1 تِیمُتھِیُس 5 - کِتاب مُقدّس سرائیکی ترجمہ

جماعت دے مختلف لوکاں نال سلوک

¹ کہیں وڈی عُمر آلے کُوں نہ جِھڑک بلکہ اُونکُوں آپنڑا پِیُو سمجھ تے نصیحت کر، تے نینگراں کُوں بِھرا سمجھ تے،

² وڈی عُمر آلیاں عورتاں کُوں ماء سمجھ تے، تے جوان عورتاں کُوں پاکیزگی نال بھینڑاں سمجھ تے۔

³ اُنہاں بیوہ عورتاں دا خیال رکھ، تے عزت کر جیہڑیاں واقعی ضرورت مند ہِن۔

⁴ جے کہیں بیوہ دے پوتر یا پوترے ہووݨ تاں او پہلے آپنڑے خاندان کُوں سنبھال تے ماء پِیُو دا حق ادا کرݨ سِکھنڑ، کیوں جو ایہ خُدا کُوں پسند ہے۔

⁵ جیہڑی عورت واقعی ضرورت مند بیوہ ہے تے جِیندا کوئی نئیں، او خُدا اُتے اُمید رکھیندی ہے تے ڈینہہ رات خُدا کنُوں مدد منگدی تے دُعا کریندی ہے۔

⁶ پر جیہڑی بیوہ عیاشی ءچ زندگی گُزریندی ہے، او زندہ ہوندے ہوئے وی مُردہ ہے۔

⁷ اِنہاں گالھیں دے بارے ءچ لوکاں کُوں نصیحت کر تاں جو کوئی اُنہاں اُتے اِلزام نہ لا سگے۔

⁸ جیہڑا بندہ آپنڑے رشتہ داراں، خاص کر آپنڑے گھر آلیاں دا خیال نئیں کریندا او اِیمان دا مُنکر ہے تے غیر اِیمانداراں کنُوں وی بدتر ہے۔

⁹ بیوہ عورتاں دی فہرست ءچ صرف اُوں بیوہ دا ناں لِکھیا ونجے جیندی عُمر سَٹھ سال تُوں زیادہ ہووے تے ہِک پئے دی زال ریہی ہووے،

¹⁰ تے نیک کم کرݨ ءچ مشہور ہووے یعنی اُوں آپنڑے بالاں دی تربیت کیتی ہووے، مہمان نوازی کیتی ہووے، مُقدّساں دی خدمت ءچ اُنہاں دے پیر دھوتے ہووݨ، مُصیبت دے ماریاں دی مدد کیتی ہووے تے ہر نیک کم کرݨ ءچ مصروف ریہی ہووے۔

¹¹ پر جوان بیوہ عورتاں دے ناں نہ لِکھے ونجنڑ کیوں جو جڈاں اُنہاں دیاں نفسانی خواہشاں اُنہاں اُتے غالب آ ویندیاں ہِن تاں او مسیح تُوں دُور تھی تے ولا شادی کرݨ چاہندیاں ہِن،

¹² تے قصُوروار بنڑ ویندیاں ہِن کیوں جو اُنہاں آپنڑے پہلے وعدے کُوں چھوڑ ڈِتے۔

¹³ اِیندے علاوہ او گھر گھر بیکار پِھردیاں ہِن تے نہ صرف بیکار راہندیاں ہِن بلکہ فضول گالھیں کر تے ڈُوجھیاں دے معاملیاں ءچ دخل اندازی وی کریندیاں ہِن تے غیرمناسب گالھیں آدھیاں ہِن۔

¹⁴ اِیں واسطے مَیں جوان بیوہ عورتاں کُوں صلاح ڈیندا ہاں جو او شادی کرݨ، بال جمنڑ، آپنڑا گھر سنبھالنڑ تے کہیں مخالف کُوں بدگوئی کرݨ دا موقع نہ ڈیوݨ۔

¹⁵ کیوں جو کُجھ گُمراہ تھی تے شیطان دی پیروی کرݨ لگ گئیاں ہِن۔

¹⁶ جے کہیں اِیماندار عورت دے خاندان ءچ بیوہ عورتاں ہووݨ تاں او اُنہاں دی مدد کرے تے کلیسیا اُتے بھار نہ سٹیا ونجے تاں جو او اُنہاں دی مدد کر سگے جیہڑیاں واقعی بے سہارا ہِن۔

¹⁷ جیہڑے بزُرگ چنگی راہنمائی کریندے ہِن، خاص کر او جیہڑے کلام سُنڑیندے تے تعلیم ڈیندے ہِن، ڈُونڑی عزت دے حقدار ہِن۔

¹⁸ کیوں جو خُدا دا کلام آدھے جو ”گہاوݨ ویلے ڈاند دا مُنہ نہ بدھیں“ تے ایہ وی جو ”مزدُور آپنڑی مزدُوری دا حقدار ہے۔“

¹⁹ کہیں بزُرگ اُتے لائے ونجنڑ آلے کہیں وی اِلزام کُوں ڈُو یا ترے گواہاں دے بغیر قبول نہ کر۔

²⁰ پر گُناہ کرݨ آلیاں کُوں ساریاں دے سامنڑے ملامت کر تاں جو ڈُوجھیاں کیتے وی عِبرت ہووے۔

²¹ مَیں خُدا، مسیح یسُوع تے چُنڑے ہوئے فرشتیاں کُوں گواہ بنڑا تے تیکُوں تاکید کریندا ہاں جو اِنہاں گالھیں اُتے بغیر تعصب تے بغیر طرفداری دے عمل کر۔

²² کہیں بندے اُتے ہتھ رکھ تے اُونکُوں خدمت کیتے مقرر کرݨ ءچ جلدی نہ کر، تے نہ ڈُوجھیاں دے گُناہاں ءچ شریک تھی۔ آپنڑے آپ کُوں پاک رکھ۔

²³ اگُوں تے صرف پانڑی ای نہ پِیتا کر بلکہ آپنڑے معدہ دے سببّوں تھوڑا جِیہا انگُور دا رَس وی پِیتا کر کیوں جو تُوں اکثر بیمار راہندیں۔

²⁴ کُجھ لوکاں دے گُناہ اُنہاں دے عدالت ءچ حاضر تھیوݨ کنُوں پہلے ای ظاہر تھی ویندے ہِن تے کُجھ دے بعد ءچ۔

²⁵ اِینویں ای کُجھ نیک کم صاف نظر آندے ہِن تے جیہڑے صاف نظر نئیں آندے او لُکے نئیں رہ سگدے۔