1 پطرس 4 - کِتاب مُقدّس سرائیکی ترجمہ

خُدا کیتے زندگی گُزارنڑا

¹ جڈاں مسیح جِسمانی طور تے ڈُکھ چاتا تاں تُساں وی اُوں وانگُوں ڈُکھ چاوݨ کیتے تیار راہو کیوں جو جئیں وی مسیح دی خاطر ڈُکھ سہے، اُوں گُناہ کُوں چھوڑ ڈِتے۔

² ہُنڑ او دُنیا ءچ آپنڑی باقی زندگی اِنسانی بُریاں خواہشاں دے مطابق نئیں بلکہ خُدا دی مرضی دے مطابق گُزارے۔

³ تُساں پہلے ای آپنڑی زندگی دا بہُوں وقت اُوہو کرݨ ءچ گُزار ڈِتے جیہڑا غیر قوماں کُوں پسند ہے یعنی شہوت پرستی، بُریاں خواہشاں، شراب پِیوݨ، نچنڑ گاوݨ، نشے بازی تے بُت پرستی ءچ، جیہڑا بہُوں مکرُوہ کم ہے۔

⁴ تے ہُنڑ او لوک حیران تھیندن جو تُساں ایجھیاں سبھ بدکاریاں ءچ اُنہاں دا ساتھ نئیں ڈیندے، تے او تُہاکُوں بُرا بھلا آدھے ہِن۔

⁵ پر اُنہاں کُوں اُونکُوں حساب ڈیونڑا پوسی جیہڑا زندیاں تے مُردیاں دی عدالت کرݨ کُوں تیار ہے۔

⁶ تے اُنہاں لوکاں کُوں جیہڑے ہُنڑ مر گئے ہِن، اِیں واسطے خوشخبری سُنڑائی گئی ہئی جو بیشک جِسمانی طور تے تاں اُنہاں دی عدالت اِنساناں دی طرحاں تھیوے، پر رُوحانی لحاظ نال زندہ راہوݨ جِینویں خُدا زندہ ہے۔

خُدا دیاں نعمتاں دے چنگے مُختار

⁷ سبھ چیزاں دے خاتمے دا وقت نیڑے ہے۔ اِیں واسطے دُعا کرݨ کیتے سنجیدہ تے ہوشیار راہو۔

⁸ سبھ تُوں اہم گالھ تاں ایہ ہے جو آپس ءچ گھاٹی محبت رکھو کیوں جو محبت بہُوں سارے گُناہاں اُتے پڑدہ پا ڈیندی ہے۔

⁹ بُڑبُڑ کیتے بغیر مہمان نوازی کرو۔

¹⁰ خُدا ہر ہِک کُوں کوئی نہ کوئی نعمت عطا کیتی ہے۔ اِیں واسطے اِنہاں مختلف نعمتاں کُوں خُدا دے چنگے مُختار آلی کار ہِک ڈُوجھے دی خدمت کرݨ ءچ اِستعمال کرو۔

¹¹ جے کوئی کُجھ بیان کرے تاں اِینویں کرے جِینویں خُدا اُوندے ذریعے کلام کریندا پئے۔ جے کوئی خدمت کرے تاں اُوں طاقت نال کرے جیہڑی خُدا ڈیندے تاں جو سبھ گالھیں ءچ یسُوع مسیح دے وسیلہ نال خُدا دا جلال ظاہر تھیوے۔ جلال تے سلطنت ہمیشاں تئیں اُوندا ای ہووے۔ آمین۔

مسیحی ہووݨ پارُوں ڈُکھ سَہونڑا

¹² عزیزو! جیہڑی مُصیبت بھاہ آلی کار تُہاڈی ازمائش کیتے تُہاڈے اُتے آئی ہے اُوندے تُوں حیران تھی تے ایہ نہ سوچو جو ساڈے نال انوکھی گالھ تھئی ہے۔

¹³ بلکہ خوشی مناؤ جو تُساں مسیح دے ڈُکھاں ءچ شریک تھی گئے ہیوے تاں جو جِیں ویلے اُوندا جلال ظاہر تھیوے تاں تُساں مزید وی خوش تھی سگو۔

¹⁴ جے مسیح دے ناں دے سببّوں تُہاڈی بے عزتی کیتی ویندی ہے تاں تُساں مُبارک ہیوے کیوں جو خُدا دا جلالی رُوح القُدس تُہاڈے اُتے چھاں کیتی پئے۔

¹⁵ پر تُہاڈے ءچوں کوئی وی ایجھا نہ ہووے جیہڑا کہیں کُوں قتل کرݨ، چوری یا بدکاری کرݨ یا ڈُوجھیاں دے کم ءچ دَخل ڈیوݨ دی وجہ کنُوں ڈُکھ چاوے۔

¹⁶ پر جے کوئی مسیح دا بندہ ہووݨ دے سببّوں ڈُکھ چاوے تاں شرماوے نہ بلکہ خُدا دی تعریف کرے جو او اِیں ناں تُوں سڈیا ویندے۔

¹⁷ کیوں جو عدالت دا ویلا آ گئے تے عدالت خُدا دے گھر آلیاں تُوں شروع تھیسی تے جڈاں عدالت ساڈے تُوں شروع تھیسی تاں اُنہاں دا انجام کیا ہوسی جیہڑے خُدا دی خوشخبری کُوں نئیں منیندے۔

¹⁸ تے ”جڈاں راستباز ای مُشکل نال نجات پیسی، تاں بے دین تے گُنہگار دا کیا بنڑسی؟“

¹⁹ اِیں واسطے جیہڑے لوک خُدا دی مرضی دے مطابق ڈُکھ سہندے ہِن، او آپنڑے آپ کُوں آپنڑے وفادار خالق دے سپُرد کرݨ تے نیکی کریندے راہوݨ۔