2کُرِنتھِیوں 13 - کِتاب مُقدّس سرائیکی ترجمہ

آخری نصیحتاں تے سلام

¹ ایہ تریجھی پھیری مَیں تُہاڈے کولھ آندا پِیا ہاں۔ ہر گالھ ڈُو یا ترے گواہاں دی شہادت ڈیوݨ نال سچ ثابت تھی ویسی۔

² جِیں ویلے میں ڈُوجھی پھیری تُہاڈے کولھ آیا ہم تاں میں اُوں ویلے تُہاکُوں چتایا ہا تے ہُنڑ غیر حاضر ہوندے ہوئے وی ولا اُنہاں کُوں جِنہاں پہلے گُناہ کیتے ہَن تے بئیاں کُوں وی چتیندا پِیا ہاں جو جڈاں میں واپس آساں تاں کہیں کُوں وی نہ چُھڑیساں،

³ کیوں جو تُساں اِیں گالھ دا ثبوت منگدے ہیوے جو مسیح میڈے ءچ کلام کریندے۔ او تُہاکُوں سِدھا کرݨ کیتے کمزور نئیں بلکہ تُہاڈے وچال زور آور ہے۔

⁴ ہا، او کمزوری دی حالت ءچ صلیب اُتے چڑھایا گِیا پر خُدا دی قُدرت دے سببّوں زندہ ہے، تے اساں وی اُوندی طرحاں کمزور تاں ہیں پر اُوندے نال خُدا دی اُوں قُدرت دے سببّوں زندہ ہوسُوں جیہڑی تُہاڈے کیتے ہے۔

⁵ تُساں آپنڑے آپ کُوں ازما تے پتا کرو جو اِیمان ءچ ہیوے یا نئیں۔ آپنڑے آپ کُوں پرکھو۔ کیا تُساں آپنڑے بارے ءچ ایہ نئیں جانڑدے جو یسُوع مسیح تُہاڈے ءچ ہے؟ نہ تاں تُساں اِیمان دے اِمتحان ءچ ناکام ہیوے۔

⁶ پر میکُوں اُمید ہے جو تُہاکُوں پتہ لگ ویسی جو اساں ناکام نئیں۔

⁷ اساں خُدا تُوں دُعا کریندے ہیں جو تُساں بُرائی نہ کرو۔ اِیں واسطے نئیں جو اساں کامیاب نظر آؤں بلکہ اِیں واسطے جو تُساں اُوہو کرو جیہڑا چنگا ہے، بےشک اساں ناکام ای نظر آؤں۔

⁸ کیوں جو اساں حق دے خلاف کُجھ نئیں کر سگدے بلکہ صرف حق کیتے کر سگدے ہیں۔

⁹ کیوں جو اساں خوش ہیں جڈاں تُساں زور آور ہیوے بھانویں اساں کمزور ہیں۔ تے ساڈی دُعا ہے جو تُساں کامل تھی ونجو۔

¹⁰ اِیں واسطے مَیں آپنڑی غیر موجودگی ءچ ایہ گالھیں لِکھدا پِیا ہاں تاں جو اُتھاں آ تے میکُوں اُوں اِختیار دے مطابق سختی نہ کرنڑی پووے جیہڑا خُداوند میکُوں تعمیر کرݨ کیتے ڈِتے نہ جو ڈھاوݨ کیتے۔

¹¹ غرض بِھراؤ! خوش راہو، کامِل بنڑدے ونجو، حوصلہ رکھو، ہِک سوچ رکھو، میل مِلاپ رکھو، وَل خُدا جیہڑا محبت تے سلامتی دا سرچشمہ ہے تُہاڈے نال راہسی۔

¹² پاک بوسہ نال ہِک ڈُوجھے کُوں سلام آکھو۔

¹³ سبھ مُقدّس لوک تُہاکُوں سلام آدھے ہِن۔

¹⁴ خُداوند یسُوع مسیح دا فضل، خُدا دی محبت تے رُوح القُدس دی شراکت تُساں ساریاں نال تھیندی راہوے۔