2کُرِنتھِیوں 11 - کِتاب مُقدّس سرائیکی ترجمہ

پولُس تے کُوڑے رسُول

¹ کاش جو تُساں میڈی ذرا جیہی بیوقُوفی برداشت کریندے! ہا، برداشت تاں تُساں کریندے ای ہیوے۔

² میڈے دل ءچ تُہاڈے کیتے خُدا وانگُوں غیرت ہے کیوں جو مَیں تُہاڈا رشتہ ہِکو پئے یعنی مسیح نال طے کیتے تاں جو تُہاکُوں ہِک پاک دامن کُنواری وانگُوں اُوندے کولھ پیش کراں۔

³ پر میکُوں ڈر ہے، کِتھائیں اِینویں نہ تھیوے جو جِینویں نانگ آپنڑی مکاری نال حوّا کُوں ورغلا گِھدا، اُونویں ای تُہاڈے خیال وی خراب تھی ونجنڑ تے تُساں مسیح کیتے اُوں خلوص دِلی تے پاک دامنی کُوں چھوڑ ڈیؤ۔

⁴ کیوں جو جے کوئی آ تے کہیں بئے یسُوع دی تبلیغ کریندے، جیندی اساں نئیں کیتی، یا جے تُساں کہیں بئی طرحاں دی رُوح قبول کریندے ہیوے جیہڑی اُوں رُوح تُوں فرق ہے جیہڑی تُہاکُوں مِلی ہئی، یا جے تُساں بئی خوشخبری قبول کریندے ہیوے جیہڑی اُوں خوشخبری کنُوں فرق ہے جیہڑی تُساں قبول کیتی ہئی، تاں تُساں اُونکُوں صحیح برداشت کریندے ہیوے۔

⁵ مَیں نئیں سمجھدا جو مَیں اُنہاں ”افضل رسُولاں“ کنُوں کمتر ہاں۔

⁶ بھانویں مَیں تقریر کرݨ ءچ ماہر نئیں، پر میڈے کولھ علم تاں ضرور ہے تے اِیندا ثبوت اساں تُہاکُوں ہر گالھ ءچ تے ہر طرحاں ڈے ڈِتے۔

⁷ کیا ایہ میڈا جُرم ہا جو مَیں خُدا دی خوشخبری تُہاکُوں مُفت سُنڑا تے آپنڑے آپ کُوں پست کیتا تاں جو تُساں اُچے تھی ونجو؟

⁸ مَیں ڈُوجھی کلیسیاواں کُوں لُٹیا یعنی اُنہاں کنُوں مدد گِھدی تاں جو تُہاڈی خدمت کراں۔

⁹ تے جِیں ویلے مَیں تُہاڈے کولھ ہم تے میکُوں ضرورت پئی تاں مَیں تُہاڈے ءچوں کہیں کُوں ذرا وی تکلیف نہ ڈِتی کیوں جو مَکِدُنیہ کنُوں مسیحی بِھرانواں آ تے میڈی ضرورت پُوری کیتی۔ مَیں تُہاڈے اُتے کوئی بھار نئیں سٹیا تے نہ ای ولا سٹیساں۔

¹⁰ مسیح دی سچائی دی قَسم جیہڑی میڈے اندر ہے، اَخیہ دے سبھ علاقیاں ءچ کوئی بندہ میکُوں اِیں فخر کرݨ کنُوں روک نہ سگسی۔

¹¹ آخر کیوں؟ کیا اِیں واسطے جو مَیں تُہاڈے نال محبت نئیں رکھیندا؟ خُدا جانڑدے جو مَیں تُہاڈے نال محبت رکھیندا ہاں۔

¹² جیہڑا کُجھ مَیں کریندا ہاں اُوہو کریندا راہساں تاں جو اُنہاں کُوں موقع نہ ڈیواں جیہڑے فخر کر تے دعویٰ کرݨ چاہندے ہِن جو اُنہاں دے کم ساڈے وانگُوں ہِن۔

¹³ کیوں جو ایجھے لوک کُوڑے رسُول تے دوکھے بازی نال کم کرݨ آلے ہِن تے آپنڑے آپ کُوں مسیح دے رسُولاں دے ہم شکل بنڑا گِھندے ہِن۔

¹⁴ تے ایہ کوئی انوکھی گالھ نئیں کیوں جو شیطان وی آپنڑے آپ کُوں نُورانی فرشتے دا ہم شکل بنڑا گِھندے۔

¹⁵ اِیں واسطے ایہ کوئی وڈی گالھ نئیں جے اُوندے خادم وی آپنڑے آپ کُوں راستبازی دے خادماں وانگُوں بنڑا گِھننڑ۔ پر اُنہاں دا انجام اُنہاں دے کماں دے مطابق ہوسی۔

