1کُرِنتھِیوں 15 - کِتاب مُقدّس سرائیکی ترجمہمسیح دی قیامت 1 ہُنڑ بِھراؤ! مَیں تُہاکُوں اُوہو خوشخبری یاد ڈیویندا ہاں، جیندی تبلیغ مَیں تُہاڈے ءچ کیتی ہے، جِینکُوں تُساں قبول کر گِھدے تے جیندے اُتے تُساں قائم وی ہیوے۔ 2 اُوں خوشخبری دے وسیلے تُہاکُوں نجات وی مِلدی ہے شرط ایہ ہے جو تُساں اُوں گالھ اُتے قائم راہو جیہڑی مَیں تُہاکُوں پُچائی ہے، نہ تاں تُہاڈا اِیمان گِھن آوݨ بے فائدہ ہے۔ 3 کیوں جو مَیں تُہاکُوں سبھ تُوں زیادہ ضروری گالھ پُچا ڈِتی ہے جیہڑی میکُوں وی پُجی ہئی، جو مسیح خُدا دے کلام دے مطابق ساڈے گُناہاں کیتے مویا، 4 تے دفن تھیّا تے خُدا دے کلام دے مطابق تریجھے ڈینہہ زندہ تھی گِیا، 5 تے پطرس کُوں تے ولا بارہاں شاگرداں کُوں ڈِکھالی ڈِتا۔ 6 اُوندے بعد او پنج سو تُوں زیادہ بِھرانواں کُوں ہِکو پھیری ڈِکھالی ڈِتا جِنہاں ءچوں اکثر ہُنڑ تئیں زندہ ہِن، پر کُجھ سَم گئے ہِن۔ 7 وَل او یعقُوب کُوں ڈِکھالی ڈِتا تے اِیندے بعد سارے رسُولاں کُوں۔ 8 تے سبھ کنُوں آخر ءچ او میکُوں ڈِکھالی ڈِتا جیہڑا پُورے ڈینہاں دا جم نہ ہم۔ 9 کیوں جو مَیں رسُولاں ءچوں ساریاں کنُوں کمتر ہاں بلکہ رسُول اکھواوݨ دے لائق وی نئیں، اِیں واسطے جو مَیں خُدا دی کلیسیا کُوں سَتیندا ہم۔ 10 پر ہُنڑ مَیں جیہڑا کُجھ ہاں، خُدا دے فضل نال ہاں، تے او فضل جیہڑا اُوں میڈے اُتے کیتا او ضائع نئیں تھیّا کیوں جو مَیں ساریاں تُوں زیادہ محنت کیتی، بےشک ایہ محنت مَیں آپنڑی کوشش نال نئیں بلکہ خُدا دے فضل نال کیتی، جیہڑا میڈے اُتے ہا۔ 11 بس بھانویں مَیں ہوواں بھانویں ڈُوجھے، اساں ہِکو خوشخبری دی تبلیغ کریندے ہیں تے اُوندے اُتے تُساں اِیمان وی گِھن آئے۔ مُردیاں دی قیامت 12 جڈاں مسیح دے مُردیاں ءچوں زندہ تھیوݨ دی تبلیغ کیتی ویندی ہے تاں تُہاڈے ءچوں کُجھ کِینویں اکھیندے ہِن جو مُردیاں دی قیامت نئیں ہوندی؟ 13 جے مُردیاں دی قیامت نئیں تاں مسیح وی زندہ نئیں تھیّا۔ 14 تے جے مسیح زندہ نئیں تھیّا تاں ساڈی تبلیغ دا کوئی فائدہ نئیں تے تُہاڈا اِیمان گِھن آوݨ وی بے فائدہ ہے۔ 15 تے اساں خُدا دے کُوڑے گواہ ثابت تھئے کیوں جو اساں گواہی ڈِتی ہے جو مسیح کُوں خُدا مُردیاں ءچوں زندہ کیتے۔ پر جے حقیقت ءچ مُردے زندہ نئیں تھیندے تاں خُدا اُونکُوں زندہ نئیں کیتا۔ 16 کیوں جو جے مُردے زندہ نئیں تھیندے تاں مسیح وی زندہ نئیں تھیّا۔ 17 تے جے مسیح زندہ نئیں تھیّا تاں تُہاڈا اِیمان بے فائدہ ہے تے تُساں ہُنڑ تئیں آپنڑے گُناہاں ءچ بدھے پئے ہیوے۔ 18 بلکہ جیہڑے مسیح اُتے اِیمان رکھیندے ہوئے سَم گئے ہِن او وی ہلاک تھئے۔ 19 جے مسیح اُتے ساڈی اُمید صرف اِیں زندگی کیتے ہے تاں اساں ساریاں لوکاں کنُوں زیادہ بدنصیب ہیں۔ 