2کُرِنتھِیوں 10 - کِتاب مُقدّس سرائیکی ترجمہ

پولُس آپنڑی خدمت دا دفاع کریندے

¹ ہُنڑ مَیں پولُس جیندے بارے ءچ کُجھ لوک آدھے ہِن جو تُہاڈے سامنڑے تاں عاجز ہاں پر غیر حاضری ءچ دلیر ہاں، مسیح دی عاجزی تے نرمی یاد ڈیویندے ہوئے خود تُہاکُوں درخاست کریندا ہاں۔

² بلکہ مِنت کریندا ہاں جو تُہاڈے کولھ آ تے میکُوں اُوں دلیری نال نہ پیش آونڑا پووے، جِینویں کُجھ لوکاں نال پیش آوݨ دا اِرادہ رکھیندا ہاں جیہڑے ساڈے بارے ءچ سوچیندن جو اساں دُنیاوی طور تے زندگی گُزریندے ہیں۔

³ بےشک اساں دُنیا ءچ زندگی گُزریندے ہیں پر اساں دُنیاوی لوکاں وانگُوں نئیں لڑدے۔

⁴ کیوں جو ساڈی لڑائی دے ہتھیار دُنیاوی نئیں بلکہ خُدا دی طرفوں مضبوط قلعیاں کُوں ڈھا ڈیوݨ دی قُدرت رکھیندے ہِن۔

⁵ اساں اُنہاں دلیلاں تے ہر اُوں چیز کُوں ڈھا ڈیندے ہیں جیہڑی خُدا دی پچھاݨ دے خلاف اُٹھ کھڑی تھئی ہے تے اساں ہر خیال کُوں قید کر تے مسیح دا فرمانبردار بنڑا ڈیندے ہیں۔

⁶ تے جِیں ویلے تُہاڈی فرمانبرداری پُوری تھی ونجے تاں اساں ہر طرحاں دی نافرمانی دی سزا ڈیوݨ کیتے تیار ہوسُوں۔

⁷ تُساں ظاہری چیزاں اُتے غور کریندے ہیوے۔ جے کہیں کُوں آپنڑے آپ اُتے ایہ بھروسا ہے جو او مسیح دا ہے تاں اُونکُوں ایہ وی سوچ گِھننڑاں چاہیدے جو جِینویں او مسیح دا ہے اُونویں ای اساں وی ہیں۔

⁸ کیوں جو جے مَیں آپنڑے اُوں اِختیار اُتے کُجھ زیادہ فخر وی کراں، جیہڑا خُداوند ساکُوں تُہاڈی ترقی کیتے ڈِتے نہ جو وِگاڑن کیتے، تاں اِیندے بارے ءچ مَیں شرمندہ نہ تھیساں۔

⁹ میں نئیں چاہندا جو اِینویں لگے جو میں خطاں دے ذریعے تُہاکُوں ڈراوݨ دی کوشش کریندا پِیا ہاں،

¹⁰ کیوں جو کُجھ لوک تاں آدھے ہِن جو ”پولُس دے خط تاں بہُوں کارآمد تے زبردست ہِن پر جِیں ویلے او خود موجود ہوندا ہے تاں معمولی جِیہا لگدے تے اُوندی تقریر کہیں کم دی نئیں ہوندی۔“

¹¹ اِینویں آکھنڑ آلیاں کُوں ایہ سمجھنڑا چاہیدے جو جِینویں اساں آپنڑی غیر حاضری ءچ خط ءچ لِکھدے ہیں اُونویں ای اساں اُتھاں آ تے عمل وی کریسوں۔

¹² کیوں جو ساڈی جُرأت نئیں جو اساں آپنڑے آپ کُوں اُنہاں ءچ شمار کرُوں یا اُنہاں نال آپنڑا مُقابلہ کرُوں جیہڑے ہمیشاں آپنڑے ای مُنہ کنُوں آپنڑی تعریف کریندے ہِن۔ جڈاں او آپنڑے آپ کُوں معیار بنڑا تے آپنڑے آپ کُوں پرکھدے ہِن تے آپنڑا ہِک بئے نال موازنہ کریندے ہِن، تاں او کِتنے نادان ہِن۔

¹³ پر اساں مناسب حد تُوں زیادہ فخر نہ کریسوں بلکہ صرف اُوں خدمت دی حدود دے مطابق فخر کریسوں جیہڑی خُدا ساڈے کیتے مقرر کیتی ہے، جیندے ءچ تُساں وی آ گئے ہیوے۔

¹⁴ اساں فخر کرݨ ءچ آپنڑے آپ کُوں حد تُوں زیادہ نئیں ودھیندے کیوں جو اساں مسیح دی خوشخبری ڈیندے ہوئے تُہاڈے تئیں پُج گئے ہیں۔ جے تُہاڈے تئیں نہ پُجے ہوندے تاں بئی گالھ ہوندی۔

¹⁵ تے اساں آپنڑی حد تُوں باہر وَنج تے بئے دی محنت اُتے فخر نئیں کریندے بلکہ اُمید رکھیندے ہیں جو تُہاڈے اِیمان ءچ ترقی پارُوں تے اِینویں تُہاڈے ذریعے ساڈی خدمت دی حد وی مزید ودھے،

¹⁶ تاں جو اساں تُہاڈے علاقہ تُوں اگُوں وی خوشخبری سُنڑا سگوں۔ ایہ نئیں جو کہیں ڈُوجھے دے کم اُتے فخر کرُوں۔

¹⁷ غرض جیہڑا فخر کرے او رب اُتے فخر کرے۔

¹⁸ کیوں جو جیہڑا آپنڑی تعریف کریندے، او مقبول نئیں بلکہ جِینکُوں خُداوند نیک سمجھدے، اُوہو مقبول ہے۔