1 تِیمُتھِیُس 3 - کِتاب مُقدّس سرائیکی ترجمہ

کلیسیا دے راہنما

¹ ایہ گالھ سچ ہے جو ”جیہڑا بندہ کلیسیا ءچ نگہبان بنڑݨ چاہندے، او چنگے کم دی خواہش کریندے۔“

² اِیں واسطے نگہبان کُوں چاہیدے جو او بے اِلزام، ہِک ذال دا پایا، پرہیزگار، مُتّقی، شریف، مہمان نواز تے تعلیم ڈیوݨ دے قابل ہووے۔

³ او شرابی تے مار کُٹائی کرݨ آلا نہ ہووے بلکہ نرم دل ہووے۔ او بحث کرݨ آلا تے پیسیاں دا لالچی نہ ہووے۔

⁴ او آپنڑے گھر دا چنگی طرحاں بندوبست کرݨ آلا ہووے تے آپنڑے بالاں کُوں بہُوں سنجیدگی نال قابو ءچ رکھنڑ آلا ہووے۔

⁵ کیوں جو جے کوئی آپنڑے ای گھر کُوں نئیں سنبھال سگدا تاں او خُدا دی کلیسیا دی ڈیکھ بھال کِینویں کریسی؟

⁶ او نواں نواں ایماندار نہ ہووے، اِینویں نہ تھیوے جو او مغرُور تھی تے ابلیس وانگُوں سزا پاوے۔

⁷ تے او غیر اِیمانداراں ءچ وی نیک ناں ہووے، اِینویں نہ تھیوے جو کوئی اُونکُوں بُرا بھلا آکھے تے او ابلیس دے پھندے ءچ پَھس ونجے۔

کلیسیا دا اِنتظام کرݨ آلے

⁸ اِینویں ای جماعت دا اِنتظام کرݨ آلیاں کُوں وی چاہیدے جو او سنجیدہ ہووݨ، ڈُو زباناں آلے، شرابی تے پیسے دے لالچی نہ ہووݨ۔

⁹ او اِیمان دے راز کُوں نیک نیّتی نال محفوظ رکھنڑ۔

¹⁰ پر ضروری ہے جو او پہلے چنگی طرحاں پرکھے ونجنڑ، وَل جے بے اِلزام نِکلنڑ تاں اُنہاں کُوں اِنتظام کرݨ دی خدمت ڈیؤ۔

¹¹ اُنہاں دی ذالاں کُوں وی چاہیدے جو او سنجیدہ ہووݨ، ڈُوجھیاں کُوں بدنام کرݨ آلیاں نہ ہووݨ بلکہ پرہیز گار تے ہر گالھ ءچ اِیماندار ہووݨ۔

¹² اِنتظام کرݨ آلے ہِک ذال آلے ہووݨ تے آپنڑے بالاں تے گھراں کُوں چنگی طرحاں سنبھالنڑ آلے ہووݨ۔

¹³ کیوں جو جیہڑے اِنتظام کرݨ آلے چنگی خدمت کریندے ہِن اُنہاں کُوں چنگا مرتبہ مِلدے تے او مسیح یسُوع اُتے آپنڑے اِیمان ءچ دلیری وی حاصل کریندے ہِن۔

وڈا بھید

¹⁴ مَیں تیڈے کولھ جلدی آوݨ دی اُمید کریندا پِیا ہاں، وَل وی تیکُوں ایہ گالھیں اِیں واسطے لِکھدا پِیا ہاں،

¹⁵ جو جے میکُوں آوݨ ءچ دیر تھی ونجے تاں تیکُوں پتا ہووے جو خُدا دے گھر آلیاں دے وچال جیہڑے زندہ خُدا دی کلیسیا تے حق دا تھمبا تے بنیاد ہِن، ساڈا چال چلنڑ کِینویں ہوونڑا چاہیدے۔

¹⁶ اِیندے ءچ کوئی شک نئیں جو ساڈے اِیمان دا راز وڈا ہے یعنی او جِسم ءچ ظاہر تھیّا، رُوح دے وسیلے نال صادق ثابت تھیّا فرشتیاں کُوں ڈِکھالی ڈِتا، غیر قوماں ءچ اُوندی تبلیغ تھئی دُنیا ءچ لوک اُوندے اُتے اِیمان گِھن آئے تے او جلال ءچ اسمان اُتے چاتا گِیا۔