20 پر حقیقت تاں ایہ ہے جو مسیح مُردیاں ءچوں زندہ تھی گئے تے او مُردیاں ءچوں زندہ تھیوݨ آلیاں ءچوں پہلا پھل ہے۔ 21 کیوں جو جِیں ویلے ہِک بندے دے سببّوں موت دُنیا ءچ آئی تاں مُردیاں دی قیامت وی ہِک بندے دے سببّوں ای آندی ہے۔ 22 تے جِینویں آدم ءچ سبھ مردے ہِن، اُونویں ای مسیح ءچ سبھ زندہ کیتے ویسن۔ 23 پر ہر ہِک آپنڑی آپنڑی واری نال۔ سبھ تُوں پہلے مسیح جیہڑا پہلا پھل ہے، تے وَل مسیح دے آوݨ تے اُوندے لوک۔ 24 وَل آخرت ہوسی۔ اُوں ویلے مسیح ساری حکُومت، سارا اِختیار تے قُدرت فنا کر تے بادشاہی کُوں خُدا باپ دے حوالے کر ڈیسی۔ 25 کیوں جو مسیح کُوں اُوں ویلے تئیں بادشاہی کرݨ ضرور ہے جئیں تئیں او سارے دُشمنڑاں کُوں آپنڑے پیراں تلے نہ کر گِھنے۔ 26 آخری دُشمنڑ جیہڑا فنا کیتا ویسی، او موت ہے۔ 27 کیوں جو لِکھیا ہے جو ”خُدا سبھ کُجھ اُوندے پیراں تلے کر ڈِتے۔“ پر جِیں ویلے کلام آدھے جو ”سبھ کُجھ“ اُوندے تابع کر ڈِتا گئے تاں ظاہر ہے جو خُدا جئیں سبھ کُجھ مسیح دے تابع کر ڈِتے، خود شامل نئیں۔ 28 بلکہ جِیں ویلے سبھ کُجھ پوتر دے تابع تھی ویسی تاں پوتر خود وی خُدا دے تابع تھی ویسی جئیں سبھ کُجھ پوتر دے تابع کر ڈِتے تاں جو خُدا ای ہر لحاظ نال سبھ کُجھ ہووے۔ 29 جے مُردیاں دی قیامت نئیں ہوندی تاں او لوک کیا کریسن جیہڑے مُردیاں دی خاطر بپتسمہ گِھندے ہِن؟ جے مُردے زندہ نئیں تھیندے تاں وَل اُنہاں کیتے بپتسمہ کیوں گِھندے ہِن؟ 30 تے اساں کیوں ہر ویلے آپنڑے آپ کُوں خطرے ءچ پائی ودے ہیں؟ 31 بِھراؤ! ساڈے خُداوند یسُوع مسیح ءچ ہوندے ہوئے، مَیں تُہاڈے اُتے فخر کریندا ہاں تے اِیں فخر دی قَسم کھا تے آدھا ہاں جو مَیں تاں ہر روز مردا ہاں۔ 32 جے مَیں صرف اِنسانی اُمید رکھیندے ہوئے اِفِسُس ءچ جنگلی جانوراں نال لڑیا تاں میکُوں کیا فائدہ تھیّا؟ جے مُردے زندہ نہ کیتے ویسن، تاں ”آؤ کھاؤں پِیؤں کیوں جو کل تاں مرنڑا ای ہے۔“ 33 دوکھا نہ کھاؤ، بُریاں صُحبتاں چنگیاں عادتاں کُوں وِگاڑ ڈیندیاں ہِن۔ 34 چنگی طرحاں ہوش ءچ آؤ تے گُناہ نہ کرو۔ کیجھی شرم دی گالھ ہے جو ہُنڑ وی تُہاڈے ءچوں کُجھ خُدا کُوں نئیں جانڑدے۔ ایہ میں تُہاکُوں شرم ڈیواوݨ کیتے آدھا ہاں۔ زندہ تھیوݨ تُوں بعد آلے جِسم 35 ہُنڑ کوئی ایہ اکھیسی جو ”مُردے کِینویں زندہ تھی ویندے ہِن تے اُنہاں دا جِسم کیجھا ہوسی؟“ 36 بےوقُوفو! جئیں تئیں بیج مِٹی ءچ ختم نئیں تھی ویندا، ودھدا نئیں۔ 37 تے جیہڑا تُوں رہیندا ہیں ایہ او بُوٹا نئیں جیہڑا پیدا تھیوݨ آلا ہے۔ او صرف دانڑا ہے بھانویں کنڑک دا ہووے یا کہیں بئی فصل دا۔ 38 پر خُدا اُوں دانڑیں کُوں آپنڑی مرضی دے مطابق جِسم ڈیندے بلکہ ہر بیج کُوں اُوندی قِسم دے مطابق خاص جِسم ڈیندے۔ 