Lûqa 22 - کتاب مقدس به زبان کردی شیکاکیخیانتا یهودا 1 عَیدا نانه به هِوِن گو ناودَنگ بَ عَیدا پِسَخه بو نِیزوک دِبو، 2 و سَرُکِت کاهینا و ماموستایِت تَوراته دوو هِنده دا بون گو چاون عیسی بُگُژِن، چون گو دِتِرسیان ناو خلقه دا هِنگامَ چه بیت. 3 هِنگه شیطان چو ناو جِلده یهودایه ناودَنگ بَ اَسخَریوطی گو یگ له دانزدَه شاگِردا بو. 4 یهودا چو لاره سَرُکِت کاهینا و سَرُکِت نُبَدارِت معبده و گَل وان قِسَ گِر گو چاون عیسی تسلیمی دَسته وان بِگَت. 5 اَو کَیف خوش بون و قِرار گِرِن دِراوه بِدَنَ یهودا. 6 اَوی ژی قَبول گِر و دوو فُرصَتَگه بو گو وقته جَماعَت وادَرا نَبیت، عیسی تسلیمی وان بِگَت. شیوا عَیدا پِسَخه گَل شاگِردادا 7 ایجا رُژا عَیدا نانه به هِوِن گو دِبی بَرخِگا پِسَخ بِتَ قُربانی گِرِن، گَهَشت. 8 عیسی، پِطرُس و یوحنا رِگِر و گُتَ وان: «هَرِن و شیوا پِسَخه بُ مَ حاضِر گَن گو اَم بُخُن.» 9 اَوان ژه عیسی پیسیار گِر: «کیدَره تِ دِخازی اَم حاضِر گَن؟» 10 عیسی گُتَ وان: «وقته گو اون چُنَ ناو شَهری، مِرُوَگ بِ گُلُزَگَ آوه دیه راستی وَ بِت. دوو ویدا هَرنَ ناو وه مالا گو اَو دِچیتَ ژُر 11 و بِژِنَ خُدانه ماله: ”ماموستا دِژیت: ’اُدا مِوانا کیدَرِیَ گو شیوا پِسَخه گَل شاگِردِت خو وِدَره بُخُم؟“‘ 12 اَو دیه آلیه سَریَ ماله، اُدَگَ مَزِنَ رایخِستی نیشا وَ بِدَت. وِدَره شیوه حاضِر گَن.» 13 اَو چُن و همو دِشد هَ وِسا گو عیسی گُته بو وان، دیتِن و شیوا پِسَخه حاضِر گِرِن. 14 وقته گو اَو سَعَت گَهَشت، عیسی گَل رسولِت خو سَر سِرفِگه رونِشت. 15 ایجا عیسی گُتَ وان: «مِن گَلَک هَز دِگِر گو پِش زَجر کِشانا خو، وی شیوا پِسَخه گَل وَدا بُخُم. 16 چون دِبِژِمَ وَ گو ایدی اَز ژه وه ناخُم حَتا وقته گو ناو پادشاهیا خدادا بِتَ جی.» 17 ایجا طاسِگَگ راگِر و شُکُر گِر و گُت: «وینَ بِگِرِن و ناو خودا لِگوَ گَن. 18 چون اَز بُ وَ دِبِژِم گو اَز حَتا هاتنا پادشاهیا خدا ایدی ژه حاصِلا تِره ناوَخُم.» 19 هَ وِسا نان ژی راگِر و شُکُر گِر، گَر گِر و دا وان و گُت: «اَوَیَ بَدَنه مِن گو بُ وَ تِتَ دایین؛ وه شُله بُ هِنده گو اون مِن بیننَ بیراخو، بیننَ جی.» 20 هَ وی جورَیی، پاشه شیوه طاسِگ راگِر و گُت: «اَو طاسِگَ، نیشا عَهدا تازَیَ ناو خونا مِدا، گو بَر خاطره وَ دِتَ رِژاندِن. 21 بله نَهَ دَسته وه کَسه گو قَصدا تسلیم گِرِنا مِن هَیَ، گَل دَسته مِن ناو سِرفِگه دایَ. 22 چون گو گوره انسان اَو جورا گو هاتیَ قِرار گِرِن، دیه بِچیت، بله وَی بُ حاله اَو کَسه گو اَوی تسلیمی دُژمِن دِگَت.» 23 ایجا شاگِردا دَستبه پیسیارا ژه یِگودو گِرِن گو کیشگَ وان دیه وه شُله بِگَت. که همویا مَزِنتِرَ؟ 24 هَمژی بَحثَگ کَتَ ناو واندا وه راسته دا گو کیشگَ وان مَزِنتِرَ. 