1 تِیمُتھِیُس 2 - کِتاب مُقدّس سرائیکی ترجمہ

کلیسیائی عبادت

¹ سبھ تُوں پہلے مَیں ایہ نصیحت کریندا ہاں جو سبھ لوکاں کیتے درخاستاں، دُعاواں، مِنتاں تے شُکر گُزاریاں کیتیاں ونجنڑ،

² بادشاہاں تے وڈے اِختیار آلیاں کیتے وی تاں جو اساں خُدا ترسی تے عزت نال پُر امن تے پُر سکون زندگی گُزار سگوں۔

³ ایجھی دُعا کرݨ چنگی گالھ ہے تے ساڈے نجات ڈیوݨ آلے خُدا کُوں پسند ہے۔

⁴ او چاہندے جو سبھ لوک نجات پاوݨ تے سچائی کُوں پچھاݨ گِھننڑ۔

⁵ کیوں جو خُدا ہِک ہے تے خُدا تے اِنساناں دے وچال درمیانی وی ہِکو ای ہے یعنی مسیح یسُوع جیہڑا اِنسان ہے

⁶ جئیں آپنڑے آپ کُوں ساریاں دی مخلصی کیتے فِدیہ دے طور تے ڈے ڈِتا۔ اِینویں اُوں مقرر وقت اُتے اِیں گالھ دی گواہی ڈِتی۔

⁷ اِیں مقصد کیتے میکُوں تبلیغ کرݨ آلا تے رسُول تے غیر قوماں کُوں اِیمان تے سچائی دے گالھیں سِکھاوݨ آلا مقرر کیتا گِیا۔ مَیں کُوڑ نئیں مریندا بلکہ سچ آدھا ہاں۔

⁸ بس مَیں چاہندا ہاں جو بندے ہر جاہ، کاوڑ تے تکرار دے بغیر پاک ہتھاں کُوں چا تے دُعا کرݨ۔

⁹ اِینویں ای عورتاں مناسب کپڑے پا تے آپنڑے آپ کُوں حیاداری تے پرہیزگاری نال سنوارݨ، نہ جو فیشن کر تے وال بنڑاوݨ نال تے نہ ای سونے دے زیور یا موتیاں یا قیمتی پُشاک نال۔

¹⁰ بلکہ آپنڑے آپ کُوں نیک کماں نال سنوارݨ جِینویں خُدا پرستی دا دعویٰ کرݨ آلیاں عورتاں کُوں مناسب ہے۔

¹¹ عورت کُوں چاہیدے جو او چُپ رہ تے پُوری فرمانبرداری نال سِکھے۔

¹² مَیں عورت کُوں اِجازت نئیں ڈیندا جو تعلیم ڈیوے یا مرد اُتے حُکم چلاوے بلکہ او چُپ راہوے۔

¹³ کیوں جو پہلے آدم کُوں بنڑایا گِیا تے بعد ءچ حوّا کُوں۔

¹⁴ تے آدم دوکھے ءچ نہ آیا بلکہ عورت دوکھا کھا تے گُنہگار تھی گئی۔

¹⁵ پر اُونکُوں بال جمنڑ نال نجات مِلسی، پر شرط ایہ ہے جو او اِیمان، محبت، پاکیزگی تے پرہیزگاری نال زندگی گُزریندی راہوے۔