39 سبھ گوشت ہِکو جِیہا نئیں ہوندا۔ اِنساناں دا گوشت بِیا ہے، جانوراں دا بِیا، پکھیں دا بِیا تے مچھی دا بِیا ہے۔ 40 اسماناں اُتے وی جِسم ہِن تے زمین اُتے وی، پر اسمانیاں دی شان بئی ہے تے زمینیاں دی بئی۔ 41 سِجھ دی شان بئی ہے، چَن دی بئی، تاریاں دی بئی بلکہ ہر تارے دی شان فرق ہے۔ 42 مُردیاں دی قیامت وی اِینویں ای ہے۔ دفناوݨ ویلے جِسم فانی حالت ءچ رہایا ویندے تے غیرفانی حالت ءچ زندہ تھی ویندے۔ 43 او بے حُرمتی دی حالت ءچ رہایا ویندے تے جلال دی حالت ءچ زندہ تھی ویندے۔ کمزوری دی حالت ءچ رہایا ویندے تے طاقت دی حالت ءچ زندہ تھی ویندے۔ 44 فطرتی جِسم دفن کیتا ویندے تے رُوحانی جِسم زندہ تھی ویندے۔ جے فطرتی جِسم ہے تاں رُوحانی جِسم وی ہے۔ 45 اِیں واسطے کلام ءچ لِکھیا وی ہے جو ”پہلا بندہ یعنی آدم زندہ اِنسان بنڑیا۔“ آخری آدم یعنی مسیح زندگی بخشنڑ آلی رُوح بنڑیا۔ 46 رُوحانی پہلے نہ ہا بلکہ فطرتی جِسم ہا۔ بعد ءچ رُوحانی آیا۔ 47 پہلا بندہ زمین دی مِٹی کنُوں بنڑایا گِیا پر ڈُوجھا بندہ اسمان کنُوں آیا۔ 48 خاکی اِنسان خاکی آدم وانگُوں ہِن پر اسمانی اِنسان، اسمان کنُوں آئے ہوئے اِنسان وانگُوں۔ 49 جِینویں اساں اُوں خاکی دی صورت اُتے پیدا تھئے، اُونویں ای اساں اُوں اسمانی اِنسان دی صورت اُتے وی ہوسُوں۔ 50 بِھراؤ! میڈا مطلب ایہ ہے جو خون تے گوشت خُدا دی بادشاہی دے وارث نئیں تھی سگدے تے نہ جیہڑا فانی ہے، غیرفانی دا وارث تھی سگدے۔ 51 ڈیکھو مَیں تُہاکُوں ہِک راز دی گالھ ڈسیندا ہاں۔ اساں سارے موت دی نیندر تاں نہ سَم سُوں پر سارے بدل ویسوں۔ 52 تے ایہ ہِک دم اکھ جھمکدیاں ای تھی ویسی جِیں ویلے آخری نرسِنگا وجایا ویسی۔ کیوں جو نرسِنگا وجایا ویسی، تے مُردے غیرفانی جِسم دی حالت ءچ زندہ تھی ویسن تے اساں سارے بدل ویسوں۔ 53 کیوں جو ضرور ہے جو ایہ جیہڑا فانی ہے، غیرفانی لباس پا گِھنے تے ایہ مرݨ آلا جِسم ہمیشاں دی زندگی دا لباس پاوے۔ 54 تے جِیں ویلے ایہ فانی جِسم حیاتی دا لباس پا گِھنسی تے ایہ مرݨ آلا جِسم ہمیشاں دی حیاتی دا لباس پا گِھنسی تاں او قول پُورا تھیسی جیہڑا لِکھیا ہے جو موت فتح دا گِراں تھی گئی۔ 55 ”موت! تیڈی فتح کِتھاں ہے؟ موت! تیڈا ڈنگ کِتھاں ہے؟“ 56 موت دا ڈنگ گُناہ ہے تے گُناہ دا زور شریعت ہے۔ 57 پر خُدا دا شُکر ہے جیہڑا ساڈے خُداوند یسُوع مسیح دے وسیلے نال ساکُوں فتح بخشیندے۔ 58 اِیں کیتے میڈے عزیز بِھراؤ! مضبوط تے قائم راہو تے خُدا دی خدمت ءچ ہمیشاں جوش نال بھرے راہو کیوں جو تُساں جانڑدے ہیوے جو خُداوند کیتے تُہاڈی محنت بے فائدہ نئیں۔ |
Modern Central Saraiki Bible © 2024 Strategic Resource Group
Strategic Resource Group