑیں بچ نِکلے ہِن۔

¹⁹ ایہ کُوڑے اُستاد اُنہاں دے نال تاں ازادی دا وعدہ کریندے ہِن پر خود بُرائی دے غُلام بنڑے پئے ہِن۔ کیوں جو جیہڑی چیز اِنسان اُتے غالب آ ویندی ہے، اِنسان اُوندی غُلامی ءچ ہوندے۔

²⁰ تے جے او لوک خُداوند تے نجات ڈیوݨ آلے یسُوع مسیح دی پچھاݨ دے وسیلہ نال دُنیا دی گندگی کنُوں چُھٹ تے ولا کنُوں اُوندے ءچ پَھس ونجنڑ تے اُوندے قبضے ءچ آ ونجنڑ، تاں اُنہاں دی حالت پہلی حالت کنُوں وی بدتر تھی ویندی ہے۔

²¹ جِنہاں صداقت دی راہ کُوں جاݨ تاں گِھدا پر اُوں پاک حُکم کنُوں پِھر گئے جیہڑا اُنہاں کُوں ڈِتا گِیا ہا، تاں اُنہاں کیتے اِیہو چنگا ہا جو اِیں راہ کُوں کڈھائیں نہ جانڑدے۔

²² اُنہاں اُتے ایہ کہاوت سچ آندی ہے جو ”کُتا آپنڑی اُلٹی دو واپس آندے“ تے ”دھاتی ہوئی سُورنی ولا چِکڑ ءچ ویندی ہے۔“