1 یُوحنّا 2 - کِتاب مُقدّس سرائیکی ترجمہ

مسیح ساڈا مددگار

¹ میڈے بالو! مَیں تُہاکُوں ایہ گالھیں اِیں واسطے لِکھدا پِیاں ہاں جو تُساں گُناہ نہ کرو۔ پر جے کوئی گُناہ کرے تاں خُدا باپ دے حضُور ءچ ساڈی سفارش کرݨ آلا ہِک موجود ہے یعنی یسُوع مسیح جیہڑا راستباز ہے۔

² اُوہو ساڈے گُناہاں دا کفارہ ڈیوݨ آلا ہے تے نہ صرف ساڈے گُناہاں دا بلکہ ساری دُنیا دے گُناہاں دا وی۔

³ جے اساں اُوندے حُکماں اُتے عمل کرُوں تاں ساکُوں یقین تھی ویندے جو اساں اُونکُوں جاݨ گِھدے۔

⁴ جیہڑا آدھے جو ”مَیں مسیح کُوں جاݨ گِھدے“ پر اُوندے حُکماں اُتے عمل نئیں کریندا تاں او کُوڑا ہے تے اُوندے ءچ سچائی کائنی۔

⁵ پر جیہڑا اُوندے کلام اُتے عمل کریندے تاں اُوندے ءچ خُدا دی محبت یقیناً کامِل تھی گئی ہے۔ اِیں تُوں ساکُوں پتہ چلدے جو اساں اُوندی رفاقت ءچ ہیں۔

⁶ جیہڑا کوئی آدھے جو میں خُدا ءچ قائم ہاں تاں اُونکُوں چاہیدے جو او وی اُونویں ای زندگی گُزارے جِینویں مسیح گُزاری۔

نواں حُکم

⁷ عزیزو! مَیں تُہاکُوں کوئی نواں حُکم نئیں لِکھیندا پِیا بلکہ اُوہو پُرانڑا حُکم جیہڑا شروع کنُوں تُہاکُوں مِلیا ہے۔ ایہ پُرانڑا حُکم اُوہو پیغام ہے جیہڑا تُساں سُنڑ گِھدے۔

⁸ پر مَیں جیہڑا حُکم تُہاکُوں لِکھ تے بھجیندا پِیا ہاں، او اِیں لحاظ نال نواں ہے جو اُوندی سچائی مسیح ءچ تے تُہاڈی زندگی ءچ نظر آندی ہے۔ کیوں جو اندھارا ختم تھیندا ویندے تے حقیقی نُور چمکنڑ لگ گئے۔

⁹ جیہڑا کوئی نُور ءچ ہووݨ دا دعویٰ کریندے، پر آپنڑے بِھرانواں نال دُشمنڑی رکھیندے، او حالی تئیں اندھارے ءچ ہے۔

¹⁰ جیہڑا کوئی آپنڑے بِھرانواں نال محبت رکھیندے، او نُور ءچ راہندے تے اُوندے ءچ تُھڈا کھواوݨ آلی کوئی چیز نئیں۔

¹¹ پر جیہڑا آپنڑے بِھرانواں نال دُشمنڑی رکھیندے، او اندھارے ءچ ہے تے اندھارے ءچ ای ٹُردے۔ او نئیں جانڑدا جو کِتھاں ویندے کیوں جو اندھارے اُونکُوں اندھا کر ڈِتے۔

¹² بالو! مَیں تُہاکُوں اِیں واسطے لِکھدا پِیا ہاں جو مسیح دے ناں دے وسیلے نال تُہاڈے گُناہ معاف کر ڈِتے گئے ہِن۔

¹³ بزُرگو! مَیں تُہاکُوں اِیں واسطے لِکھدا پِیا ہاں جو تُساں اُونکُوں جیہڑا ازل کنُوں موجود ہے، جاݨ گِھدے۔ جوانو! مَیں تُہاکُوں اِیں واسطے لِکھدا پِیا ہاں جو تُساں ابلیس اُتے غالب آ گئے ہیوے۔ بالو! مَیں تُہاکُوں اِیں واسطے لِکھیا ہے جو تُساں خُدا باپ کُوں جاݨ گِھدے۔

¹⁴ بزُرگو! مَیں تُہاکُوں اِیں واسطے لِکھیا ہے جو تُساں اُونکُوں جیہڑا ازل کنُوں موجود ہے، جاݨ گِھدے۔ جوانو! مَیں تُہاکُوں اِیں واسطے لِکھیا ہے جو تُساں مضبوط ہیوے تے خُدا دا کلام تُہاڈے دِلاں ءچ وسدے، تے تُساں ابلیس اُتے غالب آ گئے ہیوے۔

