2کُرِنتھِیوں 5 - کِتاب مُقدّس سرائیکی ترجمہ

اسمان اُتے نواں جِسم

¹ اساں جانڑدے ہیں جو جِیں ویلے ایہ تمبُو یعنی ساڈا بدن ڈھا ڈِتا ویسی جیہڑا زمین اُتے ساڈا گھر ہے تاں ساکُوں خُدا کنُوں اسمان اُتے ایجھا گھر مِلسی جیہڑا اِنسانی ہتھ دا بنڑیا ہویا نئیں بلکہ ابدی ہے۔

² اِیں واسطے اساں اِیں موجودہ تمبُو ءچ کراہندے ہیں تے ساکُوں بہُوں سِک ہے جو اساں آپنڑے اسمانی گھر کُوں کپڑیاں وانگُوں پا گِھنوں

³ تاں جو اُونکُوں پا گِھننڑ تُوں بعد ننگے نہ راہوں۔

⁴ اساں اِیں تمبُو ءچ راہندے ہوئے بھار تلے کراہندے ہیں اِیں واسطے نئیں جو اساں اِیں بدن کُوں چھوڑن چاہندے ہیں بلکہ اِیں واسطے جو ڈُوجھا بدن کپڑیاں وانگُوں پا گِھننڑ چاہندے ہیں تاں جو جیہڑا فانی ہے او ابدی زندگی ءچ غرق تھی ونجے۔

⁵ خُدا خود ساکُوں اِیں مقصد کیتے بنڑایا ہے تے رُوح القُدس ساکُوں آوݨ آلیاں چیزاں دے بیعانہ ءچ ڈِتا۔

⁶ بس اساں ہمیشاں حوصلہ رکھیندے ہیں تے ایہ جانڑدے ہیں جو جئیں تئیں اساں بدن دے گھر ءچ ہیں، خُداوند دے گھر کنُوں دُور ہیں

⁷ کیوں جو اساں اِیمان ءچ ٹُردے ہیں نہ جو اکھیں نال ڈیکھنڑ نال۔

⁸ ہا، ساکُوں حوصلہ ہے تے ایہ بدن چھوڑ تے خُداوند دے گھر ءچ راہونڑا ساکُوں زیادہ منظور ہے۔

⁹ بس بھانویں اساں اِیں بدن ءچ راہندے ہوؤں یا نئیں، ساڈا مقصد تاں اُونکُوں خوش کرݨ ہے۔

¹⁰ کیوں جو اساں ساریاں کُوں مسیح دے تختِ عدالت دے سامنڑے حاضر تھیونڑاں ہے تاں جو ہر بندہ آپنڑے کماں دا بدلہ پاوے جیہڑے اُوں آپنڑے بدن ءچ راہندے ہوئے کیتے ہِن، بھانویں چنگے ہِن یا بُرے۔

مسیح دے وسیلے خُدا نال صُلح

¹¹ اساں خُداوند دے خوف کُوں سامنڑے رکھ تے ڈُوجھیاں کُوں سمجھاوݨ دی کوشش کریندے ہیں۔ خُدا دے اگُوں ساڈی حقیقت ظاہر ہے تے میکُوں اُمید ہے جو تُساں وی ساکُوں چنگی طرحاں جانڑدے ہوسو۔

¹² اِیندا مطلب ایہ نئیں جو اساں تُہاڈے سامنڑے ولا کنُوں آپنڑے نیک تھیوݨ دا اعلان کریندے پئے ہیں بلکہ تُہاکُوں موقع ڈیوݨ چاہندے ہیں جو تُساں ساڈے اُتے فخر کرو تے اُنہاں کُوں جواب ڈے سگو جیہڑے دل دے گالھیں اُتے نئیں بلکہ ظاہری گالھیں اُتے فخر کریندے ہِن۔

¹³ جے اساں دیوانے ہیں تاں خُدا کیتے ہیں تے جے ہوش ءچ ہیں تاں تُہاڈے کیتے۔

¹⁴ اساں مسیح دی محبت دے سببّوں مجبور ہیں کیوں جو اساں اِیں نتیجے اُتے پُجے ہیں جو جِیں ویلے مسیح ساریاں کیتے مویا تاں اِیندا مطلب ہے جو سبھ مر گئے۔

¹⁵ تے او اِیں واسطے ساریاں دی خاطر مویا جو جیہڑے زندہ ہِن او اگُوں تے آپنڑے کیتے زندہ نہ راہوݨ بلکہ صرف اُوندے کیتے جیہڑا اُنہاں کیتے مویا تے ولا زندہ تھی گِیا۔

¹⁶ بس ہُنڑ اساں کہیں کُوں دُنیاوی نظر نال نئیں ڈیدھے۔ ہا، بےشک ہِک وقت اساں مسیح کُوں وی اُونویں ای ڈِٹھا ہا پر ہُنڑ اُونکُوں اِینویں نئیں ڈیدھے۔

¹⁷ اِیں واسطے جے کوئی مسیح ءچ ہے تاں او نوِیں مخلوق ہے۔ پُرانڑی زندگی ویندی ریہی، ڈیکھو نوِیں زندگی شروع تھی گئی ہے۔

¹⁸ ایہ سبھ خُدا دی طرفوں ہے جئیں مسیح دے ذریعے ساڈے نال صُلح کر گِھدی تے صُلح کراوݨ دی خدمت ساڈے حوالے کر ڈِتی۔

¹⁹ مطلب ایہ ہے جو خُدا مسیح دے وسیلے دُنیا نال صُلح کیتی تے لوکاں دے گُناہاں کُوں اُنہاں دے ذمہ نہ لایا تے صُلح دا ایہ پیغام اُوں ساڈے حوالے کر ڈِتے۔

²⁰ اِیں واسطے اساں مسیح دے ایلچی ہیں جِینویں جو خُدا ساڈے ذریعے لوکاں کُوں سمجھیندے۔ تے اساں مسیح دی طرفوں تُہاڈی مِنت کریندے ہیں جو ”خُدا نال صُلح کر گِھنو۔“

²¹ خُدا مسیح کُوں جیہڑا گُناہ کنُوں واقف نہ ہا، ساڈے کیتے گُناہ کھڑایا تاں جو اساں مسیح ءچ خُدا دی راستبازی تھی ونجُوں۔