1 پطرس 5 - کِتاب مُقدّس سرائیکی ترجمہ

خُدا دا اِجڑ

¹ تُساں جیہڑے کلیسیا دے بزُرگ ہیوے، میں تُہاکُوں ہِک بزُرگ، مسیح دے ڈُکھاں دا گواہ، تے اُوندے ظاہر تھیوݨ آلے جلال ءچ شریک تھیوݨ آلے دی حیثیت نال ایہ نصیحت کریندا ہاں جو

² تُساں خُدا دے اِجڑ دی نگہبانی کرو، جیہڑا تُہاڈے سپُرد کیتا گئے۔ ایہ خدمت مجبوری نال نئیں بلکہ خُدا دی مرضی دے مطابق خوشی نال، مال دولت دے لالچ کیتے نئیں بلکہ دِلی شوق نال کرو۔

³ تے جیہڑے لوک تُہاڈے سپُرد ہِن اُنہاں اُتے حُکم نہ چلاؤ بلکہ اِجڑ کیتے چنگا نمونہ بنڑو۔

⁴ وَل جِیں ویلے سردار آجڑی ظاہر تھیسی تاں تُساں اِنعام ءچ ایجھا تاج پیسو جِیندا جلال کڈھائیں ختم نہ تھیسی۔

⁵ اِینویں ای نوجوانو، تُساں بزُرگاں دے تابع راہو تے عاجزی نال ہِک ڈُوجھے دی خدمت کریندے راہو کیوں جو ”خُدا مغرُوراں دی مُقابلہ کریندے پر عاجزی کرݨ آلیاں اُتے مہربانی کریندے۔“

⁶ بس خُدا دے زورآور ہتھ دے تلے عاجزی نال راہو تے او تُہاکُوں مناسب ویلے تے سرفراز کریسی۔

⁷ آپنڑیاں ساریاں فِکراں اُوندے اُتے سَٹ ڈیؤ کیوں جو او تُہاڈی فِکر کریندے۔

⁸ ہوشیار تے خبردار راہو کیوں جو تُہاڈا دُشمنڑ ابلیس گجنڑ آلے ببرشیر وانگُوں گولھیندا ودے جو کہیں کُوں پھاڑ کھاوے۔

⁹ اِیمان ءچ مضبوط راہندے ہوئے اُوندا مُقابلہ کرو۔ تُساں جانڑدے ہیوے جو پُوری دُنیا ءچ تُہاڈے بِھرا وی اِینویں ای ڈُکھ سہندے پئے ہِن۔

¹⁰ تُہاڈے تھوڑی دیر تئیں ڈُکھ چاوݨ تُوں بعد، خُدا جیہڑا سارے فضل دا مالک ہے تے جئیں مسیح دے ذریعے تُہاکُوں آپنڑے ابدی جلال ءچ شریک تھیوݨ کیتے سڈے، اُوہو خود تُہاکُوں کامِل، مضبوط، قائم تے زورآور کریسی۔

¹¹ سلطنت ہمیشاں تئیں اُوندی ای راہوے۔ آمین۔

آخری گالھیں تے سلام

¹² مَیں سِیلاس دے ہتھ جیہڑا میڈی نظر ءچ ہِک وفادار بِھرا ہے، ایہ مختصر خط لِکھوا تے تُہاکُوں بھیجیا ہے تاں جو تُہاڈی حوصلہ افزائی تھیوے۔ مَیں گواہی ڈیندا ہاں جو خُدا دا سچا فضل اِیہو ہے۔ اِیندے اُتے قائم راہو۔

¹³ بابل دی کلیسیا جیہڑی تُہاڈے وانگُوں چُنڑی ہوئی ہے تُہاکُوں سلام آدھی ہے۔ میڈا پوتر مرقس وی تُہاکُوں سلام آدھے۔

¹⁴ ہِک ڈُوجھے کُوں پاک بوسے نال سلام آکھو۔ تُساں ساریاں کُوں جیہڑے مسیح ءچ ہیوے، اِطمینان حاصل تھیندا راہوے۔