1تھِسّلُنیکیوں 1 - کِتاب مُقدّس سرائیکی ترجمہ

تعارف

¹ ایہ خط پولُس، سِیلاس تے تِیمُتِھیُس دی طرفوں تھِسّلُنِیکے دی کلیسیا دے ناں ہے جیہڑی خُدا باپ تے خُداوند یسُوع المسیح ءچ ہے۔ فضل تے اِطمینان تُہاکُوں حاصل تھیندا راہوے۔

تھِسّلُنیکیاں دی زندگی تے اِیمان

² تُساں ساریاں کیتے اساں ہمیشاں خُدا دا شُکر ادا کریندے ہیں، تے آپنڑیاں دُعاواں ءچ ہر ویلے تُہاکُوں یاد رکھیندے ہیں۔

³ اساں تُہاڈے کم جیہڑے اِیمان دی وجہ کنُوں ہِن، تے تُہاڈی محنت جیہڑی محبت دا نتیجہ ہے، تے تُہاڈے صبر کُوں جیہڑا ساڈے خُداوند یسُوع المسیح اُتے اُمید رکھنڑ دے سببّوں تُہاڈے ءچ پیدا تھئے، آپنڑے خُدا تے باپ دی حضُوری ءچ یاد کریندے ہیں۔

⁴ عزیز بِھراؤ، تے خُدا دے پیاریو، اساں جانڑدے ہیں جو تُساں خُدا دے چُنڑے ہوئے ہیوے۔

⁵ کیوں جو ساڈی خوشخبری صرف لفظاں نال نئیں بلکہ قُدرت، رُوح القُدس تے پُورے یقین نال تُہاڈے تئیں پُجی ہے۔ تُساں جانڑدے ہیوے جو اساں تُہاڈے وچال تُہاڈی خاطر کِینویں زندگی گُزریندے ہسے۔

⁶ بھانویں سخت مُصیبت آئی، وَل وی تُساں کلام کُوں رُوح القُدس دی ڈِتی ہوئی خوشی نال قبول کر تے ساڈے تے خُداوند دے نمونے اُتے چلنڑ آلے بنڑ گئے۔

⁷ اِینویں تُساں مَکِدُنیہ تے اَخیہ دے سبھ اِیمانداراں کیتے نمونہ بنڑ گئے۔

⁸ خُداوند دا پیغام تُہاڈے وسیلے نہ صرف مَکِدُنیہ تے اَخیہ ءچ پھیل گِیا، بلکہ تُہاڈا اِیمان جیہڑا خُدا اُتے ہے، اُوندی خبر ہر جاہ ایجھی پھیل گئی ہے جو ہُنڑ ساڈے آکھنڑ دی کوئی ضرورت کائنی۔

⁹ کیوں جو لوک خود ڈسیندے ہِن جو جِیں ویلے اساں تُہاڈے کولھ آئے تاں تُساں کِینویں خوشی نال ساڈا اِستقبال کیتا، تے کِینویں بُتاں کُوں چھوڑ تے زندہ تے برحق خُدا دی عبادت کرݨ کیتے اُوندے دو آئے،

¹⁰ تے ایہ وی جو تُساں اُوندے پوتر دے اسمان کنُوں آوݨ دا اِنتظار کریندے ہیوے، یعنی یسُوع جِینکُوں خُدا مُردیاں ءچوں زندہ کیتا تے جیہڑا ساکُوں آوݨ آلے غضب کنُوں بچیندے۔