شُله رسولا 24 - کتاب مقدس به زبان کردی شیکاکی

پولس ناو قیصریه حُضورا فِلیکْس دا

¹ پاشه پِنج رُژا، حَنانیا، کاهینه مَزِن، گَل هِندَ مَزِنا و وکیلَگه گو ناوه وی تِرتولُس بو، هاتِن. اَوان شِکایَتا خو له ضِدّ پولس بِرِنَ لاره والی.

² پاشه هِنده گو گاز گِرِنَ پولس، تِرتولُس حُضورا فِلیکْس دا دَستبه تُهمَت لِدان له ضِدّ پولس گِر و گُت: «فِلیکْس، اَز بَنی، اَم بِن سیبَرا جنابه تَ کِمِژوَیَ ناو صُلحه دانَ و دَولَت سَره پِشدیتِنا جنابه تَیَ گو وضعا وه مِلَته باشتِر بویَ.

³ اَم وَظیفا خو دِزانِن گو هر وقتَگ و هر جیَگه دا، سپاسه جنابه تَ بِگَن.

⁴ بله بَر خاطره هِنده گو اَم وِنَ زِدَتِر وقته تَ نَگِرِن، لاواهیا جنابه تَ دِگَم گو کَرَما خو مَ بِگَی، گَلَک گُرْتْ گوهه خو بِدَی مَ.

⁵ اَم گَهَشتِنَ وه هِنده گو اَوَ مِرُوَگه فتنَیَ و ناو یهودیه تواوی دُنیایه دا شُرِشا ره دِخِنیت. و اَو مِرُوَ یگ ژه سَرُکه فِرقا ناصِریانَ.

⁶ اَوی حتا سَعی گِر گو معبده به حُرمَت گَت؛ بله مَ اَو گِرت و مَ خاست گو گورَیَگی شِریعَته اَم دیوانا وی بِگَن.

⁷ بله لیسیاس اَمیره گُردانه هات و اَو بِ زُره ناو دَسته مَدا دَرخِست،

⁸ و دَستور دا اَونه گو اَوی تقصیرکار دِزانِن، بِنَ حُضورا جنابه تَ. نَهَ، هَگو تِ بوخو اَوی بِکِشی پیسیارا، تِیه بِزانی تواوی اَو دِشده گو اَم بُ تقصیرکار بونا وی دِبِژِن، راستِن.»

⁹ یهودی ژی ناو وه تقصیرکار گِرِنه دا گَل تِرتولُس دا بونَ یگ و تأیید گِرِن همو دِشد هَ وِسایَ گو اَو دِبِژیت.

¹⁰ وقته والی ایشارَ پولس گِر گو قِسَ گَت، پولس وِسا جیواب دا: «اَز دِزانِم گو گَلَک سالِن جنابه تَ سَر وه مِلَته قضاوته دِگَت، بَجا اَز بِ کَیف خوشیه، دفاعه خو دِگَم.

¹¹ جنابه تَ بوخو دِگاریت وَکُلیت و بِزانیت گو ژه چُنا مِن بُ اورشلیمه بَر خاطره پَرستِش گِرِنه دانزدَه رُژا زِدَتِر دَرباز نَبویَ،

¹² و وه مدَته دا، نه چه کَسه دیتیَ گو اَز گَل مِرُوَگه بَحثه بِگَم آن جَماعَته تحریک گَم، چه ناو معبده دا، چه ناو دیره دا و چه ناو شَهری دا.

¹³ اَو نِگارِن نَهَ اَو تُهمَته گو مِن دِدَن، بُ جنابه تَ ایثبات گَن.

¹⁴ بله اَز وِنَ بُ جنابه تَ اعتراف دِگَم گو گورَیَگی وه طریقتا گو اَو مِرُوَنَ اَوه فِرقَیَگه دی دِزانِن، اَز خدایه باوانه خو پَرستِش دِگَم و مِن ایمان تواوی اَو دِشده گو تَورات و نِویساره پِیغَمبَرادا هاتیَ نِویساندِن، هَیَ.

¹⁵ مِن اُمید خدا هَیَ گو هم بُ مِرُوه عادل و هم بُ مِرُوه ظالِم قیامَتَگ هَیَ گو اَو مِرُوَنَ بوخو ژی اَوه قَبول دِگَن.

¹⁶ بَر خاطره وه یگه، اَز همو جاره سَعی دِگَم گو هم لاره خدا و هَمژی لاره مِرُوا بِ وجدانَگه پاک بژیم.

¹⁷ نَهَ، پاشه چَند سالا، اَز چُمَ اورشلیمه گو بُ مِلَته خو صدقا بِبَم و قُربانیا پِشکِش گَم.

¹⁸ وقته مِن اَو شُلَ دِگِر، پاشه هِنده گو مِن عادَتا طهارَته اینا جی، اَوان اَز ناو معبده دا پَیدا گِرِم. نه جَماعَتَگ خِر بِبو دُرا مِن، نه هِنگامَیَگ هَبو. بله هِندَ یهودی ژه حَریما آسیایه هاتِن

¹⁹ گو دِبا اِرَ حُضورا جنابه تَدا بان گو هَگو شِکایَتَگ له ضِدّ مِن هَنَ، بِژِن.

²⁰ آن جنابه تَ ایجازه بِدَت اَو مِرُوَنَ بوخو بِژِن وقته اَز حُضورا شورایه دا راوَستا بوم، چه جُرمَگ مِدا دیتِن،

²¹ خِنجی وه یگه گو وقته اَز ناو واندا راوَستا بوم، مِن بِ دَنگا بِلند گُت: ”بَر خاطره مَسَلا رابونا ژه ناو مِریادایَ گو ایرو حُضورا وَدا دیوانا مِن دِتَ گِرِن.“‌»

²² بله فِلیکْسه والی گو راستا طریقته دا باش سَردَری دِگِر، مَحکَمَ پاش اِخِست و گُت: «وقته لیسیاس اَمیره گُردانه بِت، اَزه راستا مَسَلا وَدا تصمیمه بِگِرِم.»

²³ پاشه اَوی دَستور دا گو افسره مسئول پولس بِن نَظَرا خودا خُدان گَت، بله هِندَ آزادیا ژی بِدَتَ وی و پِشیا چی یگ ژه هَوالِت پولس نَگِریت گو اَو بِگارِن هَوجَییِت وی بیننَ جی.

²⁴ پاشه چَند رُژا، فِلیکْسه والی گَل ژِنا خو دْروسیلا گو یهودی بو، هات و رِگِرَ دوو پولس و گوهه دا قِسه وی گو راستا ایمان بَ مسیحْ عیسیْ دا بو.

²⁵ وقته گو پولس راستا صالِح بون، خوراگِرتِن و اَو قضاوتا گو قِرارَ رُژا قیامَته بِتَ گِرِن قِسَ گِر، فِلیکْس تِرسیا و گُت: «تِ نَهَ هَرَ! وقته مِن فُرصَتَگه دی پَیدا گِر، اَزه دیسا رِگَمَ دوو تَ.»

²⁶ آلیَگه دا ژی فِلیکْس هِویدار بو گو پولس رِشوه بِدَتَ وی. بَ وه یگه ژی دوویِگرا مِرُو ره دِگِرنَ دوو پولس و گَل ویدا قِسَ دِگِر.

²⁷ پاشه دو سالا، پورکیوس فِستوس هاتَ شونا فِلیکْس دا و بو والی. فِلیکْس ژی گو دِخاست قَنجیَگ یهودیا گِره بیت، پولس زیندانه دا خُدان گِر.