دُنیا نال محبت نہ رکھو

¹⁵ نہ دُنیا نال محبت رکھو، نہ دُنیا دیاں چیزاں نال۔ جے کوئی دُنیا نال محبت رکھیندے تاں اُوندے ءچ خُدا باپ دی محبت نئیں۔

¹⁶ کیوں جو جیہڑا کُجھ دُنیا ءچ ہے یعنی جِسم دی بُری خواہش، اکھیں دا لالچ تے زندگی دی شیخی، او باپ دی طرفوں نئیں بلکہ دُنیا دی طرفوں ہے۔

¹⁷ دُنیا تے اُوندیاں خواہشاں ڈوہائیں ختم تھی ویندیاں ہِن پر جیہڑا خُدا دی مرضی اُتے ٹُردے، او ہمیشاں تئیں قائم راہندے۔

مسیح دا مخالف

¹⁸ بالو! ایہ دُنیا دا آخری ویلا ہے۔ جِینویں تُساں سُنڑیا ہے جو مسیح دا مخالف آوݨ آلا ہے، اُوندے مطابق ہُنڑ مسیح دے بہُوں سارے مخالف اُٹھی کھڑے تھئے ہِن۔ اِیں تُوں ساکُوں پتہ چلدے جو آخری ویلا آ گئے۔

¹⁹ ایہ لوک ساڈے ءچوں نِکلے تاں ہِن پر اصل ءچ ساڈے ءچوں نہ ہَن۔ جے ساڈے ءچوں ہوندے تاں ساڈے نال راہندے۔ پر اُنہاں دے نِکل ونجنڑ تُوں ثابت تھی گئے جو او ساڈے ءچوں نہ ہَن۔

²⁰ پر تُساں تاں اُوں قدُّوس دی طرفوں رُوح القُدس نال مسح کیتے گئے ہیوے تے تُساں سارے سچائی کُوں جانڑدے ہیوے۔

²¹ مَیں تُہاکُوں اِیں واسطے نئیں لِکھیا جو تُساں سچائی کُوں نئیں جانڑدے بلکہ اِیں واسطے جو تُساں سچائی کُوں جانڑدے ہیوے تے اِیں واسطے وی جو کوئی کُوڑ سچائی دی طرفوں نئیں۔

²² وَل کُوڑا کوݨ ہے؟ اُوہو جیہڑا یسُوع دے المسیح ہووݨ دا اِنکار کریندے۔ اُوہو مسیح دا مخالف ہے۔ او باپ تے پوتر دا اِنکار کریندے۔

²³ جیہڑا کوئی پوتر دا اِنکار کریندے، اُوندے کولھ باپ وی نئیں تے جیہڑا پوتر دا اِقرار کریندے، اُوندے کولھ باپ وی ہے۔

²⁴ او پیغام جیہڑا تُساں شروع کنُوں سُنڑدے آئے ہیوے، تُہاڈے دل ءچ قائم راہوے۔ جے او پیغام تُہاڈے ءچ قائم راہوے تاں تُساں وی باپ تے اُوندے پوتر ءچ قائم راہسو۔

²⁵ تے جیہڑا وعدہ اُوں ساڈے نال کیتے، او ہمیشاں دی زندگی ہے۔

²⁶ مَیں ایہ گالھ اُنہاں دے بارے ءچ لِکھی ہے جیہڑے تُہاکُوں گُمراہ کرݨ دی کوشش کریندے ہِن۔

²⁷ پر رُوح القُدس جیندے نال مسیح تُہاکُوں مسح کیتے، تُہاڈے دِلاں ءچ قائم راہندے، اِیں واسطے ضرورت کائنی جو کوئی تُہاکُوں سِکھاوے۔ رُوح القُدس ای تُہاکُوں سارے گالھیں سکھیندے تے جیہڑا کُجھ او سکھیندے، سچائی ہے کُوڑ نئیں۔ بس جِینویں اُوں تُہاکُوں سِکھائے، اُونویں ای تُساں مسیح ءچ قائم راہو۔

²⁸ ہُنڑ پیارے بالو! مسیح ءچ قائم راہو تاں جو جِیں ویلے او ظاہر تھیوے تاں ساکُوں اعتماد ہووے تے اُوندے آوݨ اُتے اساں اُوندے سامنڑے شرمندہ نہ تھیؤں۔

²⁹ جڈاں تُساں جانڑدے ہیوے جو مسیح راستباز ہے تاں تُساں ایہ وی جانڑدے ہوسو جو جیہڑا کوئی راستبازی دے کم کریندے، او رُوحانی طور تے خُدا دا فرزند ہے۔