2کُرِنتھِیوں 4 - کِتاب مُقدّس سرائیکی ترجمہ

مِٹی دے تھانواں ءچ رُوحانی خزانہ

¹ بس کیوں جو ساکُوں خُدا دی رحمت نال ایہ خدمت مِلی ہے، اِیں واسطے اساں ہِمت نئیں چھوڑیندے۔

² اساں شرم دے لُکے گالھیں کُوں چھوڑ ڈِتے۔ نہ اساں مکاری کریندے ہیں تے نہ ای خُدا دے کلام ءچ ملاوٹ کریندے ہیں۔ بلکہ سچائی کُوں ظاہر کر تے خُدا دے حضُور ہر بندے دے دل ءچ آپنڑے آپ کُوں نیک ظاہر کریندے ہیں۔

³ جے او خوشخبری جیندی اساں تبلیغ کریندے ہیں ہُنڑ وی پڑدہ دے پِچھے لُکی ہوئی ہے تاں صرف ہلاک تھیوݨ آلیاں کیتے ہے۔

⁴ اِیں جہان دے خُدا یعنی شیطان غیر اِیمانداراں دی عقل کُوں اندھا کر ڈِتے تاں جو او خوشخبری دا نُور نہ ڈیکھ سگنڑ، جیہڑا مسیح دے جلال کُوں ظاہر کریندے یعنی مسیح دے جیہڑا خُدا دی صورت اُتے ہے۔

⁵ کیوں جو اساں آپنڑی نئیں بلکہ مسیح یسُوع دی تبلیغ کریندے ہیں جو اُوہو خُداوند ہے تے آپنڑے بارے ءچ ایہ آدھے ہیں جو یسُوع دی خاطر اساں تُہاڈی خدمت کرݨ آلے ہیں۔

⁶ کیوں جو خُدا ای ہے جئیں فرمائے جو ”اندھارے ءچوں نُور چمکے“ تے اُوں ای ساڈے دِلاں ءچ آپنڑا نُور چمکایا تاں جو اساں خُدا دے جلال دے نُور کُوں پچھاݨ سگوں جیہڑا یسُوع مسیح دے چہرے تُوں ظاہر تھیندے۔

⁷ پر ایہ خزانہ ساڈے ءچ رکھیا گِیا ہے جیہڑے مِٹی دے تھانواں وانگُوں ہیں تاں جو ظاہر تھی ونجے جو ایہ حد کنُوں زیادہ قُدرت خُدا دی طرفوں ہے نہ جو ساڈی طرفوں۔

⁸ اساں ہر پاسُوں دبائے تاں ویندے ہیں پر ٹُکڑے ٹُکڑے نئیں تھیندے۔ پریشان تاں تھیندے ہیں پر نا اُمید نئیں تھیندے۔

⁹ ستائے تاں ویندے ہیں پر کلھے نئیں چھوڑے ویندے۔ سٹے تاں ویندے ہیں پر تباہ نئیں تھیندے۔

¹⁰ اساں آپنڑے بدن ءچ یسُوع دی موت چاتی ودے ہیں تاں جو یسُوع دی زندگی وی ساڈے بدن ءچوں ظاہر تھیوے۔

¹¹ کیوں جو اساں جیندے جی یسُوع دی خاطر موت دا مُنہ ڈیدھے راہندے ہیں تاں جو یسُوع دی زندگی ساڈے فانی بدن ءچ ظاہر تھیوے۔

¹² بس موت تاں ساڈے ءچ اثر کریندی ہے پر زندگی تُہاڈے ءچ۔

¹³ کلام ءچ لِکھیا ہے جو ”مَیں اِیمان گِھن آیا تے اِیں واسطے آکھیا۔“ ساڈے ءچ ایجھا ای اِیمان ہے، اِیں واسطے اساں وی اِیمان گِھن آوݨ دے سببّوں اکھیندے ہیں۔

¹⁴ کیوں جو اساں جانڑدے ہیں جو خُداوند یسُوع کُوں مُردیاں ءچوں زندہ کرݨ آلا ساکُوں وی یسُوع دے وسیلے زندہ کریسی تے تُہاڈے نال آپنڑے سامنڑے حاضر کریسی۔

¹⁵ ایہ سبھ کُجھ تُہاڈے فائدے کیتے ہے تاں جو بہُوں سارے لوکاں اُتے فضل تھیوے تے نتیجہ ءچ شُکرگُزاری ودھدی ونجے جیندے نال خُدا کُوں جلال مِلے۔

اِیمان دے سہارے زندگی گُزارنڑا

¹⁶ اِیں واسطے اساں حوصلہ نئیں چھوڑیندے۔ بےشک اساں ظاہری طور تے ختم تھیندے ویندے ہیں، وَل وی اندر ای اندر ہر روز نویں بنڑدے ویندے ہیں۔

¹⁷ ساڈی ایہ بہُوں عارضی تے ہلکی جیہی مُصیبت ساڈے کیتے ایجھا بھاری تے ابدی جلال پیدا کریندی پئی ہے۔

¹⁸ اِیں واسطے اساں نظر آوݨ آلیاں چیزاں اُتے نئیں بلکہ نظر نہ آوݨ آلیاں چیزاں اُتے غور کریندے ہیں کیوں جو نظر آوݨ آلیاں چیزاں عارضی ہِن پر نظر نہ آوݨ آلیاں ابدی ہِن۔