Selanîkî I, 4 - کتاب مقدس به زبان کردی شیکاکی

ژیانا گو خدا کَیف خوش دِگَت

¹ بَجا، دوماییگه، گَلی بِرایا، اون ژه مَ فِر بون گو چاون دِبی رِفتاره بِگَن و خدا کَیف خوش گَن، هَ وِسا گو اون دِگَن ژی. نَهَ اَم ناو عیسیْ خاده دا ژه وَ دِخازِن و لاواهیا دِگَن گو اون راستا وه یگه دا زِدَتِر ژی سَعیه بِگَن.

² چون اون دِزانِن گو مَ بِ واسِطا عیسیْ خاده، اَمره چاون دانَ وَ.

³ چون گو اَوَیَ اِرادا خدا، آنی مُقدس بونا وَ: گو اون خو ژه به ناموسیه دور بِگِرِن؛

⁴ گو هَریگ ژه وَ دِبی بِزانیت گو چاون ناو مُقدس بون و حُرمَته دا اختیارا بَدَنا خو بِگِریتَ دَست،

⁵ و بینا قَومه گو یهودی نینِن و خدا ناس ناگَن، نَکَونَ ناو داخازیه شهوته دا.

⁶ گو چه کَس نابی وه مَسَله دا راستا بِرایه خودا خطایه بِگَت و راستا حَریما بِرایه خودا طمعه بِگَت، چون گو خاده تُلا تواوی وان دِشدانَ دیه وَگَت، هَ وِسا گو مَ پِشتِر گُتَ وَ و مِجِد هُشدار دا وَ.

⁷ چون گو خدا اَم گازی نَگِرِنَ بُ پیسیتیه، بَلگو اَم گازی گِرِنَ بُ مُقدس بونه.

⁸ بَجا، هَچی کَسه وه قِسه رَد گَت، نه انسان بَلگو خدا رَد گِریَ، هَمَن اَو خدایه گو رِحا مُقدسا خو دِدَتَ وَ.

⁹ نَهَ راستا مُحبّتا بِراتیه دا، لازِم نینَ گو چه کَس چه دِشدی بُ وَ بِنویسیت، چون گو اون بوخو ژه خدا فِر بونَ گو هَژَ یِگودو بِگَن،

¹⁰ و بَراستی ژی اون تواوی مَنطَقا مقدونیه دا هَژَ همو بِرایا دِگَن. بله گَلی بِرایا، اَم اصراره وَ دِگَن گو وه شُله زِدَ و زِدَتِر بِگَن.

¹¹ داخازیا وَ اَوَ بیت گو وَ ژیانَگه آرام هَبیت و سَره وَ ناو شُلا وَدا بیت و بِ دَسته خو شُل گَن، هَ وِسا گو مَ بُ وَ اَمِر گِر.

¹² گو وِسا، اون لاره وان مِرُوا گو دَروَیی کلیسایه نَ دوز رِفتاره بِگَن و اون محتاجی چه کَسه نَبِن.

زُوِرینا خاده

¹³ بله گَلی بِرایا، اَم ناخازِن گو اون ژه وان مِرُوه خُدان ایمان گو مِرِنَ به خَبَر بِن، گو وِسا له نَیِت گو اون بینا مِرُوه دی گو به اُمیدِن، تازیه بِگِرِن.

¹⁴ چون بَر خاطره هِنده گو مَ ایمان هَیَ گو عیسی مِر و دیسا ساخ بو، بَجا هَ وِسا ژی بِ واسِطا عیسی، خدا اَو مِرُوه خُدان ایمان گو مِرِنَ، گَل ویدا دیه بِزُورنیت.

¹⁵ اَم وِنَ بِ واسِطا کلاما خاده بُ وَ دِبِژِنَ: اَم اَونه گو ساخِن و حَتا هاتنا خاده دِمینِن، پِش اَو مِرُوه خُدان ایمان گو مِرِنَ ناکَوِن.

¹⁶ چون گو خاده بوخو، بِ اَمرَگه دَنگ بِلند، بِ دَنگا سَرُکه میلیاکَتا و بِ دَنگا زِرنایا خدا ژه اَسمانی دا دیه ژُردا بِت. هِنگه اَوِلی اَو مِریه گو ایمان مسیحْ هَبون دیه ساخ بِن.

¹⁷ پاشه اَم اَونه گو ساخِن و مانَ، اَمه گَل واندا بُ ناو اَورادا ژِلَل بِنَ بِرِن گو خاده ناو هوادا بِبینِن و وِسا اَمه همو جاره گَل خاده دا بِن.

¹⁸ بَجا بِ وان قِسانَ یِگودو اِمِن گَن.