2کُرِنتھِیوں 2 - کِتاب مُقدّس سرائیکی ترجمہ

¹ بس مَیں آپنڑے دل ءچ اِرادہ کر گِھدا ہا جو ولا تُہاڈے کولھ پریشان تھی تے نہ آواں

² کیوں جو جے مَیں تُہاکُوں پریشان کراں تاں میکُوں کوݨ خوش کریسی، سوائے تُہاڈے جیہڑے میڈی وجہ کنُوں پریشان تھئے؟

³ مَیں تُہاکُوں اِیہو گالھ لِکھی ہئی تاں جو جِیں ویلے مَیں آواں تاں میکُوں اُنہاں لوکاں کنُوں ڈُکھ نہ پُجے جِنہاں کنُوں میکُوں خوشی مِلنڑی چاہیدی ہئی، کیوں جو میکُوں تُہاڈے ساریاں اُتے اِیں گالھ دا بھروسا ہے جو جیہڑی میڈی خوشی ہے اُوہو تُساں ساریاں دی وی خوشی ہے۔

⁴ مَیں بہُوں مُصیبت تے پریشانی ءچ تے بہُوں سارے ہنجُو وہا وہا تے تُہاکُوں لِکھیا ہا پر میڈا مقصد تُہاکُوں ڈُکھ ڈیوݨ نہ ہا بلکہ مَیں چاہندا ہم جو تُساں جاݨ گِھنو جو مَیں تُہاڈے نال کِتنی گہری محبت رکھیندا ہاں۔

قصُوروار کیتے معافی

⁵ جے کہیں بندے ڈُکھ ڈِتے تاں صرف میکُوں ای نئیں بلکہ کہیں حد تئیں تُساں ساریاں کُوں وی ڈِتے۔ مَیں ایہ گالھ زیادہ سختی نال نئیں کرݨ چاہندا۔

⁶ پر اُوں بندے کیتے ایہ سزا بہُوں ہے جیہڑی اُونکُوں تُساں بہُوں ساریاں دی طرفوں مِلی ہے۔

⁷ بس ہُنڑ تُساں اُوندا قصُور معاف کر ڈیؤ تے اُونکُوں تسلی ڈیؤ۔ اِینویں نہ تھیوے جو او حد تُوں زیادہ ڈُکھ پارُوں تباہ تھی ونجے۔

⁸ اِیں واسطے مَیں تُہاڈی مِنت کریندا ہاں جو اُونکُوں آپنڑی محبت دا یقین ڈیواؤ۔

⁹ مَیں اِیں واسطے وی لِکھیا ہا جو تُہاڈا اِمتحان گِھن تے ڈیکھاں جو تُساں سارے گالھیں ءچ فرمانبردار ہیوے یا نئیں۔

¹⁰ جِینکُوں تُساں معاف کریندے ہیوے اُونکُوں مَیں وی معاف کریندا ہاں۔ جے مَیں معافی ڈِتی تاں مسیح کُوں حاضر جاݨ تے تُہاڈی خاطر معاف کیتا۔

¹¹ اِینویں نہ تھیوے جو شیطان کُوں ساڈے تُوں فائدہ چاوݨ دا موقع مِل ونجے کیوں جو اساں اُوندیاں چالاں کُوں چنگی طرحاں جانڑدے ہیں۔

تروآس ءچ پولُس دی بے چینی

¹² جِیں ویلے مَیں مسیح دی خوشخبری دی تبلیغ کیتے تروآس پُجیا تاں خُداوند میڈے کیتے خدمت دا دروازہ کھول ڈِتا ہا۔

¹³ وَل وی میکُوں دِلی سکون نہ تھیّا کیوں جو میکُوں میڈا بِھرا طِطُس اُتھاں نہ مِلیا ہا۔ اِیں واسطے مَیں اُنہاں لوکاں تُوں رُخصت تھی تے مَکِدُنیہ روانہ تھی گِیا۔

مسیح دے وسیلے نال فتح

¹⁴ پر خُدا دا شُکر ہے جو او ساکُوں مسیح دی فتح دے جلُوس ءچ ہمیشاں گِھن ویندے تے ساڈے وسیلے نال مسیح کُوں جانڑݨ دی خوشبو ہر جاہ کِھنڈیندے۔

¹⁵ کیوں جو خُدا دے حضُور ءچ اساں نجات پاوݨ آلیاں تے ہلاک تھیوݨ آلیاں ڈوہائیں کیتے مسیح دی خوشبو ہیں۔

¹⁶ کُجھ لوکاں کیتے تاں موت ڈیوݨ آلی بدبُو تے کُجھ لوکاں کیتے زندگی ڈیوݨ آلی خوشبو ہیں۔ تے کوݨ اِیں کم دے لائق ہے؟

¹⁷ اساں اُنہاں اکثر لوکاں آلی کار نئیں جیہڑے پیسے کیتے خُدا دے کلام ءچ ملاوٹ کریندے ہِن بلکہ خُدا دی طرفوں تے اُونکُوں حاضر جاݨ تے مسیح ءچ سچے دل نال گالھ کریندے ہیں۔