1کُرِنتھِیوں 8 - کِتاب مُقدّس سرائیکی ترجمہ

بُتاں دی قُربانی دے گوشت دے بارے ءچ سوال

¹ بُتاں کُوں پیش کیتیاں ونجنڑ آلیاں قُربانیاں دے بارے ءچ ایہ ہے: اساں جانڑدے ہیں جو ”اساں سارا علم رکھیندے ہیں“ پر علم غرور پیدا کریندے جڈاں جو محبت ترقی بخشیندی ہے۔

² جیہڑا وی سمجھدا ہے جو او کُجھ جانڑدا ہے تاں او ہُنڑ تئیں اُونویں نئیں جانڑدا جِینویں جاننڑاں چاہیدے۔

³ پر جیہڑا خُدا نال محبت رکھیندے، خُدا اُونکُوں جانڑدے۔

⁴ بُتاں دیاں قُربانیاں دا گوشت کھاوݨ دے بارے ءچ اساں جانڑدے ہیں جو دُنیا ءچ بُتاں دی حقیقت بالکل نئیں۔ خُدا ہِک ہے تے اُوندے علاوہ کوئی معبُود نئیں۔

⁵ بھانویں اسمان ءچ تے زمین اُتے بہُوں ساریاں چیزاں معبُود اکھویندیاں ہِن تے کُجھ لوکاں کیتے بہُوں سارے ”خُدا“ تے ”خُداوند“ ہِن

⁶ پر ساڈے کیتے تاں ہِکو ای خُدا ہے یعنی اسمانی باپ جیہڑا ساریاں چیزاں دا خالق ہے تے اساں اُوندے کیتے زندہ ہیں۔ تے ہِک ای خُداوند ہے یعنی یسُوع مسیح جیندے وسیلے نال ساریاں چیزاں وجود ءچ آئیاں تے اساں وی اُوندے وسیلے نال زندہ ہیں۔

⁷ پر ایہ علم ساریاں دے کولھ نئیں، بلکہ کُجھ ایماندار ہُنڑ تئیں بُتاں دے عادی ہِن۔ اِیں واسطے جِیں ویلے او قُربانی دا گوشت کھاندن تاں ایہ سمجھ تے جو بُت دی پُوجا کریندے پئین، آپنڑے ضمیر دی کمزوری دے سببّوں آپنڑے آپ کُوں قصُوروار سمجھنڑ لگدن۔

⁸ اصل ءچ کھانڑا ساکُوں خُدا دے نیڑے نہ گِھن آسی۔ جے اساں نہ کھاؤں تاں ساڈا کوئی نُقصان نئیں تے جے کھا گِھنوں تاں فائدہ وی نئیں۔

⁹ پر خبردار راہو، اِینویں نہ تھیوے جو تُہاڈی ایہ ازادی کمزور اِیمان آلیاں کیتے تُھڈا کھاوݨ دا سبب بنڑ ونجے۔

¹⁰ کیوں جو جے کوئی کمزور اِیمان آلا تَیں علم رکھنڑ آلے کُوں بُت خانہ ءچ کھانڑا کھاندے ڈیکھے تاں کیا اُونکُوں آپنڑے ضمیر دے خلاف بُتاں دی قُربانی دے گوشت کُوں کھا گِھننڑ دی جُرأت نہ مِل ویسی؟

¹¹ اِینویں تیڈا علم اُوں کمزور اِیمان آلے دی ہلاکت دا سبب بنڑ ویسی جیندے کیتے مسیح آپنڑی جان قُربان کیتی۔

¹² تُوں آپنڑے بِھرانواں دے کمزور ضمیر کُوں دھک لگنڑ دا سبب بنڑ تے نہ صرف اُنہاں دے خلاف گُناہ کیتے بلکہ مسیح دے خلاف وی۔

¹³ اِیں واسطے جے میڈا کھانڑا میڈے مسیحی بِھرا کیتے تُھڈا لگنڑ دا سبب ہے تاں مَیں گوشت کڈھائیں نہ کھاساں تاں جو آپنڑے بِھرا کیتے تُھڈا لگنڑ دا سبب نہ بنڑاں۔