1کُرِنتھِیوں 12 - کِتاب مُقدّس سرائیکی ترجمہ

رُوح القُدس دیاں نعمتاں

¹ بِھراؤ! مَیں نئیں چاہندا جو تُساں رُوحانی نعمتاں دے بارے ءچ بے خبر راہو۔

² تُساں جانڑدے ہیوے جو جیہڑے ویلے تُساں غیر اِیماندار ہَوے تاں تُساں گُونگے بُتاں دے پِچُھوں ٹُردے ہَوے، جِینویں وی کوئی تُہاکُوں گِھن ویندا ہا۔

³ اِیں واسطے مَیں تُہاکُوں سمجھاوݨ چاہندا ہاں جو جیہڑا بندہ خُدا دے رُوح القُدس دی ہدایت نال گالھ کریندے، او کڈھائیں وی ”یسُوع اُتے لعنت“ نئیں کر سگدا، تے کوئی وی رُوح القُدس دی ہدایت دے بغیر نئیں آکھ سگدا جو ”یسُوع خُداوند ہے۔“

⁴ نعمتاں تاں طرحاں طرحاں دیاں ہِن، پر رُوح القُدس ہِکو ہے۔

⁵ خدمتاں وی طرحاں طرحاں دیاں ہِن، پر خُداوند ہِک ای ہے۔

⁶ خُدا دے کم طرحاں طرحاں دے ہِن، پر خُدا ہِک ای ہے جیہڑا ساریاں ءچ ہر طرحاں دا اثر پیدا کریندے۔

⁷ ہر بندے ءچ رُوح القُدس دا اِظہار ہِک ڈُوجھے دے فائدہ کیتے ہے۔

⁸ کہیں کُوں رُوح القُدس دی طرفوں حِکمت نال بھریا ہویا کلام ڈِتا ویندے تے کہیں کُوں اُونہئی رُوح دے وسیلے علم نال بھریا ہویا کلام۔

⁹ کہیں کُوں اُونہئی رُوح نال اِیمان دی تے کہیں کُوں شِفا ڈیوݨ دی نعمت مِلدی ہے۔

¹⁰ کہیں کُوں معجزے ڈِکھاوݨ دی قُدرت، تے کہیں کُوں نبُوّت کرݨ دی، کہیں کُوں رُوحاں دا اِمتیاز کرݨ دی، کہیں کُوں طرحاں طرحاں دیاں زباناں بولنڑ دی، تے کہیں کُوں زباناں دا ترجمہ کرݨ دی توفیق مِلی ہے۔

¹¹ ایہ ساریاں نعمتاں اُوہو ہِک ای رُوح القُدس ڈیندے تے ہر ہِک کُوں آپنڑی مرضی دے مطابق ونڈیندے۔

ہِک جِسم پر بہُوں سارے اَنگ

¹² جِینویں اِنسانی بدن ہِک ہے تے اُوندے بہُوں سارے اَنگ ہِن تے او سبھ اَنگ رَل تے ہِک بدن بنڑیندن، اُونویں ای مسیح دا بدن وی ہے۔

¹³ کیوں جو اساں ساریاں بھانویں یہُودی ہِن یا یُونانی، بھانویں غُلام ہِن یا آزاد، ہِکو رُوح دے وسیلہ نال ہِک بدن تھیوݨ کیتے بپتسمہ گِھدے، تے ساکُوں ساریاں کُوں ہِکو رُوح القُدس مِلیا ہے۔

¹⁴ بس بدن ہِک اَنگ نال نئیں بلکہ بہُوں سارے انگاں نال بنڑدے۔

¹⁵ جے پیر آکھے، ”کیوں جو مَیں ہتھ نئیں اِیں واسطے بدن دا حصہ کائنی،“ تاں او اِیں وجہ کنُوں بدن تُوں اَنج تاں نئیں۔

¹⁶ تے جے کَن آکھے، ”کیوں جو مَیں اکھ نئیں اِیں واسطے بدن دا حصہ نئیں،“ تاں او اِیں وجہ کنُوں بدن تُوں اَنج تاں نئیں۔

¹⁷ جے سارا بدن اکھ ای ہوندا تاں سُنڑدا کِتھوں؟ جے سارا بدن کَن ای ہوندا تاں سُنگھدا کِتھوں؟

¹⁸ پر سچ ایہ ہے جو خُدا ہر اَنگ کُوں بدن ءچ آپنڑی مرضی دے مطابق رکھیا ہے۔

¹⁹ جے او سارے ہِکو ای اَنگ ہوندے تاں بدن کِتھاں ہوندا۔

²⁰ پر اصل ءچ اَنگ تاں بہُوں ہِن پر بدن ہِکو ای ہے۔

²¹ اکھ ہتھ کُوں نئیں آکھ سگدی جو ”میکُوں تیڈی ضرورت نئیں،“ تے نہ سر پیراں کُوں آکھ سگدے جو ”میکُوں تیڈی لوڑ کائنی۔“

²² بلکہ بدن دے او اَنگ جیہڑے ڈُوجھیاں دی نسبت بہُوں کمزور لگدے ہِن، او زیادہ ضروری ہِن۔

²³ تے او اَنگ جِنہاں کُوں اساں ڈُوجھے انگاں کنُوں گھٹ عزت دے لائق سمجھدے ہیں، اُنہاں کُوں زیادہ عزت ڈیندے ہیں تے جِنہاں کُوں لُکا تے رکھیندے ہیں، اُنہاں کُوں زیادہ اہمیت ڈیندے ہیں۔

²⁴ پر جیہڑے اَنگ لُکائے نئیں ویندے، اُنہاں کُوں اِیندی لوڑ کائنی۔ پر خُدا بدن کُوں اِینویں بنڑائے جو گھٹ عزت آلیاں کُوں زیادہ عزت ڈِتی ونجے،

²⁵ تاں جو بدن ءچ تفرقہ نہ ہووے بلکہ اَنگ ہِک ڈُوجھے دی برابر فِکر رکھنڑ۔

²⁶ جے بدن دا ہِک اَنگ ڈُکھدے تاں سارے اَنگ اُوندے نال ڈُکھدے ہِن۔ تے جے ہِک اَنگ کُوں عزت مِلدی ہے تاں سارے اَنگ اُوندے نال خوشی منیندے ہِن۔

²⁷ بس تُساں رَل تے مسیح دا بدن ہیوے تے کلھے کلھے اُوندے اَنگ ہیوے۔

²⁸ تے خُدا کلیسیا ءچ پہلے رسُول، ڈُوجھے نبی، تریجھے اُستاد، وَل معجزے ڈِکھاوݨ آلے، وَل شِفا ڈیوݨ دی نعمت آلے، مددگار، اِنتظام چلاوݨ آلے، تے طرحاں طرحاں دیاں زباناں بولنڑ آلے مقرر کیتے۔

²⁹ کیا یکے رسُول ہِن؟ کیا یکے نبی ہِن؟ کیا یکے اُستاد ہِن؟ کیا یکے معجزے ڈِکھاوݨ آلے ہِن؟

³⁰ کیا ساریاں کُوں شِفا ڈیوݨ دی نعمت مِلی ہے؟ کیا سارے طرحاں طرحاں دیاں زباناں بُولیندے ہِن؟ کیا سارے اِنہاں زباناں دا ترجمہ کریندے ہِن؟

³¹ پر تُساں اعلیٰ نعمتاں گِھننڑ دی سِک ءچ راہو۔ پر ہُنڑ مَیں تُہاکُوں سبھ تُوں چنگا طریقہ ڈسیندا ہاں۔