1 تِیمُتھِیُس 1 - کِتاب مُقدّس سرائیکی ترجمہ

تعارف

¹ ایہ خط میں پولُس دی طرفوں ہے جیہڑا ساڈے نجات ڈیوݨ آلے خُدا تے ساڈی اُمید یعنی یسُوع مسیح دے حُکم نال اُوندا رسُول مقرر کیتا گِیا ہاں،

² تِیمُتِھیُس دے ناں جیہڑا اِیمان دے لحاظ نال میڈے حقیقی پوتر وانگُوں ہے۔ تیکُوں خُدا باپ تے ساڈے خُداوند یسُوع مسیح دی طرفوں فضل، رحم تے اِطمینان حاصل تھیندا راہوے۔

کُوڑی تعلیم دے خلاف تنبیہ

³ مَیں مَکِدُنیہ دو روانہ تھیندے ویلے تیکُوں نصیحت کیتی ہئی جو تُوں اِفِسُس ءچ رہ تے، غلط تعلیم ڈیوݨ آلیاں کُوں تاکید کر جو او اِینویں کرݨ تُوں باز آ ونجنڑ،

⁴ تے فرضی کہانڑیاں تے ختم نہ تھیوݨ آلے شِجریاں اُتے غور نہ کرݨ۔ ایجھے گالھیں جھیڑے پیدا کریندیاں ہِن تے خُدا دے کم کُوں پُورا نئیں کریندیاں جیہڑا اِیمان نال کیتا ویندے۔

⁵ میڈی اِیں نصیحت دا مقصد او محبت ہے جیہڑی پاک دِلی، نیک نیّتی تے حقیقی اِیمان نال پیدا تھیندی ہے۔

⁶ کُجھ لوک اِنہاں کنُوں بھٹک گئے ہِن تے فضول گالھیں ءچ لگ گئے ہِن۔

⁷ او شریعت دے عالم بنڑݨ چاہندے ہِن پر جیہڑے گالھیں او آدھے ہِن تے جِنہاں دا یقین نال دعویٰ کریندے ہِن، اُنہاں کُوں خود وی نئیں سمجھدے۔

⁸ اساں جانڑدے ہیں جو شریعت چنگی ہے، پر شرط ایہ ہے جو اُونکُوں مناسب طور تے اِستعمال کیتا ونجے۔

⁹ اساں ایہ وی جانڑدے ہیں جو شریعت راستبازاں کیتے نئیں بلکہ بے شرع لوکاں، باغیاں، بدکاراں، گُنہگاراں، ناپاکاں، بے دیناں، ماء پِیُو کُوں قتل کرݨ آلیاں، خونیاں

¹⁰ تے اُنہاں کیتے ہے جیہڑے زِنا کار ہِن، چھوہر باز ہِن، اغوا کرݨ آلے ہِن، کُوڑ مریندے ہِن، کُوڑیاں قَسماں چیندے ہِن، تے ایجھے بہُوں سارے کم کریندے ہِن جیہڑے صحیح تعلیم دے خلاف ہِن۔

¹¹ ایہ تعلیم مُبارک خُدا دے جلال آلی اُوں خوشخبری دے مطابق ہے جیہڑی میڈے سپُرد کیتی گئی ہے۔

خُدا دی رحمت کیتے شُکرگزاری

¹² مَیں آپنڑے خُداوند یسُوع مسیح دا شُکر کریندا ہاں جئیں میکُوں طاقت ڈِتی تے دیانتدار جاݨ تے آپنڑی خدمت کیتے مقرر کیتا۔

¹³ بھانویں مَیں پہلے کُفر بَکنڑ آلا، اِیمانداراں کُوں ستاوݨ تے بے عزت کرݨ آلا ہم، پر خُدا میڈے اُتے رحم کیتا کیوں جو مَیں اِیمان گِھن آوݨ کنُوں پہلے تے نادانی ءچ ایہ سبھ کُجھ کیتا ہا۔

¹⁴ تے ساڈے خُداوند دا فضل میڈے اُتے بہُوں زیادہ تھیّا، اُوں اِیمان تے محبت نال جیہڑا مسیح یسُوع ءچ ہے۔

¹⁵ ایہ گالھ سچ تے ہر لحاظ نال قبول کرݨ دے لائق ہے جو ”مسیح یسُوع گُنہگاراں کُوں نجات ڈیوݨ کیتے دُنیا ءچ آیا،“ جِنہاں ءچوں سبھ تُوں وڈا گُنہگار مَیں ہاں۔

¹⁶ پر میڈے اُتے رحم اِیں واسطے تھیّا جو خُداوند یسُوع مسیح میڈے ذریعے جیہڑا سبھ تُوں وڈا گُنہگار ہاں، آپنڑا کمال صبر ظاہر کرے تاں جو مَیں اُنہاں ساریاں کیتے نمونہ بنڑ سگاں جیہڑے اُوندے اُتے اِیمان گِھن آ تے ہمیشاں دی زندگی پیسن۔

¹⁷ ہُنڑ ازلی تے ابدی بادشاہ یعنی غیرفانی تے نظر نہ آوݨ آلے واحد خُدا دی عزت تے تعریف ہمیشاں تئیں تھیندی راہوے۔ آمین۔

¹⁸ تِیمُتِھیُس میڈے پوتر، مَیں تیکُوں ایہ نصیحت اُنہاں پیشنگوئیاں دے مطابق کریندا ہاں جیہڑیاں تیڈے بارے ءچ کیتیاں گئیاں ہَن تاں جو تُوں اُنہاں دی مدد نال چنگی لڑائی لڑیں،

¹⁹ تے اِیمان تے نیک نیّتی اُتے قائم راہویں کیوں جو کُجھ لوکاں اِینکُوں رَد کر ڈِتے، تے آپنڑے اِیمان دا بیڑا غرق کر گِھدے۔

²⁰ اُنہاں ءچ ہُمِنِیُس تے سکندر وی ہِن، جِنہاں کُوں مَیں شیطان دے حوالے کر ڈِتے تاں جو او کُفر بَکنڑ کنُوں باز راہونڑا سِکھنڑ۔