1 یُوحنّا 3 - کِتاب مُقدّس سرائیکی ترجمہ

خُدا دے فرزند

¹ ڈیکھو باپ ساڈے نال کیجھی محبت کیتی ہے جو اساں خُدا دے فرزند اکھویندے ہیں۔ تے اساں واقعی ہیں وی۔ دُنیا ساکُوں اِیں واسطے نئیں جانڑدی جو اِیں اُونکُوں وی نہ جانڑیا۔

² عزیزو! اساں اِیں ویلے خُدا دے فرزند ہیں پر اجنڑ تئیں ایہ ظاہر نئیں تھیّا جو بِیا کیا کُجھ ہوسُوں۔ پر اِتنا جانڑدے ہیں جو جِیں ویلے یسُوع ظاہر تھیسی تاں اساں اُوندے وانگُوں ہوسُوں کیوں جو اساں اُونکُوں اُونویں ای ڈیکھسوں جِینویں او اصل ءچ ہے۔

³ تے جیہڑا کوئی یسُوع تُوں ایہ اُمید رکھیندے، او آپنڑے آپ کُوں پاک رکھیندے، جِینویں او خود پاک ہے۔

⁴ جیہڑا کوئی گُناہ کریندے او شریعت دی مخالفت کریندے، کیوں جو گُناہ شریعت دی مخالفت ای ہے۔

⁵ تے تُساں جانڑدے ہیوے جو یسُوع اِیں واسطے ظاہر تھیّا ہا جو گُناہاں کُوں چا گِھن ونجے تے اُوندے ءچ کوئی گُناہ نئیں۔

⁶ جیہڑا کوئی اُوندے ءچ قائم راہندے، او گُناہ نئیں کریندا۔ جیہڑا کوئی گُناہ کریندے، اُوں نہ تاں مسیح کُوں پچھانڑیا تے نہ اُونکُوں جانڑیا ہے۔

⁷ بالو! کہیں دے دوکھے ءچ نہ اوائے۔ جیہڑا کوئی نیک کم کریندے، او نیک ہے جِینویں مسیح نیک ہے۔

⁸ جیہڑا کوئی گُناہ کریندا راہندے، او ابلیس دا بندہ ہے، کیوں جو ابلیس شروع کنُوں ای گُناہ کریندا ریہا ہے۔ خُدا دا پوتر اِیں واسطے ظاہر تھئے جو ابلیس دے کماں کُوں برباد کر ڈیوے۔

⁹ جیہڑا کوئی خُدا تُوں پیدا تھئے، او گُناہ نئیں کریندا راہندا کیوں جو اُوندے ءچ خُدا دی فطرت راہندی ہے۔ اُوندے کیتے گُناہ کرݨ ناممکن ہے کیوں جو او خُدا دا پوتر ہے۔

¹⁰ اِتُھوں پتہ چلدے جو کیہڑے خُدا دے فرزند ہِن تے کیہڑے ابلیس دے۔ جیہڑا نیک کم نئیں کریندا تے آپنڑے بِھرانواں نال محبت نئیں رکھیندا، او خُدا دا بندہ کائنی۔

آپس ءچ محبت رکھو

¹¹ ایہ اُوہو پیغام ہے جیہڑا تُساں شروع کنُوں سُنڑیا ہے جو ہِک ڈُوجھے نال محبت رکھو۔

¹² قائن وانگُوں نہ بنڑو جیہڑا ابلیس دا بندہ ہا تے جئیں آپنڑے بِھرا کُوں قتل کیتا۔ اُوں کیوں اُونکُوں قتل کیتا؟ اِیں واسطے جو اُوندے کم بُرے ہَن پر اُوندے بِھرا دے نیک۔

¹³ اِیں واسطے بِھراؤ! جے دُنیا تُہاڈے نال دُشمنڑی رکھیندی ہے تاں حیران نہ تھیؤ۔

¹⁴ اساں جانڑدے ہیں جو اساں موت کنُوں نِکل تے زندگی ءچ داخل تھی گئے ہیں، کیوں جو اساں آپنڑے بِھرانواں نال محبت رکھیندے ہیں۔ جیہڑا کوئی محبت نئیں رکھیندا، او ہُنڑ تئیں موت دی حالت ءچ ہے۔

¹⁵ جیہڑا کوئی آپنڑے بِھرا نال دُشمنڑی رکھیندے، او خونی ہے۔ تے تُساں جانڑدے ہیوے جو کہیں خونی ءچ ہمیشاں دی زندگی نئیں ہوندی۔

¹⁶ اساں محبت کُوں اِیں تُوں جانڑیا ہے جو یسُوع مسیح ساڈے کیتے آپنڑی جان قُربان کر ڈِتی۔ تے ساڈے اُتے وی ایہ فرض ہے جو اساں آپنڑے بِھرانواں کیتے آپنڑی جان قُربان کرُوں۔

¹⁷ جے کہیں دے کولھ دُنیا دا مال موجود ہووے پر او آپنڑے بِھرانواں کُوں مُتھاج ڈیکھ تے اُنہاں اُتے رحم نہ کرے تاں خُدا دی محبت اُوندے ءچ کِینویں قائم رہ سگدی ہے؟

¹⁸ بالو! اساں صرف کلام تے زبان نال ای نئیں بلکہ سچائی تے آپنڑے اعمال نال وی محبت کرُوں۔

خُدا دے حضُور دلیری

¹⁹ اِیں تُوں اساں جاݨ گِھنسوں جو اساں سچائی دے ہیں تے خُدا دے حضُور دلیری حاصل کریسوں۔

²⁰ جے ساڈا دل ساکُوں قصُوروار کھڑیندے تاں خُدا ساڈے دل تُوں وڈا ہے تے سبھ کُجھ جانڑدے۔

²¹ عزیزو! جے ساڈا دل ساکُوں قصُوروار نئیں کھڑیندا تاں اساں دلیری نال خُدا دے سامنڑے آ سگدے ہیں۔

²² تے اساں جیہڑا کُجھ اُوں کنُوں منگدے ہیں، او ساکُوں اُوندی طرفوں مِل ویندے، کیوں جو اساں اُوندے حُکماں اُتے عمل کریندے ہیں تے اُوہو کریندے ہیں جیہڑا اُونکُوں پسند ہے۔

²³ تے اُوندا حُکم ایہ ہے جو اساں اُوندے پوتر یسُوع مسیح دے ناں اُتے اِیمان رکھوں تے اُوندے حُکم دے مطابق ہِک ڈُوجھے نال محبت رکھوں۔

²⁴ جیہڑا کوئی خُدا دے حُکماں اُتے عمل کریندے، او خُدا ءچ قائم راہندے تے خُدا اُوندے ءچ۔ تے اساں جانڑدے ہیں جو خُدا ساڈے ءچ اُوں رُوح القُدس دے ذریعے جیہڑا اُوں ساکُوں بخشیا ہے، قائم راہندے۔