25 عیسی گُتَ وان: «پاشایِت قَومه دیتِر سَر وان آغاتیه دِگَن؛ و حاکِمِت وان ’خِیرخاز‘ تِنَ گاز گِرِن. 26 بله اون وِسا نَبِن. یه همویا مَزِنتِر ناو وَدا دِبی وَگو یه همویا گوشگَتِر بیت و سَرُک دِبی بینا خِذمَتکارا بیت. 27 چون گو کیشگ مَزِنتِرَ، اَوه گو سَر سِرفِگه دِرونِت آن اَوه گو خِذمَته دِگَت؟ ما نه اَوه گو سَر سِرفِگه دِرونِت؟ بله اَز ناو وَدا بینا خِذمَتکارَگِمَ.» 28 «اون اَو مِرُوِن گو ناو زحمت و ایزایه مِدا لاره مِن راوَستان. 29 ایجا هَ وِسا گو بابه مِن پادشاهیَگ دا مِن، اَزه ژی بِدَمَ وَ، 30 گو سَر سِرفِگا مِن ناو پادشاهیا مِن بُخُن و وَخُن و سَر تَختا رونِن و سَر دانزدَه عَشیرَته بنی اسرائیله قضاوته بِگَن.» 31 «اَی شَمعون، اَی شَمعون، بِزانَ گو، شیطانی ایجازَ خاست وَ بینا گَنِمی اَلَگه بِدَت. 32 بله مِن بُ تَ دعا گِر گو ایمانا تَ بَین نَچیت. بَجا وقته تِ زُوِری، ایمانا بِرایِت خو قاهیم گَ.» 33 ایجا شَمعونی جیواب دا: «اَی آغایه مِن، اَز حاضِرِم گَل تَ بِچِمَ زیندانه و گَل تَدا بِمِرِم.» 34 عیسی گُت: «پِطرُس، بِزانَ گو ایرو پِش بانی دانا دیگِله، تِیه سه جارا حاشا گَی گو تِ مِن ناس دِگَی.» 35 پاشه عیسی ژه وان پیسیار گِر: «ما وقته گو مِن اون به کیسگه دِراوی و بُخچِگ و سُلِگا رِگِر، اون بونَ محتاجه چه دِشدی؟» اَوان جیواب دا: «نه، چه دِشد.» 36 عیسی گُتَ وان: «بله نَهَ هَچی کَسه کیسِگ آن بُخچِگ هَیَ، اَوه راگَت و هَگو شمشیر چِنینَ، عبایه خو بِفرُشیت، شمشیرَگه بِکِریت. 37 چون اَز بُ وَ دِبِژِم اَو نِویسارا کِتِبِت مُقدس دِبی راستا مِدا بِتَ جی گو: ”اَو رِزا گُنَهکارادا هاتَ هَژمارتِن.“ چون اَو دِشدا گو راستا مِدا هاتیَ نِویساندِن، وانه تِتَ جی.» 38 شاگِردا گُتن: «آغایه مَ، بَرخوده، مَ دو شمشیر هَنَ.» عیسی گُتَ وان: «بَسَ!» دعایا عیسی چییایه زَیتونه دا 39 پاشه عیسی چو دَروَ و وَگو عادَتا هَیی، چو بُ چییایه زَیتونه و شاگِردِت وی ژی دوو ویدا چُن. 40 وقته گَهَشتِنَ وه جیه، گُتَ وان: «دعایه بِگَن گو نَکَونَ امتحانه دا.» 41 پاشه عیسی قیاسه فِرَدانا بَرَگه ژه وان دور کَت و سَر چُکا رونِشت، وِسا دعا گِر: 42 «اَی بابو، هَگو اِرادا تَیَ، وه طاسِگه مِن دور گَ؛ بله دیسا ژی نه داخازیا مِن، بَلگو اِرادا تَ بِقَومیت.» 43 هِنگه میلیاکَتَگ ژه اَسمانی وی دووهار بو و اَو تَقویَت گِر. 44 ایجا چون گو ناو عَذابه دا بو، مِجِدتِر دعا گِر و عارَقا وی وَگو دِلُپه خونه دِلُپ دِگِرَ سَر عَردی. 45 وقته ژه دعا گِرِنه رابو، زُوِری لاره شاگِردا و دیت گو اَو ژه نَرِحَتیادا خَورا چُنَ. 46 گُتَ وان: «اون بُچی رازانَ؟ رابِن و دعایه بِگَن گو نَکَونَ امتحانه دا.» عیسی دِگِرِن 47 عیسی هِشتا قِسَ دِگِر گو جَماعَتَگ هاتَ وِدَره. یهودا، یگ ژه وان دانزدَه شاگِردا، ره نیشا وان دِدا. اَوی خو نِیزوکی عیسی گِر گو وی ماچی گَت، 48 بله عیسی گُتَ وی: «اَی یهودا، تِیه گوره انسان بِ ماچَگه تسلیم گَی؟» 