رسُول تھیوݨ دے سببّوں پولُس دے ڈُکھ

¹⁶ مَیں ولا آدھا ہاں جو کوئی میکُوں بیوقُوف نہ سمجھے۔ نہ تاں جے بیوقُوف سمجھ تے ای قبول کر گِھنو تاں جو مَیں وی آپنڑے آپ اُتے تھوڑا جِیہا فخر کراں۔

¹⁷ جیہڑا کُجھ مَیں ہُنڑ فخر کر تے آدھا ہاں او خُداوند دی طرفوں نئیں بلکہ مَیں بیوقُوف آلی کار آدھا ہاں۔

¹⁸ پر جڈاں بہُوں سارے دُنیاوی طور تے فخر کریندے ہِن تاں مَیں وی کریساں۔

¹⁹ تُساں خود اِتی عقل مند ہیوے جو بیوقُوفاں دے گالھیں خوشی نال برداشت گِھندے ہیوے۔

²⁰ جے کوئی تُہاکُوں غُلام بنڑیندے یا تُہاکُوں لُٹیندے، یا تُہاکُوں دوکھا ڈیندے، یا تُہاڈے اُتے رُعب پیندے، یا تُہاڈے مُنہ اُتے چاٹ مریندے تاں تُساں برداشت کر گِھندے ہیوے۔

²¹ ایہ آکھ تے میکُوں شرم آندی ہے جو اساں اِتنے کمزور ہسے جو اِینویں نہ کر سگے۔ بےشک میڈا ایہ آکھنڑ بیوقُوفی ہے پر جے کوئی کہیں گالھ اُتے فخر کرݨ دی جُرأت کریندے تاں مَیں وی اُوہو فخر کرݨ دی جُرأت کریندا ہاں۔

²² کیا او عبرانی ہِن؟ مَیں وی ہاں۔ کیا او اِسرائیلی ہِن؟ مَیں وی ہاں۔ کیا او ابرہام دی اولاد ہِن؟ مَیں وی ہاں۔

²³ کیا او مسیح دے خادم ہِن؟ میں ایہ گالھ پاگل آلی کار کریندا پِیا ہاں۔ مَیں اُنہاں کنُوں زیادہ اُوندا خادم ہاں۔ مَیں اُنہاں کنُوں زیادہ محنت کیتی، زیادہ دفعہ قید تھیّا، زیادہ کوڑے کھادے، کئی پھیری موت دا سامنڑا کیتا۔

²⁴ مَیں یہُودیاں دے ہتُھوں پنج پھیری ہِک گھٹ چالیہہ چالیہہ کوڑے کھادے،

²⁵ ترے پھیری میکُوں بینت نال ماریا گِیا، ہِک پھیری میں سنگسار کیتا گِیا، ترے پھیری میڈا جہاز تباہ تھیّا، تے ہِک ڈینہہ تے ہِک رات مَیں کُھلے سمندر ءچ گُزاری۔

²⁶ مَیں لگاتار سفر ءچ ریہا، دریا دے خطریاں ءچ، ڈاکواں دے خطریاں ءچ، آپنڑی قوم آلیاں دے خطریاں ءچ، غیر قوماں دے خطریاں ءچ، شہر دے خطریاں ءچ، بیابان دے خطریاں ءچ، سمندر دے خطریاں ءچ، تے کُوڑے اِیمانداراں دے خطریاں ءچ ریہا۔

²⁷ مَیں محنت تے مُشقت کیتی، اکثر ساری رات جاگدا ریہا، بُکھا تے ترِسّا تے بہُوں پھیری فاقہ کیتا، سردی تے ننگے پن ءچ ریہا۔

²⁸ اِنہاں سارے گالھیں دے علاوہ ساریاں کلیسیاواں دی فِکر دا بھار ہر روز میڈے اُتے راہندے۔

²⁹ کیندی کمزوری نال مَیں کمزور نئیں تھیندا؟ تے کیندی گُمراہی تُوں میڈا دل نئیں ڈُکھدا؟

³⁰ جے میکُوں فخر کرنڑا ای ہے تاں مَیں اِنہاں گالھیں اُتے فخر کریساں جیہڑیاں میڈی کمزوری کُوں ظاہر کریندیاں ہِن۔

³¹ خُداوند یسُوع دا خُدا تے باپ، جیندی ہمیشاں تئیں حمد تھیوے، جانڑدا ہے جو مَیں کُوڑ نئیں مریندا۔

³² دمشق شہر دے حاکم جیہڑا اَرِتاس بادشاہ دے ماتحت ہا، میکُوں گرفتار کرݨ کیتے شہر دے پھاٹکاں اُتے پہرا لا ڈِتا ہا۔

³³ پر بِھرانواں میکُوں ٹوکرے ءچ بِلھا تے دیوار دی ہِک کِھڑکی کنُوں باہر تلے لہا ڈِتا تے اِینویں مَیں اُوندے ہتُھوں بچ نِکلیا۔