2کُرِنتھِیوں 3 - کِتاب مُقدّس سرائیکی ترجمہ

نویں عہد دے خادم

¹ کیا اساں وَل آپنڑی تعریف دا ڈھنڈورہ پِٹنڑ لگ ونجُوں؟ کیا ساکُوں کُجھ لوکاں وانگُوں تُہاڈے کولھ سفارشی چِٹھیاں گِھن آوݨ یا تُہاڈے کنُوں گِھن ونجنڑ دی ضرورت ہے؟

² نئیں، تُساں خود ساڈی چِٹھی ہیوے، جیہڑی ساڈے دِلاں اُتے لِکھی پئی ہے۔ اِینکُوں سبھ لوک جانڑدے تے پڑھدے ہِن۔

³ ایہ صاف ظاہر ہے جو تُساں مسیح دی او چِٹھی ہیوے جیہڑی اُوں ساڈی خدمت دے ذریعے لِکھی ہے۔ او چِٹھی مَس نال نئیں بلکہ زندہ خُدا دے رُوح القُدس نال لِکھی گئی ہے، پتھر دیاں تختیاں اُتے نئیں بلکہ اِنسانی دِلاں دیاں تختیاں اُتے۔

⁴ مسیح دے ذریعے خُدا اُتے ساڈا ایجھا ای بھروسا ہے۔

⁵ ایہ گالھ نئیں جو ساڈے ءچ کوئی لیاقت ہے جو اساں خود کُجھ کرݨ دا دعویٰ کر سگوں بلکہ ساڈی لیاقت خُدا دی طرفوں ہے،

⁶ جئیں ساکُوں نویں عہد دے خادم ہووݨ دے لائق وی بنڑایا ہے۔ ایہ عہد لِکھے ہوئے حُکماں اُتے نئیں بلکہ رُوح اُتے قائم ہے کیوں جو لِکھے ہوئے حُکم مار سٹیندے ہِن پر رُوح القُدس زندگی ڈیندے۔

نویں عہد دا جلال

⁷ جِیں ویلے او موت گِھن آوݨ آلا نِظام جیندے الفاظ پتھر دیاں تختیاں اُتے لِکھے گئے ہَن، ایجھا جلالی ہا جو بنی اِسرائیل کُوں مُوسیٰ دے چہرے دے نُور کُوں ڈیکھنڑ دی تاب نہ ہئی بھانویں جو او نُور گھٹدا ویندا ہا،

⁸ تاں رُوح القُدس دے نِظام دا جلال اُوں کنُوں کِتنا زیادہ ہوسی؟

⁹ جِیں ویلے قصُوروار کھڑاوݨ آلا نِظام جلالی ہا، تاں راستباز کھڑاوݨ آلا نِظام کِتنا زیادہ جلالی ہوسی۔

¹⁰ بلکہ پہلے نِظام دا جلال، اِیں زیادہ جلالی نِظام دے مُقابلے ءچ ہُنڑ غیر جلالی لگدا ہے۔

¹¹ کیوں جو جڈاں مِٹ ونجنڑ آلا نِظام جلالی ہا تاں ہمیشاں تئیں قائم راہنڑ آلا نِظام بہُوں زیادہ جلالی ہوسی۔

¹² بس ایجھی اُمید رکھیندے ہوئے اساں بہُوں دلیر ہیں۔

¹³ اساں مُوسیٰ وانگُوں نئیں جئیں آپنڑے چہرے اُتے نقاب کر گِھدا تاں جو بنی اِسرائیل اُوں مِٹ ونجنڑ آلے جلال کُوں نہ ڈیکھ سگنڑ۔

¹⁴ اُنہاں دے ذہن سخت تھی گئے تے اَج تئیں پُرانڑے عہد دیاں کتاباں پڑھدے ویلے اُنہاں دے دل اُتے پڑدہ پِیا راہندے۔ ایہ پڑدہ صرف مسیح دے وسیلے نال چاتا ویندے۔

¹⁵ اَج تئیں جڈاں وی مُوسیٰ دی کتاب پڑھی ویندی ہے، اُنہاں دے دل اُتے پڑدہ پِیا راہندے۔

¹⁶ پر جِیں ویلے کہیں دا دل خُداوند دو رجُوع کریسی تاں او پڑدہ ہٹا ڈِتا ویسی۔

¹⁷ کیوں جو خُداوند رُوح ہے تے جِتھاں خُداوند دا رُوح القُدس ہے اُتھاں ازادی ہے۔

¹⁸ اِیں واسطے شیشے آلی کار اساں ساریاں دے بے نقاب چہریاں تُوں خُداوند دا جلال ظاہر تھیندے تے اساں خُداوند دے رُوح القُدس دے وسیلے نال آہستہ آہستہ اُوندی جلالی صورت ءچ بدلدے ویندے ہیں۔