49 وقته اَونه گو گَل عیسی بون زانین چه دِقَومیت، گُتن: «آغایه مَ، اَم شمشیرِت خو بِکِشِن؟» 50 و یگَ وان شمشیرَگ خُلامه کاهینه مَزِن دا و گوهه وی یه راسته لِوَ گِر. 51 بله عیسی گُت: «دَست وه شُله بِکِشِن!» و دَسته خو دانا سَر گوهه وه مِرُوی و شفا دایه دا. 52 پاشه عیسی گُتَ سَرُکِت کاهینا و سَرُکِت نُبَدارِت معبده و مَزِنِت قَومی گو بُ گِرتِنا وی هاته بون: «ما اَز رِبِرِم گو اون بِ شمشیرا و زُپا هاتنَ دوو مِن؟ 53 همو رُژه معبده دا گَل وَدا بوم و وَ دَسته خو سَر مِن دِرِژ نَگِر. بله نَهَ وقت وقته وَیَ و وقته قُدرَتا تاریتیه.» پِطرُس، عیسی حاشا دِگَت 54 پاشه اَوان عیسی گِرتِن و بِرِنَ مالا کاهینه مَزِن. پِطرُس دوروَدا دوو وانرا دِچو. 55 ناوَگا حَوشا ماله، آگِرَگه بَردایی هَبو و هِندَ مِرُو دُرا وی رونِشته بون. پِطرُس ژی ناو واندا رونِشت. 56 وه ناوه دا خُدامَگه اَو ناو روناهیا آگِری دا دیت و چاوه خو کُتا وی و گُت: «اَو مِرُوَ ژی گَل ویدا بو.» 57 بله پِطرُسی حاشا گِر و گُت: «اَی ژِنِگ، اَز اَوی ناس ناگَم.» 58 گِمَگه پاشه هِنگه، مِرُوَگه دی اَو دیت و گُت: «تِ ژی یگ له وانی.» بله پِطرُسی گُت: «اَی مِر، اَز له وان نینِم.» 59 قیاسه سَعَتَگه دَرباز بو و مِرُوَگه دی ژی بِ اطمینانه گُت: «به شِگ اَو مِرُوَ ژی گَل وی بو، چون گو اَو ژی خلقه جلیله یَ.» 60 بله پِطرُسی گُت: «اَی مِر، اَز نِزانِم تِ چه دِژی.» هِشتا قِسَ دِگِر گو دیگِله بانی دا. 61 هَ وه ناوه دا عیسیْ خاده زُوِری و بَرخودا پِطرُس. و پِطرُسی قِسا عیسیْ خاده اینا بیراخو گو گُته بو: «ایرو پِش بانی دانا دیگِله، تِیه سه جارا مِن حاشا گَی.» 62 ایجا چو دَروَ و هوری هوری گیریا. پِکَنیه خو عیسی گِرِن 63 اَو مِرُوِت گو عیسی ناو دَسته واندا گرفتار بو، هَ وه حالیدا گو اَو کُت دِدان، پِکَنیه خو وی دِگِرِن. 64 چاوه وی گِردا بون و سَریگ دِگُتنه: «نَبوَته بِگَ! بِژَ اَو کِیَ تَ دِدَت؟» 65 و بِ گَلَک دوژونه دیتِر کُفر دِگُتنه دا. عیسی حُضورا شورایا یهودیادا 66 وقته بو سِبیزو، شورایه مَزِنِت قَومی، آنی سَرُکِت کاهینا و ماموستایِت تَوراته، گَل یِگودو خِر بون و عیسی گاز گِرِنَ حُضورا خو. 67 گُتن: «هَگو تِ مسیحی، بِژَ مَ.» عیسی جیواب دا: «هَگو بِژِم، اون قِسا مِن باوار ناگَن، 68 و هَگو ژه وَ پیسیار گَم، اون جیوابا مِن نادَن. 69 بله وِنَ وِداتِر، گوره انسان سَر دَسته راستَ قُدرَتا خدا دیه رونِت.» 70 همویا گُت: «بَجا آنی تِ گوره خدایی؟» عیسی گُتَ وان: «اون دِبِژِن گو اَزِم.» 71 بَهنده گُتن: «ایدی مَ چه احتیاج شاهِدا هَیَ؟ مَ بوخو ژه دَوْه وی بیهیست.» |
@ 2024 Korpu Company