2کُرِنتھِیوں 8 - کِتاب مُقدّس سرائیکی ترجمہ

مسیحی خیرات

¹ بِھراؤ! اساں تُہاکُوں خُدا دے اُوں فضل دے بارے ءچ ڈسیندے ہیں جیہڑا مَکِدُنیہ دی کلیسیاواں اُتے تھئے،

² جو کِینویں سخت مُصیبت دی ازمائش ءچ وی اُنہاں دی وڈی خوشی تے سخت غریبی، اُنہاں دی سخاوت کُوں بہُوں ودھا ڈِتا۔

³ مَیں اِیں گالھ دا گواہ ہاں جو جِتّی او ڈے سگدے ہَن، اُنہاں ڈِتا بلکہ گُنجائش تُوں وی زیادہ آپنڑی خوشی نال ڈِتا۔

⁴ اُنہاں وڈے زور نال ساکُوں مِنت کیتی جو مُقدّساں کُوں خیرات ڈیوݨ ءچ ساکُوں وی شریک تھیوݨ ڈیؤ۔

⁵ تے صرف ساڈی اُمید دے مطابق ای نئیں ڈِتا بلکہ پہلے آپنڑے آپ کُوں خُداوند کیتے وقف کیتا تے وَل خُدا دی مرضی نال ساڈے کیتے وی۔

⁶ اِیں واسطے اساں طِطُس کُوں نصیحت کیتی جو جِینویں اُوں اِیں خیرات دے کم کُوں پہلے شروع کیتا ہا، اُونویں ای تُہاڈے ءچ اِیں کم کُوں پُورا کرے۔

⁷ بس جِینویں تُساں ہر گالھ ءچ یعنی اِیمان، کلام، علم، جوش تے ساڈے نال محبت ءچ ودھدے ویندے ہیوے، اُونویں ای اِیں خیرات دے کم ءچ وی اگُوں ودھدے ونجو۔

⁸ مَیں تُہاکُوں اِینویں کرݨ دا حُکم نئیں ڈیندا پِیا بلکہ ڈُوجھیاں دے جوش دے مُقابلہ ءچ تُہاڈی محبت دی سچائی کُوں ازمیندا پِیا ہاں۔

⁹ کیوں جو تُساں ساڈے خُداوند یسُوع مسیح دے فضل کُوں جانڑدے ہیوے جو او بھانویں دولت مند ہا، وَل وی تُہاڈی خاطر غریب بنڑ گِیا تاں جو تُساں اُوندی غریبی دے سببّوں دولت مند بنڑ ونجو۔

¹⁰ ہُنڑ اِیں معاملے دے بارے ءچ میڈا مشورہ سُنڑو جو تُہاڈے کیتے کیا فائدہ مند ہے۔ پِچھلے سال تُساں نہ صرف ہدیہ ڈیوݨ ءچ بلکہ ڈیوݨ دے اِرادے ءچ وی سبھ تُوں اگُوں ہَوے۔

¹¹ ہُنڑ اِیں کم کُوں پُورا وی کرو، تاں جو جِینویں تُساں جوش نال اِرادہ کیتے، اُونویں ای آپنڑی گُنجائش دے مطابق اُونکُوں پُورا وی کرو۔

¹² کیوں جو جے ڈیوݨ دی نیّت ہووے تاں خُدا خیرات اُوندے مطابق قبول کریندے جیہڑی ڈیوݨ آلے دے کولھ ہے، نہ جو اُوندے مطابق جیہڑی اُوندے کولھ نئیں۔

¹³ میڈا ایہ مطلب نئیں جو بئیاں کُوں ارام مِلے تے تُہاکُوں تنگی بلکہ برابری ہووے۔

¹⁴ اِیں ویلے تُہاڈے کولھ بہُوں ہے تے تُساں اُنہاں دی کمی پُوری کر سگدے ہیوے تاں جو جڈاں اُنہاں دے کولھ بہُوں ہوسی تاں او تُہاڈی وی کمی پُوری کر سگسن تے اِینویں برابری تھی ویسی۔

¹⁵ جِینویں لِکھیا ہے جو ”جئیں بہُوں کٹھا کیتا اُوندے کولھ زیادہ نہ بچیا تے جئیں گھٹ کٹھا کیتا اُوندے کولھ وی پُورا تھی گِیا۔“

طِطُس تے اُوندے ہم خدمت

¹⁶ خُدا دا شُکر ہے جئیں تُہاڈے کیتے طِطُس دے دل ءچ ایجھا جوش پیدا کیتے جِینویں میڈا تُہاڈے کیتے ہے۔

¹⁷ اُوں نہ صرف ساڈی درخاست قبول کیتی بلکہ او بہُوں جوش تے آپنڑی خوشی نال تُہاڈے دو روانہ تھیّا۔

¹⁸ اساں اُوندے نال اُوں بِھرا کُوں بھجیندے پئے ہیں جیندی تعریف خوشخبری دی تبلیغ کرݨ دے سببّوں سبھ کلیسیاواں ءچ تھیندی پئی ہے۔

¹⁹ تے صرف اِیہو نئیں بلکہ کلیسیاواں اُونکُوں چُنڑ گِھدے جو او ساڈے نال سفر کرے جڈاں اساں خیرات کُوں یروشلیم پُچاؤں۔ اساں ایہ کم خُداوند کُوں جلال ڈیوݨ کیتے تے آپنڑی خدمت دے شوق کُوں ظاہر کرݨ کیتے کریندے ہیں۔

²⁰ اساں اِیں کنُوں بچنڑا چاہندے ہیں جو جِیں خیرات دا اساں اِنتظام کریندے ہیں، اُوندے بارے ءچ کوئی ساڈے اُتے انگل نہ چاوے۔

²¹ اساں پُوری کوشش کریندے ہیں جو اُوہو کم کرُوں جیہڑے نہ صرف خُداوند دی نظر ءچ چنگے ہووݨ بلکہ اِنساناں دی نظر ءچ وی۔

²² اساں اُنہاں ڈُوہائیں بِھرانواں دے نال ہِک بئے بِھرا کُوں وی بھجیندے پئے ہیں جِینکُوں اساں بہُوں سارے گالھیں ءچ چنگی طرحاں ازمایا تے بہُوں پُر جوش ڈِٹھا ہے۔ ہُنڑ کیوں جو تُہاڈے اُتے بہُوں بھروسا ہے، اِیں واسطے او بِیا وی پُر جوش تھی گئے۔

²³ جے کوئی طِطُس دے بارے ءچ پُچھے تاں او میڈا ساتھی تے تُہاڈی مدد کرݨ کیتے میڈا نال خدمت کریندے۔ جے بئے بِھرانواں دے بارے ءچ سوال ہووے تاں او کلیسیاواں دے نمائندے تے مسیح دے جلال دا سبب ہِن۔

²⁴ بس اُنہاں کُوں آپنڑی محبت تے ساڈے اُوں فخر کُوں جیہڑا تُہاڈے اُتے ہے، کلیسیاواں دے سامنڑے ثابت کرو۔