1کُرِنتھِیوں 3 - کِتاب مُقدّس سرائیکی ترجمہاِیمان دی سمجھ دی بجائے دُنیاوی سوچ 1 بِھراؤ! مَیں تُہاڈے نال اِینویں گالھیں نہ کر سگیا جِینویں رُوحانی لوکاں نال کیتیاں ویندیاں ہِن، بلکہ جِینویں جسمانی لوکاں نال جیہڑے اجنڑ تئیں مسیح ءچ بال ہِن۔ 2 مَیں تُہاکُوں کھیر پِلایا، کھانڑا نئیں کھوایا، کیوں جو تُساں اُونکُوں ہضم کرݨ دے قابل نہ ہَوے بلکہ ہُنڑ وی اِیں قابل نئیں۔ 3 تُساں اجنڑ تئیں جِسمانی لوکاں وانگُوں زندگی گُزریندے پئے ہیوے۔ کیوں جو تُہاڈے ءچ حسد تے جھیڑے ہِن تاں کیا تُساں دُنیاوی نئیں؟ کیا تُساں اِنسانی طور طریقے اُتے نئیں چلدے پئے؟ 4 جِیں ویلے ہِک آدھے جو ”مَیں پولُس دا شاگرد ہاں“ تے ڈُوجھا آدھے جو ”مَیں اپُلّوس دا“ تاں کیا تُساں دُنیاوی لوکاں وانگُوں نہ تھئے؟ خُدا دے خادم 5 آخر اپُلّوس کیا ہے تے پولُس کیا ہے؟ ایہ صرف خادم ہِن جِنہاں دے وسیلے تُساں اِیمان گِھن آئے تے اساں ڈُوہائیں اُوہو کم کیتا جیہڑا خُداوند ساڈے کیتے علیحدہ علیحدہ مقرر کیتا۔ 6 مَیں بُوٹا لایا، اپُلّوس پانڑی ڈِتا پر ودھایا خُدا۔ 7 نہ لاوݨ آلا کُجھ ہے، نہ پانڑی ڈیوݨ آلا، پر خُدا سبھ کُجھ ہے جیہڑا اُونکُوں ودھاوݨ آلا ہے۔ 8 لاوݨ آلے تے پانڑی ڈیوݨ آلے ڈوہائیں دا ہِکو مقصد ہے تے ہر ہِک کُوں آپنڑی محنت دے مطابق اجر مِلسی۔ 9 کیوں جو اساں رَل تے خُدا دے کم کرݨ آلے ہیں تے تُساں خُدا دی کھیتی ہیوے۔ تے تُساں خُدا دا گھر وی ہیوے۔ گھر دی مثال کلیسیا دی تعمیر و ترقی دے کم کرݨ آلیاں کُوں آخرت دے ڈینہہ آپنڑی خدمت دے مطابق اجر مِلسی 10 مَیں اُوں فضل دے مطابق جیہڑا خُدا میکُوں بخشیا ہے، ہِک ماہر مِستری وانگُوں بنیاد رکھی ہے تے کوئی ڈُوجھا اُوندے اُتے گھر بنڑیندا پئے۔ پر ہر ہِک کُوں خبردار راہونڑاں چاہیدے جو او کِینویں بنڑیندے۔ 11 کیوں جو جیہڑی بنیاد رکھی گئی ہے او یسُوع مسیح ہے تے اُوندے علاوہ ہُنڑ کوئی بندہ ڈُوجھی بنیاد نئیں رکھ سگدا۔ 12 جیہڑا وی اِیں بنیاد کُوں اُسریندے ویلے سونا، چاندی، قیمتی پتھر، لکڑ، گھاہ یا بُھوں اِستعمال کریندے، 13 اُوندے کم کُوں بھاہ عدالت دے ڈینہہ ظاہر کر ڈیسی کیوں جو بھاہ کم کُوں ازما تے ثابت کریسی جو کیجھا ہے۔ 14 جئیں کہیں دا کیتا ہویا کم باقی راہسی، اُونکُوں اجر مِلسی۔ 15 تے جِیندا کم سڑ ویسی او نُقصان چیسی پر خود سڑدے سڑدے بچ ویسی۔ 16 کیا تُساں نئیں جانڑدے جو تُساں خُدا دی ہیکل ہیوے تے خُدا دا رُوح القُدس تُہاڈے ءچ وسیا ہویا ہے؟ 17 جے کوئی خُدا دی ہیکل کُوں برباد کریسی تاں خُدا اُونکُوں برباد کریسی کیوں جو خُدا دی ہیکل پاک ہے تے او تُساں ہیوے۔ 18 آپنڑے آپ کُوں فریب نہ ڈیؤ۔ جے تُہاڈے ءچوں کوئی آپنڑے آپ کُوں اِیں دُنیا دے معیار دے مطابق حِکمت آلا سمجھدا ہے تاں او نادان بنڑے تاں جو سچ مُچ دانا بنڑ سگے۔ 19 کیوں جو دُنیا جِینکُوں حِکمت سمجھدی ہے، او خُدا دی نظر ءچ بیوقُوفی ہے، جِینویں لِکھیا ہے جو ”او عقلمنداں کُوں اُنہاں دی چالاکی ءچ پَھسا ڈیندے۔“ 20 تے ایہ وی جو ”رب جانڑدے جو عقلمنداں دیاں سوچاں بےکار ہوندیاں ہِن۔“ 21 اِیں واسطے کہیں اِنسان اُتے فخر نئیں کرنڑا چاہیدا کیوں جو سبھ کُجھ تُہاڈا ہے۔ 22 بھانویں او پولُس ہووے یا اپُلّوس ہووے، پطرس ہووے یا دُنیا ہووے، زندگی ہووے یا موت ہووے، اِیں زمانے دیاں چیزاں ہووݨ یا آوݨ آلے زمانے دیاں، 23 سبھ کُجھ تُہاڈا ہے تے تُساں مسیح دے ہیوے تے مسیح خُدا دا ہے۔ |
Modern Central Saraiki Bible © 2024 Strategic Resource Group
Strategic Resource Group