2 یُوحنّا 1 - کِتاب مُقدّس سرائیکی ترجمہ

تعارف

¹ ایہ خط مَیں بزُرگ دی طرفوں، خُدا دی اُوں چُنڑی ہوئی بی بی تے اُوندے فرزنداں دے ناں ہے جِنہاں نال نہ صرف مَیں بلکہ او سارے جیہڑے سچائی کنُوں واقف ہِن، سچی محبت رکھیندے ہِن،

² کیوں جو سچائی ساڈے ءچ قائم راہندی ہے تے ہمیشاں تئیں ساڈے نال راہسی۔

³ خُدا باپ تے باپ دے پوتر یسُوع مسیح دی طرفوں سچائی تے محبت سمیت فضل، رحم تے اِطمینان ساڈے نال راہسن۔

سچائی تے محبت

⁴ جِیں ویلے میکُوں پتہ چلیا جو تیڈے کُچھ فرزند باپ دے حُکم دے مطابق سچائی اُتے ٹُردے ریہے ہِن تاں میکُوں خوشی تھئی۔

⁵ مَیں مِنت کریندا ہاں جو اساں سبھ ہِک ڈُوجھے نال محبت رکھوں۔ ایہ کوئی نواں حُکم نئیں جیہڑا میں لِکھدا پِیا ہاں، بلکہ اُوہو جیہڑا شروع کنُوں ساڈے کولھ ہے۔

⁶ محبت ایہ ہے جو اساں خُدا دے حُکماں اُتے عمل کرُوں۔ ایہ اُوہو حُکم ہے جیہڑا تُساں شروع کنُوں سُنڑیا ہے، تے تُہاکُوں اُوندے اُتے عمل کرنڑا چاہیدے۔

⁷ کیوں جو گُمراہ کرݨ آلے بہُوں سارے لوک دُنیا ءچ نِکل آئے ہِن جیہڑے یسُوع مسیح دے اِنسانی جِسم ءچ آوݨ دا اِنکار کریندے ہِن۔ ایجھا ہر بندہ گُمراہ کرݨ آلا تے مسیح دا مخالف ہے۔

⁸ خبردار راہو جو جِنہاں چیزاں کیتے اساں محنت کیتی ہے او تُہاڈے ہتُھوں نِکل نہ ونجنڑ بلکہ تُہاکُوں پُورا اجر مِلے۔

⁹ ہر کوئی جیہڑا مسیح دی تعلیم اُتے قائم نئیں راہندا بلکہ اگُوں ودھ ویندے، اُوندے کولھ خُدا نئیں۔ جیہڑا وی یسُوع دی تعلیم اُتے قائم راہندے اُوندے کولھ باپ تے پوتر ڈُوہائیں ہِن۔

¹⁰ جے کوئی تُہاڈے کولھ آوے پر ایہ تعلیم نہ ڈیوے تاں اُونکُوں آپنڑے گھر ءچ داخل نہ تھیوݨ ڈیؤ بلکہ سلام وی نہ کرو۔

¹¹ کیوں جو جیہڑا کوئی ایجھے بندے کُوں سلام کریندے او اُوندے بُرے کماں ءچ شریک تھیندے۔

آخری گالھیں

¹² میکُوں لِکھنڑاں تاں بہُوں کُجھ ہے پر میں اُونکُوں کاغذ تے قلم نال لِکھ تے نئیں بھیجنڑا چاہندا بلکہ اُمید رکھیندا ہاں جو تُہاڈے کولھ آ تے آمنڑے سامنڑے گالھ کریساں تاں جو ساڈی خوشی پُوری تھی ونجے۔

¹³ خُدا دی چُنڑی ہوئی تیڈی بھینڑ دے فرزند، تیکُوں سلام آدھے ہِن۔