1کُرِنتھِیوں 11 - کِتاب مُقدّس سرائیکی ترجمہ1 تُساں میڈے نمونے اُتے ٹُرو جِینویں مَیں مسیح دے نمونے اُتے ٹُردا ہاں۔ عبادت دے دوران سر کجنڑ دی ہدایت 2 مَیں تُہاڈی تعریف کریندا ہاں جو تُساں ہر گالھ ءچ میکُوں یاد رکھیندے تے اُنہاں تعلیمات کُوں قائم رکھیندے ہیوے جیہڑیاں مَیں تُہاکُوں پُچائیاں۔ 3 پر مَیں چاہندا ہاں جو تُساں ایہ وی جاݨ گِھنو جو ہر مرد دا سر مسیح ہے تے عورت دا سر مرد ہے تے مسیح دا سر خُدا ہے۔ 4 اِیں واسطے جے کوئی مرد سر کج تے دُعا یا نبُوّت کرے تاں او آپنڑے سر دی بے عزتی کریندے۔ 5 تے اِینویں ای جے کوئی عورت آپنڑا سر کجے بغیر دُعا یا نبُوّت کرے تاں او آپنڑے سر دی بے عزتی کریندی ہے، کیوں جو او سر مُنڈی دے برابر ہے۔ 6 جے کوئی عورت آپنڑے سر اُتے بوچھنڑ نئیں گِھندی تاں او آپنڑا سر وی مُنوا ڈیوے پر جے او سر مُنواوݨ کُوں شرم دی گالھ سمجھدی ہے تاں او بوچھنڑ نال آپنڑا سر کجے۔ 7 پر مرد کُوں آپنڑا سر نئیں کجنڑاں چاہیدا کیوں جو او خُدا دی صورت تے اُوندا جلال ہے پر عورت مرد دا جلال ہے، 8 کیوں جو مرد عورت کنُوں نئیں بلکہ عورت مرد کنُوں بنڑائی گئی ہے۔ 9 تے مرد عورت دی خاطر نئیں بلکہ عورت مرد دی خاطر پیدا کیتی گئی۔ 10 بس فرشتیاں دی وجہ کنُوں عورت کُوں چاہیدے جو آپنڑے سر اُتے تابع ہووݨ دی نشانی رکھے۔ 11 وَل وی خُداوند ءچ عورت کُوں مرد دی تے مرد کُوں عورت دی ضرورت ہے۔ 12 کیوں جو جِینویں عورت مرد ءچوں نِکلی، اُونویں ای مرد وی عورت دے وسیلے نال پیدا تھیندے پر سبھ چیزاں خُدا دی طرفوں ہِن۔ 13 تُساں خود ای فیصلہ کرو، کیا کہیں عورت دا سر کجے بغیر خُدا کنُوں دُعا کرݨ مناسب ہے؟ 14 کیا فطرت خود وی ایہ نئیں سکھیندی جو جے مرد دے سر دے وال لمبے ہووݨ تاں ایہ اُوندے کیتے شرم دی گالھ ہے؟ 15 پر جے عورت لمبے وال رکھے تاں ایہ اُوندے کیتے شان دی گالھ ہے کیوں جو لمبے وال اُونکُوں پڑدے کیتے ڈِتے گئے ہِن۔ 16 جے کوئی اِیندے اُتے بحث کرݨ چاہندے تاں او جاݨ گِھنے جو نہ ساڈا ایجھا دستور ہے نہ خُدا دی کلیسیاواں دا۔ عشائے ربانی 17 ہُنڑ جیہڑی ہدایت مَیں تُہاکُوں کریندا ہاں اُوندے ءچ تُہاڈے کیتے تعریف دی کوئی گالھ نئیں، کیوں جو تُہاڈا عبادت کیتے جمع تھیوݨ فائدہ نئیں بلکہ نُقصان دا سبب ہے۔ 18 پہلی گالھ ایہ ہے جو مَیں سُنڑے جو جِیں ویلے تُساں کلیسیا دے طور تے جمع تھیندے ہیوے تاں تُہاڈے ءچ تفرقے تھیندے ہِن۔ تے میکُوں کہیں حد تئیں اِیں گالھ دا یقین وی ہے۔ 