1 تِیمُتھِیُس 6 - کِتاب مُقدّس سرائیکی ترجمہ

¹ جیہڑے نوکر غُلامی دی پنجالی ءچ ہِن او آپنڑے مالکاں کُوں پُوری عزت دے لائق سمجھنڑ تاں جو کوئی خُدا دے ناں دی تے ساڈی تعلیم دی بدنامی نہ کرے۔

² جِنہاں غُلاماں دے مالک اِیماندار ہِن، او اُنہاں کُوں مسیحی بِھرا ہووݨ پارُوں گھٹ عزت نہ ڈیوݨ، بلکہ اُنہاں دی زیادہ خدمت کرݨ کیوں جو اُنہاں دی خدمت کنُوں فائدہ چاوݨ آلے اِیماندار تے عزیز ہِن۔ تُوں اِنہاں گالھیں دی تعلیم تے نصیحت ڈے۔

کُوڑی تعلیم تے حقیقی دولت

³ جے کوئی غلط تعلیم ڈیندے تے خُداوند یسُوع مسیح دے صحیح کلام تے اُوں تعلیم کُوں نئیں منیندا جیہڑی خُدا پرستی دے مطابق ہے،

⁴ تاں او مغرُور ہے تے کُجھ نئیں جانڑدا۔ اُونکُوں فضول بحث تے لفظاں دے بارے ءچ تکرار کرݨ دا مرض ہے جِیندا نتیجہ حسد، جھیڑے، بدگوئیاں تے ڈُوجھیاں دے بارے ءچ بُری سوچ رکھنڑ ہے،

⁵ تے اُنہاں لوکاں ءچ جِنہاں دی عقل وِگڑ گئی ہے، جھیڑے پیدا تھیندے ہِن۔ سچائی اُنہاں کنُوں چِھک گِھدی گئی ہے تے او دینداری کُوں نفع دا ذریعہ سمجھدے ہِن۔

⁶ پر دینداری دے نال نال آپنڑی حالت اُتے خوش راہوݨ وڈے نفع دی گالھ ہے

⁷ کیوں جو اساں دُنیا ءچ نہ کُجھ گِھن تے آئے ہیں تے نہ کُجھ اُوندے ءچوں گِھن تے وَنج سگدے ہیں۔

⁸ بس جے ساڈے کولھ کھاوݨ تے پاوݨ کیتے ہے تاں اُوندے اُتے خوش راہوں۔

⁹ جیہڑے لوک دولت مند تھیوݨ چاہندے ہِن، او ازمائش ءچ پے تے بہُوں فضول تے نُقصان پُچاوݨ آلیاں خواہشاں دے پھندے ءچ پَھس ویندے ہِن تے تباہی تے ہلاکت دے دریا ءچ غرق تھی ویندے ہِن۔

¹⁰ کیوں جو پیسیاں دا لالچ ہر قِسم دی بُرائی دی جڑھ ہے تے کُجھ لوک دولت دے لالچ ءچ آ تے آپنڑے اِیمان تُوں گُمراہ تھی گئے تے آپنڑے آپ کُوں بہُوں ڈُکھ ڈِتے۔

تِیمُتِھیُس کیتے نصیحتاں

¹¹ پر تُوں خُدا دے بندے، اِنہاں کنُوں بھج تے راستبازی، دینداری، اِیمان، محبت، صبر تے نرم دِلی دا طالب تھی۔

¹² اِیمان دی چنگی کُشتی لڑ۔ ہمیشاں دی زندگی اُتے قبضہ کر گِھن جیندے کیتے تُوں سڈیا گِیا ہَویں، تے جِیندے بارے ءچ تَیں بہُوں سارے گواہاں دے سامنڑے چنگا اِقرار کیتا ہا۔

¹³ مَیں خُدا کُوں جیہڑا ہر چیز کُوں زندگی ڈیندے تے مسیح یسُوع کُوں جئیں پنطیُس پِیلاطُس دے سامنڑے چنگا اِقرار کیتا ہا، گواہ بنڑا تے تیکُوں تاکید کریندا ہاں،

¹⁴ جو جئیں تئیں ساڈا خُداوند یسُوع مسیح ظاہر نہ تھی ونجے، جیہڑا حُکم تیکُوں ڈِتا گئے اُوندے اُتے بغیر کہیں غلطی تے ناکامی دے عمل کر۔

¹⁵ کیوں جو خُدا مناسب وقت اُتے مسیح کُوں ظاہر کریسی۔ خُدا مُبارک تے واحد حاکم، بادشاہاں دا بادشاہ تے خُداونداں دا خُداوند ہے۔

¹⁶ صرف اُوہو غیر فانی ہے، تے او اُوں نُور ءچ راہندے جِتھاں کوئی پُج نئیں سگدا۔ اُونکُوں کہیں اِنسان نئیں ڈِٹھا تے نہ ڈیکھ سگدے۔ اُوندی عزت تے سلطنت ہمیشاں تئیں قائم راہوے، آمین۔

¹⁷ اِیں موجودہ جہان دے دولت منداں کُوں حُکم ڈے جو او مغرُور نہ تھیوݨ تے دولت جیہی غیر یقینی چیز اُتے اُمید نہ رکھنڑ بلکہ خُدا اُتے، جیہڑا ساڈی خوشی کیتے ساریاں چیزاں ساکُوں کثرت نال ڈیندے۔

¹⁸ اُنہاں کُوں حُکم ڈے جو او نیکی کرݨ تے نیک کماں دے لحاظ نال دولت مند بنڑݨ تے ہمیشاں سخاوت کر تے ڈُوجھیاں دی مدد کرݨ کیتے تیار راہوݨ۔

¹⁹ اِینویں او آپنڑے کیتے ہِک چنگا خزانہ جمع کریسن یعنی آوݨ آلے زمانے کیتے ہِک مضبوط بنیاد، تے اِینویں حقیقی زندگی اُتے قبضہ کرݨ۔

²⁰ تِیمُتِھیُس! اِیں امانت دی جیہڑی تیڈے سپُرد کیتی گئی ہے، حفاظت کر، تے بے ہُودہ گالھیں تے فضول خیالاں کنُوں کنارہ کر، کیوں جو ایجھے علم کُوں علم آکھنڑ ای غلط ہے۔

²¹ کُجھ لوک ایجھے علم دی وجہ کنُوں آپنڑے اِیمان تُوں گُمراہ تھی گئے ہِن۔ خُدا دا فضل تُساں سبھ نال راہوے۔