19 تُہاڈے ءچ تفرقے دا ہووݨ ضرور ہے تاں جو ظاہر تھی ونجے جو تُہاڈے ءچ کیہڑے لوک سچے ہِن۔ 20 بس جِیں ویلے تُساں جمع تھیندے ہیوے تاں تُہاڈا کھانڑا حقیقی عشائے ربانی نئیں تھی سگدا۔ 21 کیوں جو ہر بندہ ڈُوجھے دا اِنتظار کیتے بغیر کھانڑا کھا گِھندے۔ کوئی تاں بُکھا رہ ویندے تے کہیں کُوں نشہ تھی ویندے۔ 22 کیا کھاوݨ تے پِیوݨ کیتے تُہاڈے گھر نئیں؟ یا کیا تُساں خُدا دی کلیسیا کُوں ناچیز سمجھ تے جِنہاں کولھ کُجھ نئیں اُنہاں کُوں شرمندہ کریندے ہیوے؟ مَیں تُہاکُوں کیا آکھاں؟ کیا اِیں کیتے تُہاڈی تعریف کراں؟ مَیں تُہاڈی تعریف نئیں کر سگدا۔ 23 کیوں جو ایہ گالھ میکُوں خُداوند کنُوں مِلی تے مَیں تُہاڈے تئیں پُچا ڈِتی ہے جو خُداوند یسُوع جِیں رات او پکڑوایا گِیا، روٹی گِھدی، 24 تے شُکر کر تے تروڑی تے آکھیا، ”ایہ میڈا بدن ہے جیہڑا تُہاڈے کیتے ڈِتا ویندے۔ میڈی یادگاری کیتے اِیہو کیتا کرو۔“ 25 اِینویں ای، کھانڑے دے بعد اُوں پیالہ وی گِھدا تے آکھیا، ”ایہ پیالہ او نواں عہد ہے جیہڑا میڈے خون دے وسیلے بدھیا ویندے۔ جِیں ویلے وی اِینکُوں پِیو، میڈی یادگاری کیتے اِیہو کیتا کرو۔“ 26 کیوں جو جِیں ویلے تُساں ایہ روٹی کھاندے تے اِیں پیالے ءچوں پِیندے ہیوے تاں خُداوند دی موت دا اعلان کریندے ہیوے جئیں تئیں او ولا نہ آوے۔ 27 اِیں واسطے جیہڑا کوئی نامناسب طریقے نال خُداوند دی روٹی کھاندے یا اِیں پیالے ءچوں پِیندے او خُداوند دے بدن تے خون دے خلاف گُناہ کرݨ دا قصُوروار ہوسی۔ 28 بس اِیں روٹی ءچوں کھاوݨ تے اِیں پیالے ءچوں پِیوݨ کنُوں پہلے ہر بندہ آپنڑے آپ کُوں پرکھ گِھنے۔ 29 کیوں جو جیہڑا کوئی کھاندے پِیندے ویلے خُداوند دے بدن کُوں نئیں سُنجانڑدا او اِیں کھاوݨ تے پِیوݨ نال آپنڑے اُتے سزا گِھن آندے۔ 30 اِیہو وجہ ہے جو تُہاڈے ءچوں بہُوں سارے لوک کمزور تے بیمار ہِن بلکہ کئی مر وی گئے ہِن۔ 31 پر جے اساں آپنڑے آپ کُوں پرکھدے تاں سزا نہ پیندے۔ 32 پر خُداوند ساکُوں سزا ڈے تے ساڈی تربیت کریندے تاں جو اساں دُنیا دے نال مُجرم نہ بنڑوں۔ 33 اِیں واسطے میڈے بِھراؤ! جِیں ویلے تُساں کھاوݨ کیتے کٹھے تھیندے ہیوے تاں ہِک ڈُوجھے دا اِنتظار کرو۔ 34 جے کوئی بُکھا ہووے تاں آپنڑے گھرُوں کھا گِھنے تاں جو تُہاڈا کٹھا تھیوݨ سزا دا سبب نہ بنڑے۔ مَیں بئے گالھیں اُتھائیں آ تے ٹھیک کریساں۔ |
Modern Central Saraiki Bible © 2024 Strategic Resource Group
Strategic Resource Group